ഓട്ടവ: ജനിതക പരിശോധനാ കമ്പനിയായ ’23andMe’യുടെ ഡാറ്റാ ചോർച്ചയിലെ പരാതിക്കാരായ കാനഡക്കാർക്ക് നഷ്ടപരിഹാരത്തിന് അപേക്ഷിക്കാൻ സമയം നീട്ടിയതായി കോടതി. ജൂൺ 25 വരെയാണ് സമയം അനുവദിച്ചിരിക്കുന്നത്. 2023-ൽ നടന്ന സൈബർ ആക്രമണത്തിലൂടെ ലക്ഷക്കണക്കിന് ആളുകളുടെ സ്വകാര്യ വിവരങ്ങളാണ് ഹാക്കർമാർ ചോർത്തിയത്. ഇതിൽ ഉൾപ്പെട്ട കാനഡക്കാർക്ക് ഏകദേശം 45 ലക്ഷം ഡോളറിന്റെ സഹായ പാക്കേജിൽ നിന്നാണ് തുക ലഭിക്കുക.
ചോർച്ച മൂലം സാമ്പത്തിക നഷ്ടമുണ്ടായവർക്ക് രേഖകൾ ഹാജരാക്കിയാൽ 2,500 ഡോളർ വരെ ലഭിക്കും. പ്രത്യേക രേഖകൾ ഇല്ലാത്തവർക്ക് ഏകദേശം 17.77 ഡോളർ വീതമാണ് ലഭിക്കുക. 2023 മെയ് ഒന്നിനും ഒക്ടോബർ ഒന്നിനും ഇടയിൽ കമ്പനിയുടെ സേവനം ഉപയോഗിച്ചവർക്കും, വിവരങ്ങൾ ചോർന്നതായി ഔദ്യോഗിക അറിയിപ്പ് ലഭിച്ചവർക്കുമാണ് അപേക്ഷിക്കാൻ അർഹതയുള്ളത്.
ഉപഭോക്താക്കളുടെ വിവരങ്ങൾ സംരക്ഷിക്കുന്നതിൽ കമ്പനി പരാജയപ്പെട്ടതായി അന്വേഷണത്തിൽ കണ്ടെത്തിയിരുന്നു. സാമ്പത്തിക പ്രതിസന്ധിയെത്തുടർന്ന് ഉടമസ്ഥാവകാശം മാറിയ കമ്പനി, ഇപ്പോൾ സുരക്ഷാ സംവിധാനങ്ങൾ ശക്തമാക്കിയിട്ടുണ്ടെന്ന് അറിയിച്ചു. തങ്ങളുടെ അക്കൗണ്ടുകൾ എപ്പോൾ വേണമെങ്കിലും നീക്കം ചെയ്യാനും വിവരങ്ങൾ ഗവേഷണത്തിന് ഉപയോഗിക്കുന്നത് തടയാനും ഇപ്പോൾ ഉപഭോക്താക്കൾക്ക് സാധിക്കും.
