എഡ്മിന്റൻ: കാനഡയിൽ നിന്ന് വേർപിരിയണമോ എന്നതടക്കമുള്ള നിർണായക വിഷയങ്ങളിൽ ഒക്ടോബർ 19-ന് ഹിതപരിശോധന നടക്കാനിരിക്കെ, രാജ്യത്തിന്റെ ഐക്യത്തിനായി പ്രചാരണരംഗത്തിറങ്ങി പ്രധാനമന്ത്രി മാർക്ക് കാർണി. ആൽബർട്ടയിൽ നടക്കുന്ന ‘ഫോറെവർ കനേഡിയൻ’ പ്രസ്ഥാനത്തിന്റെ രണ്ട് റാലികളിൽ കാർണി പങ്കെടുക്കും. ഇന്ന് കാൽഗറിയിലും നാളെ എഡ്മിന്റണിലുമാണ് റാലികൾ.
ആൽബർട്ടയിലെ ഹിതപരിശോധനയ്ക്ക് മുന്നോടിയായി ഫോറെവർ കനേഡിയൻ പ്രസ്ഥാനത്തിന്റെ സ്ഥാപകൻ തോമസ് ലൂക്കാസുക്കാണ് കാർണിയെ റാലികളിലേക്ക് ക്ഷണിച്ചത്. ക്ഷണം സ്വീകരിച്ചതായി പ്രധാനമന്ത്രി അറിയിച്ചതോടെ കാനഡയുടെ ഐക്യത്തെ പിന്തുണയ്ക്കുന്ന പ്രസ്ഥാനത്തിന് പുതിയ രാഷ്ട്രീയ ശ്രദ്ധ ലഭിച്ചു.
10 വിഷയങ്ങളിൽ ഹിതപരിശോധന
ഒക്ടോബർ 19-ന് നടക്കുന്ന ഹിതപരിശോധനയിൽ ആൽബർട്ടക്കാർ 10 ചോദ്യങ്ങൾക്ക് മറുപടി നൽകും. കുടിയേറ്റം, ഭരണഘടനാ വിഷയങ്ങൾ എന്നിവയ്ക്കു പുറമേ കാനഡയിൽ തുടരണമോ അതോ രാജ്യത്തുനിന്ന് വേർപിരിയുന്നതുമായി ബന്ധപ്പെട്ട് നിർബന്ധിത ഹിതപരിശോധന നടത്തണമോ എന്നതും വോട്ടെടുപ്പിലെ പ്രധാന വിഷയമാണ്.
ആൽബർട്ടയിലെ ജനങ്ങളുടെ ആശങ്കകൾ പരിഹരിക്കാൻ ഫെഡറൽ സർക്കാരും പ്രവിശ്യാ സർക്കാരും സഹകരിക്കേണ്ടതുണ്ടെന്നാണ് ഫോറെവർ കനേഡിയൻ സ്ഥാപകൻ തോമസ് ലൂക്കാസുക്കിന്റെ നിലപാട്. വേർപിരിയൽ ഈ പ്രശ്നങ്ങൾക്കുള്ള പരിഹാരമല്ലെന്നും അദ്ദേഹം അഭിപ്രായപ്പെട്ടു.
സഹകരണത്തിലൂടെ പ്രശ്നപരിഹാരമെന്ന് കാർണി
ഫെഡറൽ സംവിധാനത്തിലൂടെ പരസ്പര സഹകരണവും ചർച്ചകളും വഴി പ്രശ്നങ്ങൾ പരിഹരിക്കാൻ കഴിയുമെന്ന സന്ദേശം കാർണിയുടെ സാന്നിധ്യത്തിലൂടെ ജനങ്ങളിലെത്തിക്കാനാണ് പ്രസ്ഥാനത്തിന്റെ ശ്രമം. ആൽബർട്ടയുടെ ആശങ്കകൾക്ക് പരിഹാരം കാണാൻ ഫെഡറൽ സർക്കാരിന് നടപടികൾ സ്വീകരിക്കാനാകുമെന്ന് ലൂക്കാസുക്ക് പറഞ്ഞു.
നേരത്തേ ആൽബർട്ടയിലെ ജനങ്ങളെ അഭിസംബോധന ചെയ്തുള്ള താങ്ക്സ്ഗിവിങ് സന്ദേശത്തിലും കാനഡയുടെ ഐക്യത്തിന്റെ പ്രാധാന്യം കാർണി ഉയർത്തിക്കാട്ടിയിരുന്നു. രാജ്യത്തിന്റെ സമ്പദ്‌വ്യവസ്ഥയ്ക്ക് വെല്ലുവിളികൾ നേരിടുന്നുണ്ടെങ്കിലും കാനഡ വളരുകയാണെന്നും രാജ്യത്തിന്റെ ഭാവിക്കായി പോരാടേണ്ടതുണ്ടെന്നും അദ്ദേഹം സന്ദേശത്തിൽ പറഞ്ഞു.
പിയർ പൊളിയേവും ഡാനിയേൽ സ്മിത്തും രംഗത്ത്
കാനഡയുടെ ഐക്യവുമായി ബന്ധപ്പെട്ട് കൺസർവേറ്റീവ് പാർട്ടി നേതാവ് പിയർ പൊളിയേവും നാളെ കാൽഗറിയിൽ നടക്കുന്ന പ്രത്യേക പരിപാടിയിൽ സന്ദേശം നൽകുമെന്നാണ് പ്രതീക്ഷിക്കുന്നത്. ആൽബർട്ട പ്രീമിയർ ഡാനിയേൽ സ്മിത്തും പരിപാടിയിൽ സംസാരിക്കും.
കാർണിയുടെ സന്ദർശനത്തെ അനുകൂലിച്ച ആൽബർട്ട പ്രീമിയറുടെ ഓഫീസ്, കാനഡയും ആൽബർട്ടയും തമ്മിലുള്ള സഹകരണം ശക്തമാകുന്നത് നല്ല സൂചനയാണെന്ന് പ്രതികരിച്ചു. ഊർജമേഖലയിലെ വികസനം, പസഫിക് ലിങ്ക് പൈപ്പ്‌ലൈൻ പദ്ധതി, ഭവനനിർമാണം, പ്രതിരോധം തുടങ്ങിയ വിഷയങ്ങളിൽ ഇരുസർക്കാരുകളും ഒരുമിച്ച് പ്രവർത്തിക്കുന്നുണ്ടെന്നും ഓഫീസ് വ്യക്തമാക്കി.
ആൽബർട്ടയുടെ താൽപര്യങ്ങൾ സംരക്ഷിക്കുന്നതിനൊപ്പം ഐക്യകാനഡയെ പിന്തുണയ്ക്കണമെന്ന് പ്രവിശ്യാ സർക്കാർ ജനങ്ങളോട് അഭ്യർഥിച്ചു. ഒക്ടോബർ 19-ലെ ഹിതപരിശോധന കാനഡയുടെ ഫെഡറൽ സംവിധാനത്തെയും ആൽബർട്ടയുടെ ഭാവിയെയും സംബന്ധിച്ച ചർച്ചകൾക്ക് കൂടുതൽ പ്രാധാന്യം നൽകുകയാണ്.
