ടൊറന്റോ: കാനഡയിലെ നയാഗ്ര ഹെൽത്ത് ഫൗണ്ടേഷന് ഇന്ത്യൻ കുടുംബം അര മില്യൺ ഡോളർ സംഭാവനയായി നൽകി. വിശ്വ ശർമ്മയും കമലേഷ് ശർമ്മയും അടങ്ങുന്ന കുടുംബമാണ് ഈ ജീവകാരുണ്യ പ്രവർത്തനം നടത്തിയത്.ഏകദേശം ആറ് പതിറ്റാണ്ടായി നയാഗ്ര സമൂഹത്തിന്റെ വളർച്ചയിൽ സജീവമായി ഇടപെടുന്ന കുടുംബമാണ് ശർമ കുടുംബം. 1960-കളുടെ അവസാനത്തിൽ നയാഗ്രയിലെത്തിയ വിശ്വയും കമലേഷ് ശർമയും കുടുംബജീവിതം കെട്ടിപ്പടുക്കുന്നതിനൊപ്പം സമൂഹസേവനത്തിലും ജീവകാരുണ്യ പ്രവർത്തനങ്ങളിലും സജീവമായി.
നയാഗ്രയിലെ ആദ്യ ഹിന്ദു ക്ഷേത്രം സ്ഥാപിക്കുന്നതിൽ ശർമ കുടുംബം നിർണായക പങ്കുവഹിച്ചതായും ഫൗണ്ടേഷൻ വ്യക്തമാക്കി. ദക്ഷിണേഷ്യൻ സമൂഹം മേഖലയിലെത്തുടക്ക ഘട്ടത്തിലായിരുന്ന കാലത്ത് ക്ഷേത്രം ആരാധനാലയം എന്നതിലുപരി സമൂഹത്തിന് ഒത്തുചേരാനും സാംസ്കാരിക പാരമ്പര്യം നിലനിർത്താനും കുടുംബങ്ങൾക്കും പുതുതായി എത്തിയവർക്കും പിന്തുണ നൽകാനുമുള്ള പ്രധാന കേന്ദ്രമായി മാറി.വർഷങ്ങളായി നയാഗ്രയിലെ വിവിധ സാമൂഹിക പദ്ധതികൾക്കും സംരംഭങ്ങൾക്കും കുടുംബം പിന്തുണ നൽകിയിട്ടുണ്ട്.
ആരോഗ്യപരിപാലന മേഖലയിലെ നിർണായക ആവശ്യങ്ങൾ നിറവേറ്റുന്നതിനും ആരോഗ്യസേവനങ്ങൾ, നവീകരണം, രോഗികളുടെ പരിചരണം എന്നിവ മെച്ചപ്പെടുത്തുന്നതിനുമാണ് പുതിയ സംഭാവന ഉപയോഗിക്കുക. നയാഗ്രയിലെ ജനങ്ങൾക്ക് മികച്ച ആരോഗ്യപരിചരണം സ്വന്തം പ്രദേശത്ത് തന്നെ ലഭ്യമാക്കുന്നതിനുള്ള പ്രവർത്തനങ്ങൾക്ക് ഇത് സഹായകരമാകും.
“നയാഗ്ര ഞങ്ങളുടെ കുടുംബത്തിന് നിരവധി സഹായങ്ങൾ നൽകി. ഇവിടെ തന്നെയാണ് ഞങ്ങൾ ജീവിതം കെട്ടിപ്പടുത്തതും മക്കളെ വളർത്തിയതും കുടുംബം വളരുന്നത് കണ്ടതും. ഞങ്ങൾക്ക് നൽകിയ സേവനങ്ങൾക്ക് തിരിച്ചുനൽകാനുള്ള ഒരു മാർഗമാണ് ആരോഗ്യപരിപാലന മേഖലയെ പിന്തുണയ്ക്കുന്നത്,” വിശ്വയും കമലേഷ് ശർമയും പറഞ്ഞു.
ശർമ കുടുംബത്തിന്റെ സംഭാവന നയാഗ്രയിലെ ആരോഗ്യരംഗത്ത് ദീർഘകാല സ്വാധീനം സൃഷ്ടിക്കുമെന്ന് നയാഗ്ര ഹെൽത്ത് ഫൗണ്ടേഷൻ പ്രസിഡന്റ് ആൻഡ്രിയ സ്കോട്ട് പറഞ്ഞു. ഏകദേശം 60 വർഷമായി കുടുംബം നയാഗ്ര ഫൗണ്ടേഷനിൽ നിക്ഷേപിക്കുകയും അതിന്റെ വളർച്ചയിൽ പങ്കാളികളാകുകയും ചെയ്തിട്ടുണ്ടെന്നും അവർ വ്യക്തമാക്കി.
