കാനഡയില്‍ ദയാവധ നിയമത്തില്‍ ഭേദഗതി; പുതിയ ബില്‍ ഇന്ന് പാര്‍ലമെന്റില്‍

ഓട്ടവ: കാനഡയിലെ ദയാവധ നിയമത്തില്‍ (Medical Assistance in Dying – MAID) നിര്‍ണായകമായ ഭേദഗതികള്‍ വരുത്തുന്നതിനുള്ള പുതിയ ബില്‍ ചൊവ്വാഴ്ച ഫെഡറല്‍ സര്‍ക്കാര്‍ പാര്‍ലമെന്റില്‍ അവതരിപ്പിക്കുന്നു. മാനസിക രോഗം മാത്രം അടിസ്ഥാനമാക്കി ദയാവധത്തിന് അപേക്ഷിക്കാനുള്ള വ്യവസ്ഥ അനിശ്ചിതകാലത്തേക്ക് ഒഴിവാക്കാനും, ഭാവിയില്‍ തീരുമാനമെടുക്കാനുള്ള ശേഷി നഷ്ടപ്പെടുമെന്ന ഭയമുള്ളവര്‍ക്ക് മുന്‍കൂട്ടി അനുമതിപത്രം (Advance Directives) നല്‍കാനുള്ള അവസരമൊരുക്കാനുമാണ് പുതിയ നിയമം വ്യവസ്ഥ ചെയ്യുന്നത്.

ഓട്ടവയില്‍ ആരോഗ്യ മന്ത്രി മാര്‍ജോറി മിഷെലിനൊപ്പം നടക്കുന്ന വാര്‍ത്താ സമ്മേളനത്തില്‍ ജസ്റ്റിസ് മിനിസ്റ്റര്‍ സീന്‍ ഫ്രേസര്‍ ഭേദഗതികളെക്കുറിച്ചുള്ള കൂടുതല്‍ വിവരങ്ങള്‍ പങ്കുവെക്കും. വാര്‍ത്താ സമ്മേളനത്തിന് മുന്നോടിയായി മുതിര്‍ന്ന സര്‍ക്കാര്‍ ഉദ്യോഗസ്ഥര്‍ മാധ്യമപ്രവര്‍ത്തകര്‍ക്ക് ബില്ലിന്റെ വിശദാംശങ്ങള്‍ വിശദീകരിച്ചു നല്‍കും.

മാനസിക രോഗം മാത്രം ഉളളവര്‍ക്ക് ദയാവധത്തിന് അനുമതി നല്‍കുന്നത് സംബന്ധിച്ച വ്യവസ്ഥ ക്രിമിനല്‍ കോഡില്‍ നിന്ന് ‘അനിശ്ചിതകാലത്തേക്ക് ഒഴിവാക്കാനാണ്’ സര്‍ക്കാര്‍ തീരുമാനിച്ചിരിക്കുന്നത്. വരാനിരിക്കുന്ന മാര്‍ച്ച് മാസത്തെ കാലാവധിക്ക് മുന്നോടിയായി, വിഷയത്തില്‍ എം.പിമാര്‍ നടത്തിയ വിശദമായ പഠനത്തിന്റെ അടിസ്ഥാനത്തിലാണ് ഈ തീരുമാനം. പാര്‍ലമെന്ററി കമ്മിറ്റിക്ക് മുന്നില്‍ ഹാജരായ ഭൂരിഭാഗം വിദഗ്ധരും മാനസിക രോഗത്തെ മാത്രം അടിസ്ഥാനമാക്കി ദയാവധം അനുവദിക്കുന്നതിനെ എതിര്‍ത്തിരുന്നു.

കഠിനവും സുഖപ്പെടുത്താനാവാത്തതുമായ അവസ്ഥയുള്ളവര്‍ക്കാണ് കാനഡയില്‍ നിലവില്‍ ദയാവധം അനുവദിക്കുന്നത്. എന്നാല്‍ മാനസിക രോഗങ്ങളുടെ കാര്യത്തില്‍ ഇത് കൃത്യമായി നിര്‍ണ്ണയിക്കുക എന്നത് അത്യന്തം വെല്ലുവിളി നിറഞ്ഞതാണെന്ന് വിദഗ്ധര്‍ ചൂണ്ടിക്കാണിക്കുന്നു. മുന്‍കൂട്ടിയുള്ള അനുമതിപത്രം (Advance Directives)അല്‍ഷിമേഴ്സ് അല്ലെങ്കില്‍ ഡിമെന്‍ഷ്യ പോലെയുള്ള രോഗങ്ങള്‍ കാരണം ഭാവിയില്‍ സ്വയം തീരുമാനമെടുക്കാനുള്ള ശേഷി (Capacity) നഷ്ടപ്പെടുമെന്ന് ഉറപ്പുള്ള വ്യക്തികള്‍ക്ക് മുന്‍കൂട്ടി ദയാവധത്തിനായി അപേക്ഷ നല്‍കാനുള്ള വ്യവസ്ഥയും പുതിയ ബില്ലിലുണ്ട്. എന്നാല്‍ ഈ ഫെഡറല്‍ നിയമനിര്‍മ്മാണം അതത് പ്രവിശ്യകളുടെ (ജൃീ്ശിരല)െ നിയമങ്ങള്‍ക്ക് വിധേയമായി മാത്രമായിരിക്കും നടപ്പിലാക്കുക എന്ന് മന്ത്രി വ്യക്തമാക്കിയിട്ടുണ്ട്.

2016 മുതല്‍ കാനഡയില്‍ ചില നിബന്ധനകളോടെ ദയാവധം പ്രാബല്യത്തിലുണ്ടെങ്കിലും, 2021-ല്‍ ഇതിന്റെ മാനദണ്ഡങ്ങളില്‍ ഭേദഗതികള്‍ വരുത്തിയിരുന്നു. എന്നാല്‍, നിലവിലുള്ള സുരക്ഷാ മാനദണ്ഡങ്ങള്‍ കൂടുതല്‍ സങ്കീര്‍ണ്ണമായ കേസുകളില്‍ പരാജയപ്പെടുന്നുവെന്ന ആശങ്കകള്‍ ഉയര്‍ന്നതോടെ കരുണാവധ നിയമം വീണ്ടും വിപുലീകരിക്കുന്നത് രാജ്യത്ത് വലിയ വിവാദങ്ങള്‍ക്ക് വഴിവെച്ചിട്ടുണ്ട്.