ഓട്ടവ: സാങ്കേതിക തകരാറുകൾ കണ്ടെത്തിയതിനെത്തുടർന്ന് കാനഡയിലെ 8,000-ത്തിലധികം ഫോക്സ്വാഗൺ വാഹനങ്ങൾ തിരിച്ചുവിളിക്കാൻ ട്രാൻസ്പോർട്ട് കാനഡ ഉത്തരവിട്ടു. വാഹനത്തിന്റെ ഇൻസ്ട്രുമെന്റ് ക്ലസ്റ്ററിലെ സോഫ്റ്റ്വെയർ പ്രശ്നങ്ങളാണ് പ്രധാനമായും ഈ തീരുമാനത്തിന് പിന്നിൽ.
വാഹനം സ്റ്റാർട്ട് ചെയ്യുമ്പോൾ സ്പീഡോമീറ്റർ, ഗിയർ സൂചകങ്ങൾ, മുന്നറിയിപ്പ് ലൈറ്റുകൾ എന്നിവ പ്രദർശിപ്പിക്കാത്തതാണ് പ്രധാന തകരാർ. ഡ്രൈവർക്ക് വാഹനത്തെക്കുറിച്ചുള്ള കൃത്യമായ വിവരങ്ങൾ ലഭിക്കാത്തത് അപകട സാധ്യത വർദ്ധിപ്പിക്കുമെന്ന് അധികൃതർ മുന്നറിയിപ്പ് നൽകുന്നു.
ബാധിക്കപ്പെട്ട മോഡലുകൾ ഇവയാണ്:
ഫോക്സ്വാഗൺ ജെറ്റ (Volkswagen Jetta) – 2025 മോഡൽ
ഫോക്സ്വാഗൺ ടാവോസ് (Volkswagen Taos) – 2025 മോഡൽ
ബാധിക്കപ്പെട്ട വാഹന ഉടമകളെ കമ്പനി നേരിട്ട് മെയിൽ വഴി വിവരം അറിയിക്കും. അംഗീകൃത ഡീലർഷിപ്പുകളിൽ എത്തിച്ച് സോഫ്റ്റ്വെയർ അപ്ഡേറ്റ് ചെയ്യാനോ ആവശ്യമെങ്കിൽ ഇൻസ്ട്രുമെന്റ് ക്ലസ്റ്റർ സൗജന്യമായി മാറ്റിസ്ഥാപിക്കാനോ ആണ് നിർദ്ദേശം. കഴിഞ്ഞ മാർച്ചിലും തീപിടുത്ത സാധ്യത കണക്കിലെടുത്ത് പതിമൂന്നായിരത്തോളം ഫോക്സ്വാഗൺ വാഹനങ്ങൾ കാനഡയിൽ തിരിച്ചുവിളിച്ചിരുന്നു. ട്രാൻസ്മിഷൻ ഗ്രൗണ്ട് വയറിലെ പിഴവ് മൂലമുണ്ടാകുന്ന അമിത താപം ഒഴിവാക്കാനായിരുന്നു അന്നത്തെ നടപടി.
