ഓട്ടവ: കാനഡയിലെ മുതിര്‍ന്ന പൗരന്മാര്‍ക്കുള്ള ഓള്‍ഡ് ഏജ് സെക്യൂരിറ്റി (OAS) പെന്‍ഷന്‍ തുകയില്‍ കനേഡിയന്‍ സര്‍ക്കാര്‍ വര്‍ധന വരുത്തി. 1.4 ശതമാനം ത്രൈമാസ വര്‍ധനയോടെ ഒക്ടോബര്‍ മുതല്‍ ഡിസംബര്‍ വരെയുള്ള പാദത്തിലെ ആദ്യ ഗഡു 2026 ഒക്ടോബര്‍ 28 ബുധനാഴ്ച മുതല്‍ വിതരണം ചെയ്തു തുടങ്ങി. 2026 വര്‍ഷത്തിലെ ഏറ്റവും ഉയര്‍ന്ന ഒറ്റത്തവണ ത്രൈമാസ വര്‍ധനയാണിത്. ജൂലൈയിലെ 1.2 ശതമാനം വര്‍ധനയേക്കാള്‍ കൂടുതലാണിത്. 2025 ഒക്ടോബറിനെ അപേക്ഷിച്ച് ഒഎഎസ് തുകയില്‍ മൊത്തത്തില്‍ 3.0 ശതമാനം വാര്‍ഷിക വര്‍ധനയാണ് ഉണ്ടായിരിക്കുന്നത്.
ഈ പുതിയ വര്‍ധനയോടെ 65 മുതല്‍ 74 വയസ്സുവരെയുള്ളവര്‍ക്ക് മുന്‍പത്തെ 751.97 ഡോളറില്‍ നിന്ന് 10.53 ഡോളര്‍ വര്‍ധിപ്പിച്ച് പരമാവധി 762.50 ഡോളര്‍ പ്രതിമാസം ലഭിക്കും. 75 വയസ്സും അതില്‍ കൂടുതലുമുള്ളവര്‍ക്ക് 827.17 ഡോളറില്‍ നിന്ന് 11.58 ഡോളര്‍ വര്‍ധിച്ച് പരമാവധി 838.75 ഡോളറായി ഉയരും (75 വയസ്സിന് മുകളിലുള്ളവര്‍ക്ക് 2022 ജൂലൈയില്‍ നടപ്പിലാക്കിയ 10 ശതമാനം അധിക പെന്‍ഷന്‍ ആനുകൂല്യം ഇതില്‍ ഉള്‍പ്പെടുന്നു). ഒക്ടോബര്‍ 28, നവംബര്‍ 26, ഡിസംബര്‍ 22 തീയതികളിലെ മൂന്ന് പേയ്മെന്റുകളിലായി 65-74 പ്രായക്കാര്‍ക്ക് ആകെ 31.59 ഡോളറും, 75 വയസ്സിന് മുകളിലുള്ളവര്‍ക്ക് 34.74 ഡോളറും അധികമായി ലഭിക്കും. ക്രിസ്മസ് അവധികള്‍ പ്രമാണിച്ച് ഡിസംബറിലെ പേയ്മെന്റ് 22-ാം തീയതി തന്നെ വിതരണം ചെയ്യും.
പൂര്‍ണ്ണ പെന്‍ഷന്‍ തുക ലഭിക്കുന്നതിന് 18 വയസ്സിന് ശേഷം കുറഞ്ഞത് 40 വര്‍ഷമെങ്കിലും കാനഡയില്‍ താമസിച്ചിരിക്കണം. കുറഞ്ഞ സമയം താമസിച്ചവര്‍ക്ക് വസിച്ച വര്‍ഷങ്ങള്‍ക്ക് ആനുപാതികമായ ഭാഗിക പെന്‍ഷനാണ് ലഭിക്കുക. ഉദാഹരണത്തിന് 25 വര്‍ഷം താമസിച്ചവര്‍ക്ക് പ്രതിമാസം ഏകദേശം 476.56 ഡോളറും 10 വര്‍ഷം താമസിച്ചവര്‍ക്ക് 190.63 ഡോളറും ലഭിക്കും. 1.4 ശതമാനം വര്‍ധന ഭാഗിക പെന്‍ഷന്‍ വാങ്ങുന്നവര്‍ക്കും ആനുപാതികമായി ബാധകമാണ്.
അതേസമയം, ഉയര്‍ന്ന വരുമാനമുള്ള പെന്‍ഷന്‍കാരുടെ അറ്റ വരുമാനം നിശ്ചിത പരിധി കവിഞ്ഞാല്‍ 15 ശതമാനം നിരക്കില്‍ ഒഎഎസ് റിക്കവറി ടാക്‌സ് ബാധകമാകും. 2026 വരുമാന വര്‍ഷത്തില്‍ അറ്റ വരുമാനം 95,323 ഡോളര്‍ കടന്നാല്‍ റിക്കവറി ടാക്‌സ് ആരംഭിക്കും. 65-74 പ്രായക്കാര്‍ക്ക് വരുമാനം 155,320 ഡോളറിലും 75 വയസ്സിന് മുകളിലുള്ളവര്‍ക്ക് 161,320 ഡോളറിലും എത്തിയാല്‍ പെന്‍ഷന്‍ തുക പൂര്‍ണ്ണമായും തിരിച്ചെടുക്കും. നിലവില്‍ ഒക്ടോബര്‍ പേയ്മെന്റുകളില്‍ ഈടാക്കുന്ന നികുതി 2025-ലെ വരുമാനത്തെ (93,454 ഡോളര്‍ പരിധി) അടിസ്ഥാനമാക്കിയുള്ളതാണ്.
65 വയസ്സില്‍ പെന്‍ഷന്‍ വാങ്ങാതെ 70 വയസ്സുവരെ വൈകിപ്പിക്കുന്നവര്‍ക്ക് ഓരോ മാസത്തിനും 0.6 ശതമാനം വീതം പരമാവധി 36 ശതമാനം വരെ അധിക പെന്‍ഷന്‍ ലഭിക്കും. ഇതുവഴി 70 വയസ്സുവരെ പെന്‍ഷന്‍ വൈകിപ്പിച്ച് 40 വര്‍ഷത്തെ താമസവുമുള്ള ഒരാള്‍ക്ക് പുതിയ നിരക്കില്‍ പ്രതിമാസം ഏകദേശം 1,037 ഡോളര്‍ വരെ ലഭിക്കും. ഓള്‍ഡ് ഏജ് സെക്യൂരിറ്റി ആക്ട് പ്രകാരം ഉപഭോക്തൃ വില സൂചിക കുറഞ്ഞാലും പ്രസിദ്ധീകരിച്ച ഒഎഎസ് പെന്‍ഷന്‍ നിരക്കുകള്‍ കുറയ്ക്കില്ല എന്ന പണപ്പെരുപ്പ സംരക്ഷണവുമുണ്ട്.
കാനഡയില്‍ താമസിക്കുന്നവര്‍ക്ക് പെന്‍ഷന്‍ യോഗ്യത നേടാന്‍ 18 വയസ്സിന് ശേഷം കുറഞ്ഞത് 10 വര്‍ഷത്തെ വാസവും വിദേശത്ത് താമസിക്കുന്നവര്‍ക്ക് 20 വര്‍ഷത്തെ വാസവും ആവശ്യമാണ്. ഈ വര്‍ധന ലഭിക്കാന്‍ അപേക്ഷകര്‍ പ്രത്യേകം അപേക്ഷിക്കേണ്ടതില്ല, സര്‍വീസ് കാനഡ ഇത് സ്വയം പുതുക്കി നല്‍കും. മൈ സര്‍വീസ് കാനഡ അക്കൗണ്ട് (My Service Canada Account) വഴി പെന്‍ഷന്‍ തുക പരിശോധിക്കാവുന്നതാണ്.
