ഡൽഹി: പെട്രോൾ, ഡീസൽ വിൽപ്പനയ്ക്ക് സ്വകാര്യ ഇന്ധനവിൽപ്പന കമ്പനികൾ പരിധി ഏർപ്പെടുത്തുന്നത് അംഗീകരിക്കാനാകില്ലെന്ന് കേന്ദ്ര സർക്കാർ. ജിയോ-ബിപിയുടെയും നയാര എനർജിയുടെയും ചില പമ്പുകളിൽ ഡീസൽ വിൽപ്പനയ്ക്ക് നിയന്ത്രണം ഏർപ്പെടുത്തിയെന്ന റിപ്പോർട്ടുകൾക്ക് പിന്നാലെയാണ് കേന്ദ്രത്തിന്റെ മുന്നറിയിപ്പ്.
“ആർക്കും ഇന്ധന വിൽപ്പനയ്ക്ക് പരിധി ഏർപ്പെടുത്താൻ അനുമതിയില്ല” എന്ന് പെട്രോളിയം സെക്രട്ടറി നീരജ് മിത്തൽ വ്യക്തമാക്കി. ഏതെങ്കിലും കമ്പനികൾ ഇത്തരത്തിൽ നിയന്ത്രണം ഏർപ്പെടുത്തിയിട്ടുണ്ടെങ്കിൽ അവരുമായി ഇക്കാര്യം ചർച്ച ചെയ്യുമെന്നും അദ്ദേഹം പറഞ്ഞു. ഇതുസംബന്ധിച്ച് നേരത്തെയും കമ്പനികൾക്ക് നിർദേശങ്ങൾ നൽകിയിട്ടുണ്ടെന്നും സർക്കാർ നിലപാടിൽ മാറ്റമില്ലെന്നും മിത്തൽ വ്യക്തമാക്കി.
റിപ്പോർട്ടുകൾ പ്രകാരം ജിയോ-ബിപിയുടെ ചില ഔട്ട്‌ലെറ്റുകളിൽ ഒരു ഉപഭോക്താവിന് പ്രതിദിനം പരമാവധി 50 ലിറ്റർ ഡീസൽ മാത്രമാണ് നൽകുന്നത്. നയാര എനർജിയുടെ ചില പമ്പുകളിൽ 70 ലിറ്റർ മുതൽ 200 ലിറ്റർ വരെയാണ് വിൽപ്പന പരിധിയെന്നാണ് റിപ്പോർട്ടുകൾ.
റീട്ടെയിൽ ഡീസലും ബൾക്ക് ഡീസലും തമ്മിലുള്ള വില വ്യത്യാസമാണ് നിയന്ത്രണത്തിന് പിന്നിലെ പ്രധാന കാരണമെന്നാണ് റിപ്പോർട്ടുകൾ സൂചിപ്പിക്കുന്നത്. ചില ഘട്ടങ്ങളിൽ ബൾക്ക് ഉപഭോക്താക്കൾ നൽകുന്ന വിലയേക്കാൾ റീട്ടെയിൽ ഡീസലിന് ലിറ്ററിന് ഏകദേശം 50 രൂപ വരെ വിലക്കുറവുള്ള സാഹചര്യമുണ്ട്.
ഇതോടെ ഫാക്ടറികൾ, ടെലികോം കമ്പനികൾ, ഹോട്ടലുകൾ, ആശുപത്രികൾ തുടങ്ങിയ വലിയ ഉപഭോക്താക്കൾ ബൾക്ക് വിതരണ സംവിധാനത്തിന് പകരം സാധാരണ പെട്രോൾ പമ്പുകളിൽ നിന്ന് ഡീസൽ വാങ്ങാൻ ശ്രമിക്കുന്നതായി റിപ്പോർട്ടുകളുണ്ട്.
വലിയ തോതിൽ ഇങ്ങനെ വാങ്ങുന്നത് സ്വകാര്യ പമ്പുകളിലെ ഇന്ധന സ്റ്റോക്കിൽ സമ്മർദം സൃഷ്ടിക്കുന്നതിനൊപ്പം, നിലവിലെ വില സാഹചര്യത്തിൽ റീട്ടെയിൽ വിൽപ്പനയിലൂടെ കമ്പനികൾക്ക് നഷ്ടമുണ്ടാകുന്നതിനും കാരണമാകുന്നതായാണ് റിപ്പോർട്ടുകൾ.
