ടെൽ അവീവ്: ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവിന്റെ ദീർഘകാല ഭരണത്തിന് വിരാമമിടാനുള്ള നീക്കങ്ങളുമായി പുതിയ പാർലമെന്റിൽ രാഷ്ട്രീയ നീക്കങ്ങൾ സജീവമായി. നെതന്യാഹു സർക്കാരിന്റെ വിവാദ നയങ്ങൾ തിരുത്തുമെന്നും രാജ്യത്ത് ഭരണപരമായ മാറ്റങ്ങൾ കൊണ്ടുവരുമെന്നും സർക്കാർ രൂപീകരിക്കാൻ നിയോഗിക്കപ്പെട്ട മുൻ സൈനിക മേധാവിയും യാഷർ പാർട്ടി അധ്യക്ഷനുമായ ഗാദി ഐസൻകോട്ട് പ്രഖ്യാപിച്ചു.
പുതിയ നെസറ്റിൽ നെതന്യാഹു വിരുദ്ധ കക്ഷികൾക്ക് വ്യക്തമായ ഭൂരിപക്ഷമുണ്ടെങ്കിലും ഐസൻകോട്ടിന് സഖ്യസർക്കാർ രൂപീകരിക്കാൻ കഴിയുമോയെന്ന കാര്യത്തിൽ അനിശ്ചിതത്വം തുടരുകയാണ്. 19 സീറ്റുകളുള്ള അറബ് പാർട്ടികളുടെ പിന്തുണ സ്വീകരിക്കുന്നതിനെ പ്രതിപക്ഷത്തെ ചില ജൂത പാർട്ടികൾ എതിർക്കുന്നതാണ് പ്രധാന വെല്ലുവിളി.
സർക്കാർ രൂപീകരിക്കാൻ ഐസൻകോട്ടിന് ആറാഴ്ചത്തെ സമയമാണ് അനുവദിച്ചിരിക്കുന്നത്. ഇതിനുമുമ്പ് പാർലമെന്റിന്റെ നിയന്ത്രണം ഉറപ്പാക്കാനുള്ള നീക്കങ്ങളും പ്രതിപക്ഷ സഖ്യം ആരംഭിച്ചിട്ടുണ്ട്. നെതന്യാഹുവിന്റെ പിന്തുണയുള്ള പാർലമെന്റ് സ്പീക്കർ അമീർ ഒഹാനയെ മാറ്റി യാഷർ നേതാവ് മതൻ കഹാനയെ ആ സ്ഥാനത്തേക്ക് നിർദേശിക്കാനുള്ള നടപടികളും പുരോഗമിക്കുകയാണ്.
ഐസൻകോട്ടിന് സർക്കാർ രൂപീകരിക്കാൻ കഴിയാത്ത സാഹചര്യമുണ്ടായാൽ പ്രസിഡന്റ് ഐസക് ഹെർസോഗ് നെതന്യാഹുവിന് വീണ്ടും അവസരം നൽകിയേക്കും. അതേസമയം, പുതിയ സർക്കാർ അധികാരത്തിലെത്തുന്നതുവരെ നെതന്യാഹു കാവൽ പ്രധാനമന്ത്രിയായി തുടരും.
ഒക്ടോബർ 7 ആക്രമണത്തിൽ ഔദ്യോഗിക അന്വേഷണം
2023 ഒക്ടോബർ 7-ന് ഹമാസ് നടത്തിയ ആക്രമണത്തിലേക്ക് നയിച്ച സുരക്ഷാ വീഴ്ചകൾ അന്വേഷിക്കാൻ ഔദ്യോഗിക അന്വേഷണ കമ്മിഷൻ രൂപീകരിക്കുകയാണ് ഐസൻകോട്ടിന്റെ പ്രധാന വാഗ്ദാനങ്ങളിലൊന്ന്. ആക്രമണം തടയുന്നതിൽ ഉണ്ടായ വീഴ്ചകൾക്കും അന്നത്തെ സർക്കാരിന്റെ ഉത്തരവാദിത്വത്തിനും പുറമെ സുരക്ഷാ സംവിധാനങ്ങളുടെ പ്രവർത്തനവും അന്വേഷണ പരിധിയിൽ കൊണ്ടുവരാനാണ് നീക്കം.
പ്രധാനമന്ത്രിക്ക് അധികാരത്തിൽ തുടരാവുന്ന കാലാവധിക്ക് നിയന്ത്രണം ഏർപ്പെടുത്തുന്നതിനുള്ള നിയമനിർമാണവും അജൻഡയിലുണ്ട്. ദീർഘകാലം ഒരേ വ്യക്തിയിൽ അധികാരം കേന്ദ്രീകരിക്കുന്നത് ഒഴിവാക്കുകയാണ് ഇതിന്റെ ലക്ഷ്യം.
നെതന്യാഹു സർക്കാർ കൊണ്ടുവന്ന ജുഡീഷ്യൽ പരിഷ്കാരങ്ങൾ പിൻവലിച്ച് കോടതികളുടെ സ്വതന്ത്രാധികാരം പുനഃസ്ഥാപിക്കുമെന്നും ഐസൻകോട്ട് വ്യക്തമാക്കിയിട്ടുണ്ട്.
അറബ് പാർട്ടികളുടെ പിന്തുണയിൽ രാഷ്ട്രീയ തർക്കം
വിശാലമായ രാഷ്ട്രീയ പങ്കാളിത്തത്തോടെയുള്ള സർക്കാർ രൂപീകരിക്കാനാണ് ഐസൻകോട്ടിന്റെ ശ്രമം. വോട്ട് ചെയ്തവരെയും ചെയ്യാത്തവരെയും ഉൾക്കൊള്ളുന്ന ഭരണസംവിധാനമാണ് ലക്ഷ്യമെന്നും ചില നിബന്ധനകൾക്ക് വിധേയമായി അറബ് പാർട്ടികളുടെ പിന്തുണയും പരിഗണിക്കാമെന്നും അദ്ദേഹം വ്യക്തമാക്കിയിട്ടുണ്ട്.
എന്നാൽ അറബ് പാർട്ടികളുടെ പിന്തുണ സ്വീകരിക്കുന്നതിനെ നെതന്യാഹു ശക്തമായി എതിർത്തു. ജൂതരാഷ്ട്രത്തിന്റെ നിലനിൽപ്പിനെ എതിർക്കുന്നവരുടെ പിന്തുണയിൽ സർക്കാർ രൂപീകരിക്കരുതെന്നാണ് അദ്ദേഹത്തിന്റെ നിലപാട്. ഇറാന്റെ ഭീഷണി നേരിടാൻ ജൂത പാർട്ടികൾ ഒന്നിച്ചുള്ള ഐക്യസർക്കാർ വേണമെന്നും നെതന്യാഹു ആവശ്യപ്പെട്ടു.
നെതന്യാഹുവിന്റെ പ്രസംഗം വിദ്വേഷവും ഭിന്നിപ്പും വളർത്തുന്നതാണെന്ന് ഐസൻകോട്ട് വിമർശിച്ചു. തുടർന്ന് ലികുഡ് പാർട്ടിയുമായി നിശ്ചയിച്ചിരുന്ന കൂടിക്കാഴ്ചയും അദ്ദേഹം റദ്ദാക്കി.
അറബ് പാർട്ടികളുടെ പിന്തുണ സംബന്ധിച്ച ഭിന്നതയും സർക്കാർ രൂപീകരണത്തിലെ അനിശ്ചിതത്വവും പുതിയ ഇസ്രയേൽ രാഷ്ട്രീയ സാഹചര്യത്തിൽ നിർണായകമാകുമെന്നാണ് വിലയിരുത്തൽ.
