ടൊറന്റോ: കാനഡയിൽ ഈ വർഷത്തെ ഇൻഫ്ലുവൻസ (ഫ്ലൂ) സീസൺ പതിവിലും ഏഴ് ആഴ്ച മുമ്പേ ആരംഭിച്ചതായി ആരോഗ്യവിദഗ്ധർ. രോഗവ്യാപനം നേരത്തേയായെങ്കിലും കൃത്യമായ മുൻകരുതലുകളും വാക്സിനേഷനും വഴി ഗുരുതരമായ ആരോഗ്യപ്രശ്നങ്ങൾ ഒഴിവാക്കാനാകുമെന്ന് വിദഗ്ധർ വ്യക്തമാക്കി.
കഴിഞ്ഞ ആഴ്ചയിലെ പരിശോധനകളിൽ 6.1 ശതമാനം സാമ്പിളുകളിലാണ് ഫ്ലൂ സ്ഥിരീകരിച്ചത്. കഴിഞ്ഞ വർഷം ഇതേ കാലയളവിൽ രോഗസ്ഥിരീകരണ നിരക്ക് 0.8 ശതമാനമായിരുന്നു. ഫ്ലൂ വ്യാപനം സജീവമായതായി കണക്കാക്കുന്നതിനുള്ള അഞ്ച് ശതമാനം പരിധിയും ഇത്തവണ നേരത്തേ മറികടന്നു. കഴിഞ്ഞ വർഷം നവംബർ പകുതിയോടെയാണ് ഈ പരിധിയിലെത്തിയത്.
ഓസ്ട്രേലിയയിലെ ഫ്ലൂ സീസണും വ്യാപനത്തിന് കാരണമായേക്കാം
ഓസ്ട്രേലിയയിലെ ഫ്ലൂ സീസൺ വൈകി അവസാനിച്ചതും പസഫിക് തീരങ്ങളിലൂടെ വൈറസ് കാനഡയിലെത്തിയതും രോഗവ്യാപനം നേരത്തേ ആരംഭിക്കാൻ കാരണമായിരിക്കാമെന്നാണ് വിദഗ്ധരുടെ വിലയിരുത്തൽ.
ബ്രിട്ടീഷ് കൊളംബിയയിൽ സെപ്റ്റംബർ അവസാനത്തോടെ തന്നെ ഫ്ലൂ പരിശോധനകളിലെ പോസിറ്റിവിറ്റി നിരക്ക് 10 മുതൽ 15 ശതമാനം വരെയായി ഉയർന്നിരുന്നു. ഇത് രോഗവ്യാപനം നേരത്തേ ശക്തമായതിന്റെ സൂചനയായാണ് വിലയിരുത്തപ്പെടുന്നത്.
H1N1 വകഭേദം പ്രധാനമായും വ്യാപിക്കുന്നു
2009ലെ പന്നിപ്പനി മഹാമാരിക്ക് കാരണമായ H1N1 ഇൻഫ്ലുവൻസ വൈറസ് വകഭേദമാണ് നിലവിൽ പ്രധാനമായും വ്യാപിക്കുന്നതെന്നാണ് റിപ്പോർട്ട്. അമേരിക്കയിൽ ഈ വൈറസിൽ ചെറിയ ജനിതകമാറ്റം കണ്ടെത്തിയിട്ടുണ്ടെങ്കിലും കാനഡയിൽ നിലവിൽ വലിയ ആശങ്കയ്ക്ക് കാരണമാകുന്ന സാഹചര്യമില്ലെന്നാണ് വിദഗ്ധരുടെ വിലയിരുത്തൽ. എന്നാൽ രോഗബാധിതരുടെ എണ്ണം ഉയരാനുള്ള സാധ്യത കണക്കിലെടുത്ത് ജാഗ്രത തുടരണമെന്ന് ആരോഗ്യവിദഗ്ധർ നിർദേശിക്കുന്നു.
വാക്സിനേഷൻ പ്രധാന പ്രതിരോധമാർഗം
ഫ്ലൂ ബാധിച്ചാൽ രോഗതീവ്രത കുറയ്ക്കുന്നതിനും ആശുപത്രിയിൽ പ്രവേശിപ്പിക്കേണ്ട സാഹചര്യം ഒഴിവാക്കുന്നതിനും വാക്സിനേഷൻ സഹായിക്കുമെന്ന് ഡോക്ടർമാർ ചൂണ്ടിക്കാട്ടുന്നു. അതിനാൽ വാക്സിൻ എടുക്കാൻ മടിക്കരുതെന്നും ആരോഗ്യവിദഗ്ധർ ആവശ്യപ്പെടുന്നു.
കാനഡയിലെ വിവിധ പ്രവിശ്യകളിൽ ഒക്ടോബർ മുതൽ തന്നെ ഫ്ലൂ വാക്സിനേഷൻ ആരംഭിച്ചിട്ടുണ്ട്. വാക്സിനേഷനൊപ്പം കൈകൾ പതിവായി കഴുകുക, രോഗലക്ഷണങ്ങളുള്ളപ്പോൾ മറ്റുള്ളവരുമായുള്ള അടുത്ത സമ്പർക്കം പരിമിതപ്പെടുത്തുക തുടങ്ങിയ മുൻകരുതലുകളും സ്വീകരിക്കണം.
ഫ്ലൂ സീസൺ നേരത്തേ ആരംഭിച്ച സാഹചര്യത്തിൽ രോഗവ്യാപനത്തിന്റെ തോത് സൂക്ഷ്മമായി നിരീക്ഷിക്കുകയാണ് ആരോഗ്യവിഭാഗങ്ങൾ. വരും ആഴ്ചകളിലെ രോഗസ്ഥിരീകരണ നിരക്കുകളും ആശുപത്രിവാസ കണക്കുകളും വ്യാപനത്തിന്റെ ഗതി വിലയിരുത്തുന്നതിൽ നിർണായകമാകും.
