ടൊറന്റോ: ടൊറന്റോയിൽ നിന്ന് ബാരിയിലേക്കുള്ള ജി.ഒ ട്രെയിൻ യാത്രക്കാർക്ക് അടുത്ത രണ്ട് വാരാന്ത്യങ്ങളിൽ യാത്രാത്തടസ്സം നേരിടും. ട്രാക്ക് ഇരട്ടിപ്പിക്കലും സ്റ്റേഷൻ വികസനവും ഉൾപ്പെടെയുള്ള നിർമാണ പ്രവർത്തനങ്ങളുടെ ഭാഗമായി സെപ്റ്റംബർ 12, 13, 19, 20 തീയതികളിൽ ബാരി ലൈനിൽ ട്രെയിൻ സർവീസുകൾ ഭാഗികമായി റദ്ദാക്കുമെന്ന് മെട്രോലിങ്ക്സ് അറിയിച്ചു.
ഈ ദിവസങ്ങളിൽ അലൻഡേൽ വാട്ടർഫ്രണ്ട് സ്റ്റേഷൻ മുതൽ ഡൗൺസ്വ്യൂ പാർക്ക് വരെ മാത്രമായിരിക്കും ട്രെയിൻ സർവീസ്. ഡൗൺസ്വ്യൂ പാർക്കിനും ടൊറന്റോ യൂണിയൻ സ്റ്റേഷനും ഇടയിൽ ട്രെയിൻ സർവീസ് ഉണ്ടായിരിക്കില്ല.
യാത്രക്കാർക്ക് ബദൽ മാർഗങ്ങൾ
യൂണിയൻ സ്റ്റേഷനിലേക്കോ അവിടെനിന്നോ യാത്ര ചെയ്യുന്നവർക്ക് ടി.ടി.സി ലൈൻ 1 സബ്വേയും തുടർന്ന് ജി.ഒ ബസ് സർവീസുകളും ഉപയോഗിക്കാം. യാത്രക്കാർ യാത്ര പുറപ്പെടുന്നതിന് മുമ്പ് പുതിയ സമയക്രമവും ബദൽ യാത്രാമാർഗങ്ങളും പരിശോധിക്കണമെന്ന് അധികൃതർ നിർദേശിച്ചു.
സെപ്റ്റംബർ 14 മുതൽ 21 വരെയുള്ള സാധാരണ പ്രവൃത്തിദിവസങ്ങളിലും ബാരി ലൈനിലെ ട്രെയിൻ സമയങ്ങളിൽ ചെറിയ മാറ്റങ്ങളുണ്ടാകുമെന്ന് അധികൃതർ അറിയിച്ചു.
ട്രാക്ക് ഇരട്ടിപ്പിക്കൽ ഉൾപ്പെടെ വികസന പ്രവർത്തനങ്ങൾ
ബാരി ലൈനിൽ ട്രെയിനുകളുടെ എണ്ണവും വേഗതയും വർധിപ്പിക്കുന്നതിന്റെ ഭാഗമായാണ് രണ്ടാം ട്രാക്ക് നിർമിക്കുന്നത്. ഇതോടൊപ്പം മേപ്പിൾ, കിങ് സിറ്റി, അറോറ സ്റ്റേഷനുകളിലും നവീകരണ പ്രവർത്തനങ്ങൾ പുരോഗമിക്കും.
നിർമാണ പ്രവർത്തനങ്ങൾ പൂർത്തിയാകുന്നതോടെ സെപ്റ്റംബർ 22 മുതൽ ബാരി ലൈനിലെ ട്രെയിൻ സർവീസുകൾ സാധാരണ സമയക്രമത്തിലേക്ക് മടങ്ങുമെന്നാണ് അധികൃതരുടെ അറിയിപ്പ്. യാത്രക്കാർ അവസാന നിമിഷത്തെ ബുദ്ധിമുട്ടുകൾ ഒഴിവാക്കാൻ യാത്രാ വിവരങ്ങൾ മുൻകൂട്ടി പരിശോധിക്കണമെന്നും നിർദേശമുണ്ട്.
