ടൊറന്റോ: ടൊറന്റോ നഗരത്തിലെ യഹൂദ വിദ്യാലയങ്ങള്, സിനഗോഗുകള്, യു.എസ് കോണ്സുലേറ്റ് എന്നിവടങ്ങളില് നടന്ന വെടിവെപ്പുകള്ക്ക് പിന്നില് യുവാക്കളെ വാടകയ്ക്കെടുത്ത് നടത്തുന്ന വന് ക്രിമിനല് ശൃംഖലയെന്ന് ടൊറന്റോ പോലീസ്. ഇന്ന് നടത്തിയ പ്രത്യേക വാര്ത്താസമ്മേളനത്തിലാണ് പോലീസ് ചീഫ് മൈറോണ് ഡെംകീവ്, റോയല് കാനേഡിയന് മൗണ്ടഡ് പോലീസ് (RCMP) ഉദ്യോഗസ്ഥര് എന്നിവര് ഈ ഞെട്ടിക്കുന്ന വിവരങ്ങള് പുറത്തുവിട്ടത്.
എന്ക്രിപ്റ്റഡ് മെസ്സേജിങ് ആപ്പുകള് വഴിയാണ് ക്രിമിനല് സംഘം ഈ യുവാക്കളെ ബന്ധപ്പെടുന്നത്. നിര്ദ്ദേശിക്കപ്പെട്ട സ്ഥലങ്ങളില് വെടിവെപ്പ് നടത്തിയ ശേഷം അതിന്റെ വീഡിയോ ദൃശ്യങ്ങള് തെളിവായി അയച്ചു നല്കിയാല് മാത്രമാണ് ഇവര്ക്ക് പണം കൈമാറുന്നത്. നഗരത്തില് നടന്ന വിവിധ വെടിവെപ്പുകള്ക്ക് പിന്നില് ഒരേ പ്രവര്ത്തനരീതിയാണ് കാണുന്നതെന്ന് പോലീസ് ചീഫ് വ്യക്തമാക്കി. ഇതിന് പിന്നില് ആരാണ് പണം മുടക്കുന്നത് എന്ന് കണ്ടെത്താന് കാനഡയിലെ ആര്.സി.എം.പി (RCMP), അമേരിക്കയിലെ എഫ്.ബി.ഐ (FBI) എന്നീ ഏജന്സികളുമായി ചേര്ന്ന് അന്വേഷണം ഊര്ജ്ജിതമാക്കിയിരിക്കുകയാണ്.
നഗരത്തിന്റെ വിവിധ ഭാഗങ്ങളില് അക്രമം നടത്താന് പ്രതികള് ഒരേ തോക്കുകള് തന്നെയാണ് പരസ്പരം പങ്കുവെച്ചിരുന്നതെന്ന് ആര്.സി.എം.പി പറഞ്ഞു. കഴിഞ്ഞ ആഴ്ച നോര്ത്ത് യോര്ക്കില് നടത്തിയ പരിശോധനയില് ഒരു 9-എംഎം ഹാന്ഡ്ഗണും, ഒരു .45 കാലിബര് ഹാന്ഡ്ഗണും പോലീസ് കണ്ടെടുത്തിരുന്നു. ഇവ രണ്ടും അമേരിക്കയില് നിന്ന് കടത്തിക്കൊണ്ടുവന്നവയാണ്. ഇതില് 9-എംഎം തോക്ക് ഉപയോഗിച്ച് ജി.ടി.എ (Greater Toronto Area) മേഖലയില് കുറഞ്ഞത് ആറ് വെടിവെപ്പുകളും, .45 കാലിബര് തോക്ക് ഉപയോഗിച്ച് 21 വെടിവെപ്പുകളും നടന്നിട്ടുണ്ടെന്ന് ബാലിസ്റ്റിക് പരിശോധനയില് വ്യക്തമായിട്ടുണ്ട്. മാര്ച്ച് 10ന് യു.എസ് കോണ്സുലേറ്റിന് നേരെ നടന്ന വെടിവെപ്പിലും ഈ ആയുധങ്ങളാണ് ഉപയോഗിച്ചത്.
അതേസമയം കഴിഞ്ഞ ആഴ്ച സെര്ച്ച് വാറന്റുമായി എത്തിയ പോലീസ് സംഘത്തിന് നേരെ വെടിയുതിര്ക്കുകയും കോണ്സ്റ്റബിള് മാര്ക്ക് പിനിസോട്ടോയുടെ മരണത്തിന് ഇടയാക്കുകയും ചെയ്ത പ്രതി നിലവില് പരുക്കുകളോടെ പോലീസ് കസ്റ്റഡിയില് ആശുപത്രിയില് ചികിത്സയിലാണ്. ഇയാള്ക്കെതിരെ കൊലക്കുറ്റം ഉള്പ്പെടെയുള്ള വകുപ്പുകള് ചുമത്തി കേസെടുക്കുമെന്ന് പോലീസ് ചീഫ് മൈറോണ് ഡെംകീവ് അറിയിച്ചു.
