ഡബ്ലിന്: ഉപയോക്താക്കളുടെ ലൊക്കേഷന് വിവരങ്ങള് അനധികൃതമായി ശേഖരിക്കുകയും ഉപയോഗിക്കുകയും ചെയ്ത സംഭവത്തില് പ്രമുഖ ടെക് ഭീമനായ ഗൂഗിളിന് 403 മില്യണ് യൂറോ (ഏകദേശം 3,700 കോടി രൂപ) പിഴ ചുമത്തി അയര്ലന്ഡിലെ ഡാറ്റ പ്രൊട്ടക്ഷന് കമ്മീഷന് (DPC). ഐറിഷ് വാച്ച്ഡോഗ് ഇതുവരെ ചുമത്തിയിട്ടുള്ളതില് വെച്ച് ഏറ്റവും വലിയ നാലാമത്തെ പിഴയാണിത്. നേരത്തെ സ്വകാര്യതാ ലംഘനങ്ങളുടെ പേരില് ടിക്ടോക്ക്, മെറ്റ തുടങ്ങിയ കമ്പനികള്ക്കെതിരെയും ഡിപിസി നടപടിയെടുത്തിരുന്നു. ഇതില് മെറ്റയ്ക്ക് 1.2 ബില്യണ് യൂറോയുടെ റെക്കോര്ഡ് പിഴയാണ് ചുമത്തിയത്.
യൂറോപ്യന് യൂണിയനിലെ വിവിധ ഉപഭോക്തൃ അവകാശ സംഘടനകളില് നിന്ന് ലഭിച്ച പരാതികളെ തുടര്ന്ന് 2020 ഫെബ്രുവരിയിലാണ് ഗൂഗിളിനെതിരെ അന്വേഷണം തുടങ്ങിയത്. ഗൂഗിളിന്റെ ‘വെബ് ആന്ഡ് ആപ്പ് ആക്റ്റിവിറ്റി’, ‘ലൊക്കേഷന് ഹിസ്റ്ററി’, ‘ലൊക്കേഷന് അക്യുറസി’ എന്നീ സംവിധാനങ്ങളിലൂടെ ഉപയോക്താക്കളുടെ വ്യക്തമായ അനുമതിയില്ലാതെ ലൊക്കേഷന് വിവരങ്ങള് ശേഖരിച്ചുവെന്നാണ് പ്രധാന കണ്ടെത്തല്. കൂടാതെ, ഇത്തരത്തില് ശേഖരിച്ച വിവരങ്ങള് ആവശ്യമില്ലാതെ കൂടുതല് കാലം സൂക്ഷിക്കുകയും ഡാറ്റ ഉപയോഗത്തില് സുതാര്യത പുലര്ത്താതിരിക്കുകയും ചെയ്തതായി ഡിപിസി വ്യക്തമാക്കി.
പരസ്യങ്ങള് ലക്ഷ്യമിടുന്നതിനും ഉപയോക്താക്കളുടെ താത്പര്യങ്ങള് മനസ്സിലാക്കുന്നതിനുമാണ് ഈ ലൊക്കേഷന് വിവരങ്ങള് ഉപയോഗിച്ചിരുന്നത്. എന്നാല് ഇതിനെക്കുറിച്ച് പല ഉപയോക്താക്കള്ക്കും വ്യക്തമായ ധാരണയുണ്ടായിരുന്നില്ല. പിഴ അടയ്ക്കുന്നതിന് പുറമെ, യൂറോപ്യന് യൂണിയന്റെ ജനറല് ഡാറ്റ പ്രൊട്ടക്ഷന് റഗുലേഷന് (GDPR) നിയമങ്ങള്ക്ക് അനുസൃതമായി ആറുമാസത്തിനകം ഡാറ്റാ നയങ്ങളില് ആവശ്യമായ മാറ്റങ്ങള് വരുത്താനും ഗൂഗിളിന് നിര്ദേശമുണ്ട്. ഗൂഗിളുമായി ബന്ധപ്പെട്ട മറ്റ് മൂന്ന് അന്വേഷണങ്ങള് കൂടി അന്തിമഘട്ടത്തിലാണെന്ന് അധികൃതര് അറിയിച്ചു.
അതേസമയം, അന്വേഷണത്തിന് അടിസ്ഥാനമായ പഴയ നയങ്ങള് 2019-ല് തന്നെ തിരുത്തിയിരുന്നുവെന്ന് ഗൂഗിള് വക്താവ് വ്യക്തമാക്കി. നിലവില് ഉപയോക്താക്കള്ക്ക് തങ്ങളുടെ ലൊക്കേഷന് വിവരങ്ങള് എളുപ്പത്തില് നിയന്ത്രിക്കാനും വിവരങ്ങള് സ്വയം ഇല്ലാതാക്കാനും (Auto-delete) സൗകര്യമുണ്ടെന്നും കമ്പനി പ്രതികരിച്ചു.
