എഡ്മിന്റൻ: എഡ്മിന്റനിൽ ആകാശത്ത് കൗതുകമുണർത്തി വരിവരിയായി പ്രകാശബിന്ദുക്കൾ പ്രത്യക്ഷപ്പെട്ടു.എന്നാൽ ഇത് അന്യഗ്രഹ ജീവികളോ പറക്കും തളികകളോ അല്ല, സംഭവം ഇലോൺ മസ്കിന്റെ ഉടമസ്ഥതയിലുള്ള സ്പേസ് എക്സ് (SpaceX) കമ്പനിയുടെ സ്റ്റാർലിങ്ക് ഉപഗ്രഹങ്ങളാണ്. വിക്ഷേപണത്തിന് തൊട്ടുപിന്നാലെയുള്ള ദിവസങ്ങളിൽ ഉപഗ്രഹങ്ങൾ ഒന്നിനുപുറകെ ഒന്നായി സഞ്ചരിക്കുന്നതാണ് ഈ അപൂർവ കാഴ്ചയ്ക്ക് പിന്നിലെ രഹസ്യം.
ഒരേസമയം വിക്ഷേപിക്കുന്ന അറുപതോളം ഉപഗ്രഹങ്ങൾ അവയുടെ നിശ്ചിത ഭ്രമണപഥത്തിലേക്ക് എത്തുന്നതുവരെ ഒരേ പാതയിൽ സഞ്ചരിക്കുന്നതിനാലാണ് ഭൂമിയിൽ നിന്ന് നോക്കുമ്പോൾ ഇവ വരിവരിയായി കാണപ്പെടുന്നത്. സൂര്യപ്രകാശം ഇവയുടെ സോളാർ പാനലുകളിൽ തട്ടി പ്രതിഫലിക്കുന്നത് മൂലമാണ് രാത്രികാലങ്ങളിൽ ഇവ ഇത്ര തെളിച്ചത്തോടെ ദൃശ്യമാകുന്നത്. വിക്ഷേപിച്ച് ഏതാനും ആഴ്ചകൾ കഴിയുന്നതോടെ ഈ ഉപഗ്രഹങ്ങൾ ഓരോന്നും തങ്ങളുടെ നിശ്ചിത സ്ഥാനങ്ങളിലേക്ക് മാറുന്നതോടെ ഈ പ്രത്യേക കാഴ്ച മറയുകയും ചെയ്യും.അടുത്തിടെ വിക്ഷേപിച്ച ഒരു ബാച്ച് ഉപഗ്രഹങ്ങളാണ് ഇപ്പോൾ ആകാശത്ത് ദൃശ്യമായിരിക്കുന്നത്.
