ഓട്ടവ: ആദിമ സമൂഹത്തിലെ സ്ത്രീകളുടെയും കുട്ടികളുടെയും സുരക്ഷ ഉറപ്പാക്കാൻ ഫെഡറൽ സർക്കാർ സ്ഥിരമായ സാമ്പത്തിക സഹായം നൽകണമെന്ന് ആവശ്യപ്പെട്ട് നാഷണൽ ഫാമിലി ആൻഡ് സർവൈവേഴ്സ് സർക്കിൾ (NFSC). രാജ്യത്ത് വൻകിട നിർമ്മാണ പദ്ധതികൾ നടക്കുമ്പോൾ ഈ വിഭാഗക്കാർക്ക് നേരെയുള്ള അക്രമങ്ങൾ വർധിക്കുന്ന സാഹചര്യത്തിലാണ് ഇവർ സഹായം തേടുന്നത്. നിലവിൽ ലഭിക്കുന്ന ഫണ്ട് നിർത്തലാക്കുമോ എന്ന ആശങ്ക തങ്ങളുടെ സേവനങ്ങളെ ബാധിക്കുന്നുണ്ടെന്ന് NFSC പ്രസിഡന്റ് ഹിൽഡ ആൻഡേഴ്സൺ-പിർസ് പറഞ്ഞു.
ഖനന മേഖലകളിലും വൻകിട വികസന പദ്ധതികൾ നടക്കുന്ന ഇടങ്ങളിലും സ്ത്രീകൾ വലിയ രീതിയിലുള്ള ചൂഷണങ്ങൾ നേരിടുന്നുണ്ടെന്ന് റിപ്പോർട്ടുകൾ സൂചിപ്പിക്കുന്നു. പുറത്തുനിന്നെത്തുന്ന തൊഴിലാളികൾക്കിടയിലെ ലഹരി ഉപയോഗവും മദ്യപാനവുമാണ് ഇതിന് പ്രധാന കാരണമായി ചൂണ്ടിക്കാണിക്കപ്പെടുന്നത്. താമസസൗകര്യങ്ങളുടെ കുറവും ശിശുക്ഷേമ സേവനങ്ങളുടെ അഭാവവും ഈ സാഹചര്യം കൂടുതൽ മോശമാക്കുന്നുണ്ടെന്നും ഇവർ വ്യക്തമാക്കുന്നു.
കുടുംബങ്ങൾക്ക് മെച്ചപ്പെട്ട വീട്, ഭക്ഷണം, വിദ്യാഭ്യാസം എന്നിവ ഉറപ്പാക്കാൻ സർക്കാർ അടിയന്തരമായി ഇടപെടണമെന്ന് സംഘടനകൾ ആവശ്യപ്പെട്ടു. അപകടസാധ്യതകൾ കുറയ്ക്കുന്നതിനായി സന്നദ്ധ സംഘടനകളുമായി ചേർന്ന് സർക്കാർ പ്രവർത്തിക്കണം. സ്ത്രീകളുടെയും കുട്ടികളുടെയും സുരക്ഷ ഉറപ്പാക്കാൻ വെറും വാഗ്ദാനങ്ങൾക്കപ്പുറം ദീർഘകാലാടിസ്ഥാനത്തിലുള്ള ശക്തമായ നടപടികളാണ് വേണ്ടതെന്ന് ഹിൽഡ ആൻഡേഴ്സൺ-പിർസ് വാർത്താ സമ്മേളനത്തിൽ പറഞ്ഞു.
