ടൊറന്റോ: ടൊറന്റോയിലെ എറ്റോബിക്കോക്കിൽ ശനിയാഴ്ച വൈകുന്നേരമുണ്ടായ വെടിവെപ്പിൽ യുവാവ് കൊല്ലപ്പെട്ടു. രണ്ട് പ്രതികൾക്കായി ടൊറന്റോ പൊലീസ് തിരച്ചിൽ ആരംഭിച്ചു. കൊല്ലപ്പെട്ടയാളെ തിരിച്ചറിഞ്ഞിട്ടില്ല.
ശനിയാഴ്ച വൈകിട്ട് 4.30ന് തൊട്ടുമുമ്പാണ് റാത്ത്ബേൺ റോഡിനും ദി ഈസ്റ്റ് മാളിനും സമീപം വെടിവെപ്പുണ്ടായതായി പൊലീസിന് വിവരം ലഭിച്ചത്. സ്ഥലത്തെത്തിയ ഉദ്യോഗസ്ഥർ വെടിയേറ്റ നിലയിൽ യുവാവിനെ കണ്ടെത്തുകയായിരുന്നു.
ഗുരുതരമായി പരുക്കേറ്റ യുവാവിന് സ്ഥലത്തുവെച്ചുതന്നെ ജീവൻ രക്ഷിക്കാനുള്ള അടിയന്തര ചികിത്സ നൽകിയിരുന്നു. തുടർന്ന് ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ലെന്ന് പൊലീസ് ഇൻസ്പെക്ടർ ജെഫ് അലിങ്ടൺ അറിയിച്ചു.
പ്രതികൾക്കായി തിരച്ചിൽ ഊർജിതം
സംഭവത്തിൽ കുറഞ്ഞത് രണ്ട് പ്രതികളുണ്ടെന്നാണ് പൊലീസിന്റെ വിലയിരുത്തൽ. ഇരുണ്ട നിറത്തിലുള്ള വസ്ത്രങ്ങൾ ധരിച്ച നിലയിലാണ് ഇവരെ അവസാനമായി കണ്ടതെന്ന് പൊലീസ് അറിയിച്ചു.
സംഭവത്തിന്റെ സാഹചര്യങ്ങൾ അന്വേഷിക്കാൻ ടൊറന്റോ പൊലീസിന്റെ ഹോമിസൈഡ് വിഭാഗം അന്വേഷണം ഏറ്റെടുത്തിട്ടുണ്ട്. പ്രദേശത്തെ വീടുകളിലും സ്ഥാപനങ്ങളിലും നിരീക്ഷണം ശക്തമാക്കുമെന്നും കൂടുതൽ തെളിവുകൾ ശേഖരിക്കാൻ ഉദ്യോഗസ്ഥർ സ്ഥലത്തെത്തി പരിശോധന നടത്തുമെന്നും പൊലീസ് വ്യക്തമാക്കി.
സംഭവം പ്രദേശവാസികൾക്കും അവിടെ ജോലി ചെയ്യുന്നവർക്കും മാനസികമായി ആഘാതമുണ്ടാക്കുന്നതാണെന്ന് പൊലീസ് ഇൻസ്പെക്ടർ ജെഫ് അലിങ്ടൺ പറഞ്ഞു. അന്വേഷണം പ്രാരംഭഘട്ടത്തിലാണെന്നും പ്രതികളെ കണ്ടെത്താനുള്ള ശ്രമങ്ങൾ തുടരുകയാണെന്നും അദ്ദേഹം കൂട്ടിച്ചേർത്തു.
