ആൽബെർട്ടയുടെ ഭാവി തീരുമാനിക്കേണ്ടത് ജനങ്ങൾ’; വിഘടന ചർച്ചയിൽ ഇടപെടരുതെന്ന് എലോൺ മസ്കിനോട് പ്രീമിയർ ഡാനിയേൽ സ്മിത്ത്

ആൽബർട്ടയുടെ വിഘടനവുമായി ബന്ധപ്പെട്ട ചർച്ചകൾക്കിടെ ശതകോടീശ്വരൻ എലോൺ മസ്കിന്റെ പരാമർശങ്ങൾക്കെതിരെ പ്രതികരണവുമായി പ്രീമിയർ ഡാനിയേൽ സ്മിത്ത്. ആൽബർട്ടയും സസ്കാച്ചെവാനും കാനഡയിൽനിന്ന് വേർപെട്ടുപോകുന്നതാണ് നല്ലതെന്ന മസ്കിന്റെ അഭിപ്രായമാണ് രാഷ്ട്രീയ വിവാദത്തിന് വഴിവെച്ചത്. ക്യൂബെക്കിലെ വിഘടനവാദ രാഷ്ട്രീയത്തെക്കുറിച്ചുള്ള ഒരു സാമൂഹികമാധ്യമ പോസ്റ്റിനോടുള്ള പ്രതികരണമായാണ് മസ്ക് ഇത്തരമൊരു അഭിപ്രായം പങ്കുവെച്ചതെന്നാണ് റിപ്പോർട്ട്.

ആൽബർട്ടയുടെ ഭാവി സംബന്ധിച്ച തീരുമാനങ്ങൾ എടുക്കേണ്ടത് ആ പ്രവിശ്യയിലെ ജനങ്ങളാണെന്നും പുറത്തുനിന്നുള്ള വ്യക്തികളുടെ അഭിപ്രായങ്ങൾ അതിൽ നിർണായകമാകരുതെന്നുമാണ് സ്മിത്തിന്റെ നിലപാട്. അമേരിക്കൻ ശതകോടീശ്വരനായ മസ്കിന്റെ പരാമർശങ്ങൾ പ്രവിശ്യയുടെ രാഷ്ട്രീയ ഭാവി നിർണയിക്കുന്നതിൽ യാതൊരു പങ്കും വഹിക്കേണ്ടതില്ലെന്ന സന്ദേശമാണ് അവരുടെ പ്രതികരണത്തിലൂടെ പുറത്തുവന്നത്.

കാനഡയിലെ ഫെഡറൽ സർക്കാരും ആൽബെർട്ടയിലെ ഭരണകൂടവും തമ്മിലുള്ള അധികാരത്തർക്കങ്ങളും ഊർജ നയം, സാമ്പത്തിക നിയന്ത്രണം, പ്രവിശ്യയുടെ സ്വയംഭരണം തുടങ്ങിയ വിഷയങ്ങളിലെ അഭിപ്രായവ്യത്യാസങ്ങളും വിഘടന ചർച്ചകൾക്ക് പശ്ചാത്തലമാകുന്നുണ്ട്. അതേസമയം, വിഘടനം സംബന്ധിച്ച രാഷ്ട്രീയ നിലപാടുകളും ജനഹിതവും കാനഡയുടെ ഭരണഘടനാ ചട്ടക്കൂടിനുള്ളിൽ പരിഗണിക്കേണ്ട വിഷയങ്ങളാണ്. മസ്കിന്റെ പരാമർശം ഈ വിഷയത്തെ വീണ്ടും പൊതുചർച്ചയിലേക്ക് കൊണ്ടുവന്നിരിക്കുകയാണ്.