ഡാലസ് : യേശുക്രിസ്തുവിന്റെ ജറൂസലേം പ്രവേശനം, പീഢാനുഭവം, കുരിശുമരണം, ഉയര്ത്തെഴുന്നേല്പ് എന്നിവ അനുസ്മരിക്കുന്ന വിശുദ്ധ വാരത്തിലേക്കു ലോകമെമ്പാടുമുള്ള ക്രൈസ്തവരോടൊപ്പം ഡാലസ് ക്രിസ്തുരാജ ക്നാനായ കത്തോലിക്ക ഇടവക ഒരുങ്ങി. എല്ലാ ദിവസത്തെയും തിരുക്കര്മ്മങ്ങള്ക്ക് വികാരി ഫാ. ബിന്സ് ചേത്തലില്, ഫാ. സന്തോഷ് അധികാരത്തില് എന്നിവര് മുഖ്യ കാര്മ്മികത്വം വഹിക്കും.
വിശുദ്ധ വാരത്തിലെ തിരുക്കര്മ്മങ്ങള് താഴെപ്പറയുന്ന ക്രമത്തില് നടക്കുന്നതാണ്.
ഓശാന ഞായറാഴ്ചയായ മാര്ച്ച് 29-നു ഓശാനയുടെ തിരുക്കര്മ്മങ്ങള് രാവിലെ 9.30 ന് കുരുത്തോല വെഞ്ചരിപ്പും പ്രദക്ഷിണവും വിശുദ്ധ കുര്ബാനയും നടന്നു. ഏപ്രില് 2, പെസഹാ വ്യാഴാഴ്ച വൈകുന്നേരം 7 ന് കാല് കഴുകല് ശുശ്രൂഷയും വിശുദ്ധ കുര്ബാനയും ഉണ്ടായിരിക്കും. ഏപ്രില് 3, ദുഃഖവെള്ളിയാഴ്ച രാവിലെ 10 മണിക്ക് മലയാളത്തിലും വൈകിട്ട് 7 മണിക്ക് ഇംഗ്ലീഷിലും ദുഃഖവെള്ളിയുടെ തിരുക്കര്മ്മങ്ങളും കുരിശിന്റെ വഴിയും നടക്കും. കഞ്ഞിനേര്ച്ചയും ഉണ്ടായിരിക്കും.
ഏപ്രില് 4, ശനിയാഴ്ച 9 ന് രാവിലെ ദുഃഖശനിയുടെ തിരുക്കര്മ്മങ്ങള് നടക്കും. ഈസ്റ്ററിന്റെ തിരുക്കര്മ്മങ്ങള്, ശനിയാഴ്ച വൈകുന്നേരം 7 മണിക്ക് മലയാളത്തിലും ഇംഗ്ലീഷിലും നടക്കുന്നതാണ്. ഈസ്റ്റര് ദിവസമായ, ഏപ്രില് 5 ഞായറാഴ്ച രാവിലെ ഒമ്പത് മണിക്ക് വിശുദ്ധ കുര്ബാന. വിശുദ്ധ വാരത്തോടനുബന്ധിച്ച് കുമ്പസാരത്തിനുള്ള അവസരം വിശുദ്ധ വാര ദിവസങ്ങളില് ഉണ്ടായിരിക്കുന്നതാണ്.
