ന്യൂയോര്ക്ക്: ഐക്യരാഷ്ട്രസഭാ രക്ഷാസമിതിയിലെ (UNSC) ഇന്ത്യയുടെ സ്ഥിരാംഗത്വത്തിനായുള്ള ശ്രമങ്ങള്ക്ക് ശക്തമായ പിന്തുണ പ്രഖ്യാപിച്ച് വിസെഗ്രാഡ് ഗ്രൂപ്പ് (V4) രാജ്യങ്ങള്. പോളണ്ട്, ഹംഗറി, സ്ലൊവാക്യ, ചെക്ക് റിപ്പബ്ലിക് എന്നീ മധ്യ യൂറോപ്യന് രാജ്യങ്ങളാണ് ഇന്ത്യയുടെ ആവശ്യത്തിന് ഒറ്റക്കെട്ടായി പിന്തുണ നല്കിയത്. യുഎന് പൊതുസമ്മേളനത്തോടനുബന്ധിച്ച് നടന്ന ചരിത്രപരമായ ആദ്യ ‘വി4-ഇന്ത്യ’ വിദേശകാര്യമന്ത്രിതല കൂടിക്കാഴ്ചയിലാണ് ഈ തീരുമാനം.
ഇന്തോ-പസഫിക് മേഖലയിലെ വളര്ന്നുവരുന്ന വന്ശക്തിയായ ഇന്ത്യ, യുഎന് രക്ഷാസമിതിയില് സ്ഥിരാംഗമായി വരണമെന്ന കാര്യത്തില് നാല് വി4 രാജ്യങ്ങള്ക്കും പൂര്ണ്ണ യോജിപ്പാണുള്ളതെന്ന് സ്ലൊവാക് വിദേശകാര്യമന്ത്രി യുറായ് ബ്ലാനാര് വ്യക്തമാക്കി. രക്ഷാസമിതി പുനഃസംഘടനയും സ്ഥിരാംഗത്വവും ലക്ഷ്യമിട്ട് നയതന്ത്ര നീക്കങ്ങള് നടത്തുന്ന ഇന്ത്യയ്ക്ക് യൂറോപ്യന് രാജ്യങ്ങളില് നിന്ന് ലഭിച്ച ഈ പിന്തുണ ഏറെ നിര്ണായകമാണ്.
രാഷ്ട്രീയ, സാമ്പത്തിക, സാങ്കേതിക, പ്രതിരോധ, സാംസ്കാരിക മേഖലകളില് സഹകരണം ശക്തമാക്കാന് ഇരുവിഭാഗവും ധാരണയിലെത്തി. കൂടാതെ ബഹിരാകാശം, ഗവേഷണം, വിദ്യാഭ്യാസം, ജനങ്ങള് തമ്മിലുള്ള ബന്ധം എന്നിവ വര്ധിപ്പിക്കുന്നതിനെക്കുറിച്ചും യോഗത്തില് വിശദമായ ചര്ച്ച നടന്നു.
വി4-ഇന്ത്യ വിദേശകാര്യമന്ത്രിമാരുടെ ഈ പ്രഥമ കൂടിക്കാഴ്ചയെ ‘ചരിത്രപരമായ നിമിഷം’ എന്നാണ് ഇന്ത്യന് വിദേശകാര്യമന്ത്രി എസ്. ജയശങ്കര് വിശേഷിപ്പിച്ചത്. സാങ്കേതികവിദ്യ, പ്രതിരോധം തുടങ്ങിയ മേഖലകളില് കൂടുതല് സഹകരണം ഉറപ്പാക്കുമെന്ന് അദ്ദേഹം പറഞ്ഞു. വി4 രാജ്യങ്ങളുമായി ഇന്ത്യയ്ക്ക് ദീര്ഘകാലത്തെ പ്രതിരോധ ചരിത്രബന്ധമുണ്ടെന്നും അത് കൂടുതല് ശക്തമാക്കി മുന്നോട്ട് കൊണ്ടുപോകുമെന്നും ജയശങ്കര് വ്യക്തമാക്കി.
