ടൊറന്റോ: അമേരിക്കയുമായുള്ള വ്യാപാര തർക്കങ്ങൾക്കല്ല, കനേഡിയൻ ജനതയുടെ സാമ്പത്തിക ക്ഷേമത്തിനും രാജ്യത്തിന്റെ ആഭ്യന്തര വികസനത്തിനുമാണ് 2026-ലെ ഫെഡറൽ ബജറ്റിൽ മുൻഗണന നൽകുന്നതെന്ന് ധനമന്ത്രി ഫ്രാൻസ്വാ-ഫിലിപ്പ് ഷാംപെയ്ൻ വ്യക്തമാക്കി. തിങ്കളാഴ്ച അവതരിപ്പിക്കാനിരിക്കുന്ന ബജറ്റ് രാജ്യത്തിന്റെ സാമ്പത്തിക ആവശ്യങ്ങൾ മുൻനിർത്തിയുള്ളതായിരിക്കുമെന്നും അദ്ദേഹം പറഞ്ഞു.
അമേരിക്കൻ പ്രസിഡന്റ് ഡൊണാൾഡ് ട്രംപ് അയോവയിൽ നടത്തിയ പ്രസ്താവനകൾക്ക് പിന്നാലെയാണ് ധനമന്ത്രിയുടെ പ്രതികരണം. കനേഡിയൻ പ്രധാനമന്ത്രി മാർക്ക് കാർണിയുമായി വ്യാപാര കരാറിന്റെ ചില ആശയങ്ങൾ ചർച്ച ചെയ്തിട്ടുണ്ടെന്നും, കീസ്റ്റോൺ എക്സ്എൽ പൈപ്പ്‌ലൈൻ പദ്ധതിയും അമേരിക്കയിലേക്കുള്ള കനേഡിയൻ ഡയറി ഉൽപ്പന്നങ്ങളുടെ ഇറക്കുമതിയും അതിൽ ഉൾപ്പെടാമെന്നും ട്രംപ് സൂചിപ്പിച്ചിരുന്നു.
എന്നാൽ അമേരിക്കയുമായുള്ള വ്യാപാര തർക്കങ്ങൾ മാത്രം മുൻനിർത്തിയല്ല കാനഡയുടെ സാമ്പത്തിക നയങ്ങൾ രൂപീകരിക്കുന്നതെന്ന് ഷാംപെയ്ൻ വ്യക്തമാക്കി. രാജ്യത്തെ തൊഴിലവസരങ്ങൾ വർധിപ്പിക്കുക, നിക്ഷേപം പ്രോത്സാഹിപ്പിക്കുക, ജീവിതച്ചെലവ് നിയന്ത്രിക്കുക, സാമ്പത്തിക സ്ഥിരത ഉറപ്പാക്കുക തുടങ്ങിയ ആഭ്യന്തര വിഷയങ്ങൾക്കായിരിക്കും ബജറ്റിൽ പ്രധാന പരിഗണനയെന്നും അദ്ദേഹം കൂട്ടിച്ചേർത്തു.
