ഓട്ടവ: വിദേശ രാജ്യങ്ങളില് നിന്നുള്ള ഫ്രോസണ്,പച്ചക്കറികളുടെ ഇറക്കുമതിയില് കാനഡ ട്രേഡ് അന്വേഷണം പ്രഖ്യാപിച്ചു. കാനഡയിലെ പച്ചക്കറി ഉല്പ്പാദകരുടെയും പ്രോസസ്സര്മാരുടെയും സംഘടനയായ ‘കനേഡിയന് അസോസിയേഷന് ഓഫ് വെജിറ്റബിള് ഗ്രോവേഴ്സ് ആന്ഡ് പ്രോസസ്സേഴ്സ്’ നല്കിയ പരാതിയെത്തുടര്ന്നാണ് ഫെഡറല് ഗവണ്മെന്റിന്റെ ഈ നീക്കം.
കുറഞ്ഞ വിലയിലുള്ള വിദേശ പച്ചക്കറികള് കനേഡിയന് വിപണിയിലേക്ക് വന്തോതില് എത്തുന്നതായും ഇത് പ്രാദേശിക കര്ഷകര്ക്കും ഉല്പ്പാദകര്ക്കും വലിയ സാമ്പത്തിക നഷ്ടമുണ്ടാക്കുന്നതായും സംഘടന പരാതിപ്പെട്ടിരുന്നു. കടല, വാക്സ് ബീന്സ്, ചോളം, പയര് വര്ഗ്ഗങ്ങള് തുടങ്ങിയവയുടെ ഇറക്കുമതിയെക്കുറിച്ചാണ് പ്രധാനമായും അന്വേഷണം നടക്കുക.
ട്രേഡ് ട്രൈബ്യൂണലിന്റെ നേതൃത്വത്തില് 2026 ജൂണ് 15-ന് ഇതില് ഔദ്യോഗികമായി വാദം കേള്ക്കും. വിദേശത്തുനിന്നുള്ള ഈ അമിത ഇറക്കുമതി കനേഡിയന് കര്ഷകര്ക്ക് ഗുരുതരമായ പ്രത്യാഘാതങ്ങള് ഉണ്ടാക്കുന്നുണ്ടോ എന്ന് 180 ദിവസത്തിനുള്ളില് ട്രൈബ്യൂണല് റിപ്പോര്ട്ട് നല്കണം. കൂടാതെ, ഇറക്കുമതി നിയന്ത്രിക്കുന്നത് രാജ്യത്തെ ഭക്ഷണത്തിന്റെ വിലയെയും ഭക്ഷ്യ സുരക്ഷയെയും എങ്ങനെ ബാധിക്കുമെന്നും ട്രൈബ്യൂണല് പരിശോധിക്കും.
