ടൊറന്റോ: ടൊറന്റോ പിയേഴ്‌സൺ അന്താരാഷ്ട്ര വിമാനത്താവളത്തിൽനിന്ന് 2023ൽ 22 മില്യൺ ഡോളറിലധികം വിലമതിക്കുന്ന സ്വർണവും പണവും കവർന്ന കേസിൽ നിർണായക സാക്ഷി മൊഴി. കേസിൽ പ്രതിയായ പരംപാൽ സിദ്ധുവിന്റെ വിചാരണയിലാണ് കവർച്ചയിൽ പങ്കുണ്ടെന്ന് സമ്മതിച്ച അർസലാൻ ചൗധരി വീണ്ടും കോടതിയിൽ മൊഴി നൽകുന്നത്.
കവർച്ചയിൽ പങ്കെടുത്തതിന് കുറ്റസമ്മതം നടത്തിയ ചൗധരിക്ക് ഈ വർഷം നാല് വർഷത്തെ തടവുശിക്ഷ ലഭിച്ചിരുന്നു. കൂടാതെ, 22 മില്യൺ ഡോളർ നഷ്ടപരിഹാരമായി തിരിച്ചടയ്ക്കാൻ 40 വർഷത്തെ കാലാവധിയും കോടതി അനുവദിച്ചു.
കവർച്ച ആസൂത്രണം ചെയ്തതായി മൊഴി
ചൊവ്വാഴ്ച ബ്രാംപ്ടണിലെ കോടതിയിൽ മൊഴി നൽകിയ ചൗധരി, ഇപ്പോഴും പൊലീസ് തിരയുന്ന മറ്റൊരാളുമായി ചേർന്നാണ് കവർച്ച ആസൂത്രണം ചെയ്തതെന്ന് വെളിപ്പെടുത്തി. കവർച്ച ചെയ്ത സ്വർണത്തിൽ ഒരു ഔൺസ് വീതമുള്ള സ്വർണക്കട്ടികൾ നിറച്ച പെട്ടികളുടെ 30 ശതമാനം തനിക്ക് ലഭിച്ചതായും ഇയാൾ മൊഴി നൽകി.
2023 ഏപ്രിൽ 17നാണ് സ്വിറ്റ്‌സർലൻഡിൽനിന്ന് എത്തിയ സ്വർണവും കറൻസിയും വിമാനത്താവളത്തിലെ കാർഗോ വിഭാഗത്തിൽനിന്ന് മോഷണം പോയത്. 400 കിലോഗ്രാമിലധികം ഭാരമുള്ള 6,600 സ്വർണക്കട്ടികളാണ് കവർച്ച ചെയ്യപ്പെട്ടതെന്ന് പീൽ റീജനൽ പൊലീസ് നേരത്തേ അറിയിച്ചിരുന്നു.
എയർ കാനഡ ജീവനക്കാരനെതിരെ ആരോപണം
കവർച്ച നടന്ന സമയത്ത് എയർ കാനഡ ജീവനക്കാരനായിരുന്ന പരംപാൽ സിദ്ധു, വ്യാജമായി തിരുത്തിയ ചരക്കുനീക്ക രേഖ നൽകിയെന്നാണ് പ്രോസിക്യൂഷന്റെ ആരോപണം. ഈ രേഖ ഉപയോഗിച്ചാണ് മറ്റൊരാൾക്ക് വിമാനത്താവളത്തിലെ കാർഗോ കേന്ദ്രത്തിൽനിന്ന് 22 മില്യൺ ഡോളറിലധികം വിലമതിക്കുന്ന സ്വർണവും പണവും കൈപ്പറ്റാൻ കഴിഞ്ഞതെന്നാണ് അന്വേഷണസംഘത്തിന്റെ വാദം.
5,000 ഡോളറിലധികം മൂല്യമുള്ള മോഷണം, കുറ്റകരമായ ഗൂഢാലോചന എന്നീ കുറ്റങ്ങളാണ് സിദ്ധുവിനെതിരെ ചുമത്തിയിരിക്കുന്നത്. എന്നാൽ, ഇയാൾ കുറ്റങ്ങൾ നിഷേധിച്ചിട്ടുണ്ട്.
കേസുമായി ബന്ധപ്പെട്ട കൂടുതൽ വിവരങ്ങൾ ചൗധരിയുടെ തുടർസാക്ഷിമൊഴിയിലൂടെ പുറത്തുവരുമെന്നാണ് പ്രതീക്ഷിക്കുന്നത്. കവർച്ചയിൽ പങ്കെടുത്തതായി ആരോപിക്കപ്പെടുന്ന മറ്റൊരാൾക്കായി അധികൃതർ ഇപ്പോഴും തിരച്ചിൽ തുടരുകയാണ്.
