ഫ്ലോറിഡ: മനുഷ്യനെ വീണ്ടും ചന്ദ്രനിലെത്തിക്കാനുള്ള നാസയുടെ ചരിത്രപ്രധാനമായ ‘ആർട്ടമിസ് 2’ ദൗത്യം വിജയകരമായി പ്രയാണം തുടരുന്നു. വിക്ഷേപണത്തിന് പിന്നാലെ ബഹിരാകാശത്തു നിന്നുള്ള ഭൂമിയുടെ ചിത്രങ്ങൾ നാസ പുറത്തുവിട്ടിരുന്നു. എന്നാൽ ഇപ്പോൾ സമൂഹമാധ്യമങ്ങളിൽ തരംഗമാകുന്നത് 30,000 അടി ഉയരത്തിൽ പറക്കുന്ന വിമാനത്തിനുള്ളിൽ നിന്ന് യാത്രക്കാർ പകർത്തിയ വിക്ഷേപണത്തിന്റെ അതി മനോ ഹരമായ വീഡിയോയാണ്. ന്യൂജേഴ്സി സ്വദേശിനിയായ കിം എന്ന യുവതിയാണ് തന്റെ ഇൻസ്റ്റഗ്രാം അക്കൗണ്ടിലൂടെ ഈ അത്യപൂർവ ദൃശ്യം പങ്കുവെച്ചത്. വിമാനത്തിന്റെ ജനാലയിലൂടെ ആർട്ടമിസ് പേടകം കുതിച്ചുയരുന്നത് വ്യക്തമായി വീഡിയോയിൽ കാണാം. ജീവിതത്തിൽ ഒരിക്കൽ മാത്രമുണ്ടാകുന്ന വിമാന യാത്രാനുഭവ മാണ് ഇന്നുണ്ടായത് എന്നാണ് യുവതി വീഡിയോയ്ക്കൊപ്പം കുറിച്ചത്. വിക്ഷേപണത്തിന്റെ ഏറ്റവും മികച്ച കാഴ്ചയാണ് ഇതെന്നും അവർ കൂട്ടിച്ചേർ ത്തു.”ജീവിതത്തിൽ ഒരിക്കൽ മാത്രം ലഭിക്കുന്ന അനുഭവം” എന്നാണ് കിം ഇതിനെ വിശേഷിപ്പിച്ചത്.
നിമിഷങ്ങൾക്കകം വൈറലായ വീഡിയോ ഇതിനോടകം 3.8 കോടിയിലധികം ആളുകൾ കണ്ടുകഴിഞ്ഞു. സാക്ഷാൽ നാസ തന്നെ വീഡിയോയ്ക്ക് താഴെ “ഇതിനെയാണ് ഞങ്ങൾ ഫസ്റ്റ് ക്ലാസ് വ്യൂ എന്ന് വിളിക്കുന്നത്” എന്ന് കുറിച്ചത് ആരാധകർക്കിടയിൽ ആവേശം കൂട്ടിയിട്ടുണ്ട്. ഭൂമിയെ ഒരു ദിവസം ഭ്രമണം ചെയ്ത ശേഷം ആർട്ടമിസ് 2 പേടകം ചന്ദ്രനിലേക്കുള്ള ഔദ്യോഗിക പാതയിലേക്ക് കടന്നു. വെള്ളിയാഴ്ച പുലർച്ചെ ഇന്ത്യൻ സമയം 5:19-ന് നടന്ന ‘ട്രാൻസ്ലൂണാർ ഇൻജക്ഷൻ’ (TLI) എന്ന സുപ്രധാന പ്രക്രിയ വിജയകരമായി പൂർത്തിയാക്കി.
