ന്യൂജേഴ്സി: ഫിഫ ലോകകപ്പ് 2026 കിരീടം സ്പെയിനിലെത്തിച്ച പരിശീലകൻ ലൂയിസ് ഡെ ലാ ഫുവെന്റെ ചരിത്രത്തിന്റെ ഭാഗമായിരിക്കുകയാണ്. ലോകകപ്പ് ട്രോഫി ഉയർത്തുന്ന ഏറ്റവും പ്രായം കൂടിയ പരിശീലകനെന്ന റെക്കോർഡാണ് സ്പെയിൻ പരിശീലകൻ സ്വന്തമാക്കിയത്.
ഗിന്നസ് വേൾഡ് റെക്കോർഡ്സ് പുറത്തുവിട്ട വിവരങ്ങൾ പ്രകാരം, 65കാരനായ ഡെ ലാ ഫുവെന്റെ ലോകകപ്പ് ജേതാക്കളായ ടീമിനെ നയിച്ച ഏറ്റവും പ്രായം കൂടിയ പരിശീലകനായി മാറി.
സ്പെയിന്റെ കിരീടപ്പോരാട്ടം പ്രതിരോധ മികവിലും മികച്ച സംഘാടനത്തിലും ശ്രദ്ധേയമായിരുന്നു. ലോകകപ്പ് കിരീടത്തിലേക്ക് മുന്നേറിയ എട്ട് മത്സരങ്ങളിൽ സ്പെയിൻ വഴങ്ങിയത് ഒരു ഗോൾ മാത്രം. ലോകകപ്പ് നേടിയ ഒരു ടീമിന്റെ ചരിത്രത്തിലെ ഏറ്റവും കുറഞ്ഞ ഗോൾ വഴങ്ങിയ പ്രകടനമാണിത്.
ഫൈനലിൽ നിലവിലെ ചാമ്പ്യന്മാരായ അർജന്റീനയെ അധികസമയത്തിന് ശേഷം 1-0ന് തോൽപ്പിച്ചാണ് സ്പെയിൻ രണ്ടാം ലോകകപ്പ് കിരീടം സ്വന്തമാക്കിയത്. 106-ാം മിനിറ്റിൽ പകരക്കാരനായി ഇറങ്ങിയ ഫെറാൻ ടോറസാണ് നിർണായക ഗോൾ നേടിയത്.
നിക്കോ വില്യംസിന്റെ ഹെഡർ അസിസ്റ്റിൽ നിന്നായിരുന്നു ടോറസിന്റെ വിജയഗോൾ. 12 മികച്ച സേവുകൾ നടത്തിയ അർജന്റീന ഗോൾകീപ്പർ എമിലിയാനോ മാർട്ടിനസിനും ആ ഗോൾ തടയാനായില്ല.
ഡെ ലാ ഫുവെന്റെ പരിശീലകനായതോടെ സ്പെയിൻ ഫിഫ ലോകകപ്പ് കിരീടത്തിനൊപ്പം യുവേഫ യൂറോ 2024 കിരീടവും സ്വന്തമാക്കി. ദേശീയ ടീമിന്റെ നേതൃത്വത്തിൽ മറ്റൊരു വലിയ നേട്ടം കൂടി അദ്ദേഹം ചേർത്തു.
ലോകകപ്പ് ഫൈനലിൽ സ്പെയിൻ താരം ലാമിൻ യമാലും പൗ കുബാർസിയും ശ്രദ്ധേയ റെക്കോർഡ് സ്വന്തമാക്കി. 19 വയസ്സുള്ള ഇരുവരും ലോകകപ്പ് ഫൈനലിൽ കളിച്ച നാലാമത്തെയും അഞ്ചാമത്തെയും കൗമാര താരങ്ങളായി.
ബ്രസീലിന്റെ പെലേ (1958), ഇറ്റലിയുടെ ജ്യൂസപ്പെ ബെർഗോമി (1982), ഫ്രാൻസിന്റെ കിലിയൻ എംബാപ്പെ (2018) എന്നിവരാണ് ഇതിന് മുമ്പ് ലോകകപ്പ് ഫൈനലിൽ കളിച്ച കൗമാര താരങ്ങൾ. ഇവർ അഞ്ചുപേരും ലോകകപ്പ് ജേതാക്കളായ ടീമിന്റെ ഭാഗമായിരുന്നു.
അതേസമയം അർജന്റീന നായകൻ ലയണൽ മെസിയും പുതിയ റെക്കോർഡ് സ്വന്തമാക്കി. 39 വയസും 25 ദിവസവും പ്രായമുള്ളപ്പോൾ ലോകകപ്പ് ഫൈനലിൽ കളിച്ച ഏറ്റവും പ്രായം കൂടിയ ഔട്ട്ഫീൽഡ് താരമായി മെസി മാറി.
1958 ലോകകപ്പ് ഫൈനലിൽ ബ്രസീലിനെതിരെ കളിച്ച സ്വീഡൻ താരം ഗുന്നാർ ഗ്രെന്റെ റെക്കോർഡാണ് മെസി മറികടന്നത്. മൂന്ന് ലോകകപ്പ് ഫൈനലുകളിൽ കളിച്ച രണ്ടാമത്തെ താരമായും മെസി മാറി. ബ്രസീൽ ഇതിഹാസം കഫുവിന് ശേഷം ഈ നേട്ടം സ്വന്തമാക്കുന്ന താരമാണ് മെസി
