അമേരിക്കയിൽ ജോലി ചെയ്യുന്ന വിദഗ്ധ തൊഴിലാളികൾക്കായി പ്രസിഡന്റ് ഡൊണാൾഡ് ട്രംപ് ഏർപ്പെടുത്തിയ 1,00,000 ഡോളർ H-1B വിസ ഫീസ് നിയമവിരുദ്ധമാണെന്ന് യുഎസ് കോടതി. ബോസ്റ്റണിലെ യുഎസ് ഡിസ്ട്രിക്റ്റ് ജഡ്ജി ലിയോ സൊറോക്കിനാണ് ഈ സുപ്രധാന ഉത്തരവ് പുറപ്പെടുവിച്ചത്. 20 ജനാധിപത്യ പാർട്ടി സംസ്ഥാന അറ്റോർണി ജനറൽമാർ നൽകിയ ഹർജിയിലാണ് വിധി.
ഈ ഫീസ് ഒരു ‘പെനാൽറ്റി’ അല്ലെന്നും മറിച്ച് കോൺഗ്രസിന്റെ അനുമതിയില്ലാതെ പ്രസിഡന്റ് അടിച്ചേൽപ്പിച്ച ഒരു ‘നികുതി’ (Tax) ആണെന്നും കോടതി നിരീക്ഷിച്ചു. വിസ ഫീസ് 1,00,000 ഡോളറായി ഉയർത്തിയത് നിയമപരമായ ചട്ടക്കൂടുകൾക്ക് വിരുദ്ധമാണെന്നും കോടതി വ്യക്തമാക്കി. ഐടി കമ്പനികൾ ഉൾപ്പെടെയുള്ള മേഖലകളെ ദോഷകരമായി ബാധിക്കുന്നതായിരുന്നു ഈ തീരുമാനം. എന്നാൽ, ഈ ഉത്തരവിനെതിരെ അപ്പീൽ പോകുമെന്ന് വൈറ്റ് ഹൗസ് വക്താവ് അറിയിച്ചു.
