ടോക്കിയോ: ജപ്പാനിലെ വിഖ്യാതമായ ചെറി പുഷ്പങ്ങൾ (സകുറ) പൂർണ്ണമായി വിരിഞ്ഞുനിൽക്കുന്ന കാഴ്ച ആസ്വദിക്കാൻ ആയിരക്കണക്കിന് വിനോദസഞ്ചാരികളും തദ്ദേശീയരും ഒത്തുചേരുന്നു. ഇന്ന് രാജ്യത്തെ പ്രധാന പാർക്കുകളിലും ക്ഷേത്രങ്ങളിലും വൻ തിരക്കാണ് അനുഭവപ്പെട്ടത്. ജാപ്പനീസ് സംസ്കാരത്തിൽ യുവത്വത്തിന്റെയും ജീവിതത്തിന്റെ നൈമിഷികതയുടെയും പ്രതീകമായാണ് ഈ പൂക്കളെ കണക്കാക്കുന്നത്.
ചെറി മരങ്ങൾക്കടിയിൽ കുടുംബത്തോടും സുഹൃത്തുക്കളോടുമൊപ്പം ഭക്ഷണം കഴിച്ചും സമയം ചിലവഴിച്ചും നടത്തുന്ന പരമ്പരാഗത ആഘോഷമായ ഹനാമി കാണാൻ ലോകത്തിന്റെ വിവിധ ഭഗങ്ങിൽ നിന്നും ആളുകൾ വരാർ ഉണ്ട്. ടോക്കിയോയിലെ പ്രശസ്തമായ ഉനോ പാർക്കിലും പുരാതന നഗരമായ ക്യോട്ടോയിലും വലിയ ആഘോഷങ്ങളാണ് നടക്കുന്നത്.
വെളുപ്പും പിങ്കും കലർന്ന നിറത്തിൽ വിരിഞ്ഞുനിൽക്കുന്ന ഈ പൂക്കൾ ഒരു ആഴ്ച മാത്രമേ നിലനിൽക്കൂ എന്നതാണ് പ്രത്യേകത. ഓരോ നഗരത്തിലും പൂക്കൾ എപ്പോൾ വിരിയുമെന്നും എത്ര കാലം നിലനിൽക്കുമെന്നും അറിയാൻ പ്രത്യേക കാലാവസ്ഥാ പ്രവചനങ്ങൾ ജപ്പാനിൽ പുറപ്പെടുവിക്കാറുണ്ട്. ക്യോട്ടോയിലെ പ്രസിദ്ധമായ നിജോ-ജോ കാസിലിലെ മരങ്ങളിൽ പൂക്കൾ പൂർണ്ണമായി വിരിഞ്ഞതായി തിങ്കളാഴ്ച ഔദ്യോഗികമായി പ്രഖ്യാപിച്ചു.
ജപ്പാനിലെ പുതിയ സാമ്പത്തിക വർഷത്തിന്റെയും ബിസിനസ്സ് വർഷത്തിന്റെയും തുടക്കമാണ് ഈ പുഷ്പകാലം. അതുകൊണ്ട് തന്നെ പുതിയ ജോലിയിൽ പ്രവേശിക്കുന്നവർക്കും വിദ്യാലയങ്ങളിൽ നിന്ന് പഠിച്ചിറങ്ങുന്നവർക്കും ഇത് പുതിയ തുടക്കത്തിന്റെയും വിടവാങ്ങലിന്റെയും കാലം കൂടിയാണ്. പൂക്കൾ മഞ്ഞുവീഴ്ച പോലെ കൊഴിഞ്ഞു വീഴുന്നതിന് മുൻപുള്ള ഈ ചുരുങ്ങിയ ദിനങ്ങൾ ആസ്വദിക്കാൻ ലോകത്തിന്റെ വിവിധ ഭാഗങ്ങളിൽ നിന്നുള്ള വിനോദസഞ്ചാരികൾ കിമോണോ ഉൾപ്പെടെയുള്ള പരമ്പരാഗത വസ്ത്രങ്ങൾ ധരിച്ചാണ് ജപ്പാനിലെത്തുന്നത്.
