ഓട്ടവ : ബാങ്ക് ഓഫ് കാനഡ നയ പലിശ നിരക്ക് 2.25 ശതമാനത്തിൽ തുടരുന്നതിനിടെ, കാനഡയിലെ വിവിധ കാലാവധികളിലുള്ള ഗ്യാരണ്ടീഡ് ഇൻവെസ്റ്റ്മെന്റ് സർട്ടിഫിക്കറ്റ് (GIC) നിരക്കുകളിൽ വർധനവ് രേഖപ്പെടുത്തി. പലിശ നിരക്ക് മാറ്റമില്ലാതെ തുടരുന്ന സാഹചര്യത്തിലും നിക്ഷേപ വിപണിയിൽ GICകൾ കൂടുതൽ ആകർഷകമാകുന്ന സാഹചര്യമാണുള്ളത്.
കാനഡ ഗവൺമെന്റിന്റെ അഞ്ച് വർഷത്തെ ബെഞ്ച്മാർക്ക് യീൽഡ് ഓഗസ്റ്റ് അവസാനത്തെ 3.33 ശതമാനത്തിൽ നിന്ന് 3.44 ശതമാനമായി ഉയർന്നതോടെയാണ് നിക്ഷേപ നിരക്കുകളിലും മാറ്റമുണ്ടായത്. പ്രത്യേകിച്ച് ദീർഘകാല GICകളിലാണ് കൂടുതൽ ശ്രദ്ധേയമായ വർധനവ് ഉണ്ടായത്. ഉയർന്ന ഉറപ്പുള്ള വരുമാനം തേടുന്ന നിക്ഷേപകർക്ക് ഇത് കൂടുതൽ അവസരങ്ങൾ നൽകുന്നുണ്ട്.
എന്നാൽ, സേവിംഗ്സ് അക്കൗണ്ടുകളുടെ പലിശ നിരക്കുകളിൽ സമാനമായ വർധന ഉണ്ടായിട്ടില്ല. അതിനാൽ പണം സേവിംഗ്സ് അക്കൗണ്ടുകളിൽ മാത്രം സൂക്ഷിക്കുന്നവർക്ക് GIC നിരക്കുകളിലെ വർധനയുടെ പ്രയോജനം ലഭിക്കണമെന്നില്ല. അതേസമയം, പലിശ വരുമാനവും പണപ്പെരുപ്പ സാധ്യതകളും കണക്കിലെടുത്ത് നിക്ഷേപകർ അവരുടെ നിക്ഷേപങ്ങൾ വിവിധ വിഭാഗങ്ങളിലായി ക്രമീകരിക്കണമെന്ന് സാമ്പത്തിക വിദഗ്ധർ നിർദേശിക്കുന്നു.
