വാഷിങ്ടൺ: ലോകപ്രശസ്ത ഇലക്ട്രിക് വാഹന നിർമ്മാതാക്കളായ ടെസ്ല, സാധാരണക്കാർക്കും ലഭ്യമാകുന്ന തരത്തിൽ വില കുറഞ്ഞ പുതിയ കോംപാക്ട് എസ്യുവി വികസിപ്പിക്കുന്നതായി റിപ്പോർട്ട്. നിലവിലുള്ള മോഡൽ 3, മോഡൽ Y എന്നിവയുടെ വകഭേദമല്ലാതെ, തികച്ചും പുതിയ പ്ലാറ്റ്ഫോമിലാകും ഈ വാഹനം നിർമ്മിക്കുക. ഏകദേശം 14 അടി നീളം പ്രതീക്ഷിക്കുന്ന ഈ പുതിയ മോഡൽ, ടെസ്ലയുടെ ജനപ്രിയ എസ്യുവിയായ മോഡൽ Y-യേക്കാൾ ചെറുതായിരിക്കും. ചൈനയിലെ ഷാങ്ഹായ് ഫാക്ടറിയിലാകും ഇതിന്റെ പ്രാഥമിക ഉത്പാദനം നടക്കുകയെന്നാണ് പുറത്തുവിട്ട റിപ്പോർട്ടുകൾ സൂചിപ്പിക്കുന്നത്.
റോബോടാക്സുകളിലും സ്വയം നിയന്ത്രിത വാഹനങ്ങളിലും ശ്രദ്ധ കേന്ദ്രീകരിക്കാനായി കുറഞ്ഞ ചെലവിലുള്ള ഇവി പദ്ധതി ഇലോൺ മസ്ക് നേരത്തെ വേണ്ടെന്നു വെച്ചിരുന്നു. എന്നാൽ, ഡ്രൈവറില്ലാത്ത വാഹനങ്ങൾക്ക് ആഗോളതലത്തിൽ നിയമപരമായ അനുമതി ലഭിക്കാൻ വർഷങ്ങൾ എടുത്തേക്കാം എന്ന തിരിച്ചറിവിലാണ് പുതിയ നീക്കം. അതിനാൽ, പൂർണ്ണമായും സ്വയം ഓടുന്ന സാങ്കേതികവിദ്യയ്ക്കൊപ്പം തന്നെ ഡ്രൈവർക്ക് നിയന്ത്രിക്കാവുന്ന ഓപ്ഷനും ഈ വാഹനത്തിൽ ഉൾപ്പെടുത്തിയേക്കും. ഇത് ടെസ്ലയുടെ വിപണി വിഹിതം വർദ്ധിപ്പിക്കാൻ സഹായിക്കുമെന്നാണ് വിലയിരുത്തൽ.
ഉത്പാദനച്ചെലവ് കുറയ്ക്കുന്നതിനായി ചെറിയ ബാറ്ററിയും ഒറ്റ ഇലക്ട്രിക് മോട്ടോറും മാത്രമാകും ഈ എസ്യുവിയിൽ ഉപയോഗിക്കുക. നിലവിൽ ടെസ്ലയുടെ ഏറ്റവും വില കുറഞ്ഞ മോഡൽ 3-യേക്കാൾ ഗണ്യമായ വിലക്കുറവിൽ ഇത് വിപണിയിലെത്തിക്കാനാണ് കമ്പനി ലക്ഷ്യമിടുന്നത്. അമേരിക്കയിലേക്കും യൂറോപ്പിലേക്കും ഉത്പാദനം വ്യാപിപ്പിക്കാൻ പദ്ധതിയുണ്ടെങ്കിലും, ഈ വർഷം വാഹനത്തിന്റെ നിർമ്മാണം ആരംഭിക്കാൻ സാധ്യതയില്ല. കുറഞ്ഞ ഭാരവും ഉയർന്ന കാര്യക്ഷമതയും വാഗ്ദാനം ചെയ്യുന്ന ഈ മോഡൽ ടെസ്ലയുടെ വൻതോതിലുള്ള വിൽപനയ്ക്ക് കരുത്തേകുമെന്നാണ് വിലയിരുത്തൽ.
