ഓട്ടവ: യുഎസ്-ഇറാന് വെടിനിര്ത്തല് ധാരണയെ സ്വാഗതം ചെയ്ത് കനേഡിയൻ പ്രധാനമന്ത്രി മാർക്ക് കാർണി. ബുധനാഴ്ച പാർലമെന്റിന് മുന്നിൽ മാധ്യമങ്ങളോട് സംസാരിക്കവെ, മേഖലയിലെ സമാധാനശ്രമങ്ങൾക്ക് ഇത് നിർണ്ണായകമാണെന്ന് അദ്ദേഹം പ്രതികരിച്ചു. മധ്യേഷ്യയിൽ ശാശ്വതമായ സമാധാനം കൊണ്ടുവരാനുള്ള എല്ലാ ശ്രമങ്ങൾക്കും കാനഡ പൂർണ്ണ പിന്തുണ നൽകുമെന്ന് അദ്ദേഹം ഉറപ്പുനൽകി.
ഹോർമുസ് കടലിടുക്കിലെ ഗതാഗതം പുനഃസ്ഥാപിക്കുന്നതിനായുള്ള പ്രവർത്തനങ്ങളിൽ കാനഡ സജീവമായി പങ്കുചേരും. കടലിടുക്ക് അടച്ചുപൂട്ടിയത് കാനഡയിൽ ഇന്ധനം, അലുമിനിയം, വളം എന്നിവയുടെ വില വർധിക്കാൻ കാരണമായതായി പ്രധാനമന്ത്രി ചൂണ്ടിക്കാട്ടി. കാനഡയുടെ കൃത്യമായ സംഭാവനകളെക്കുറിച്ച് അദ്ദേഹം കൂടുതൽ വിശദാംശങ്ങൾ വെളിപ്പെടുത്തിയില്ലെങ്കിലും, കപ്പൽ ഗതാഗതം സുഗമമാക്കുന്നതിനുള്ള ശ്രമങ്ങളെ രാജ്യം പിന്തുണയ്ക്കുമെന്ന് അദ്ദേഹം വ്യക്തമാക്കി.
