മണ്‍ട്രിയോള്‍: അമേരിക്കന്‍ ഇടക്കാല തിരഞ്ഞെടുപ്പില്‍ ഡെമോക്രാറ്റുകള്‍ നേടിയ വന്‍ വിജയത്തിന് ശേഷം കാനഡ-അമേരിക്ക യാത്രകള്‍ വീണ്ടും സജീവമാകുന്നു. കാനഡയില്‍ നിന്നുള്ള വിനോദസഞ്ചാരികളുടെ അമേരിക്കയിലേക്കുള്ള ഒഴുക്ക് വര്‍ധിച്ചതായി വിദഗ്ധര്‍. വ്യാപാര യുദ്ധവും താരിഫ് ഭീഷണികളും സൃഷ്ടിച്ച തിരിച്ചടികളെ മറികടക്കാന്‍ ഈ രാഷ്ട്രീയ മാറ്റം സഹായകമാകുമെന്നാണ് പ്രതീക്ഷ.
സ്റ്റാറ്റിസ്റ്റിക്‌സ് കാനഡയുടെ പ്രാഥമിക കണക്കുകള്‍ പ്രകാരം ഒക്ടോബറില്‍ അമേരിക്കയില്‍ നിന്ന് മടങ്ങിയെത്തിയ കനേഡിയന്‍ സഞ്ചാരികളുടെ എണ്ണത്തില്‍ മുന്‍വര്‍ഷത്തെ അപേക്ഷിച്ച് മൂന്ന് ശതമാനം വര്‍ധനവുണ്ടായി. തുടര്‍ച്ചയായ ഏഴാം മാസമാണ് ഈ മേഖലയില്‍ വളര്‍ച്ച രേഖപ്പെടുത്തുന്നത്. എങ്കിലും വേനല്‍ക്കാലത്തും സെപ്റ്റംബറിലും കണ്ടതിനേക്കാള്‍ കുറഞ്ഞ വളര്‍ച്ചാ നിരക്കാണ് ഒക്ടോബറില്‍ രേഖപ്പെടുത്തിയത്. പ്രസിഡന്റ് ഡോണള്‍ഡ് ട്രംപിന്റെ പുതിയ താരിഫ് നടപടികളെയും പരാമര്‍ശങ്ങളെയും തുടര്‍ന്ന് ഫ്‌ലൈറ്റ് സെന്റര്‍ ട്രാവല്‍ ഗ്രൂപ്പ് കാനഡയില്‍ പുതിയ അവധിക്കാല ബുക്കിംഗുകള്‍ കഴിഞ്ഞ മാസം 26 ശതമാനം ഇടിഞ്ഞിരുന്നു.
എന്നാല്‍ നവംബര്‍ 3-ന് നടന്ന തിരഞ്ഞെടുപ്പില്‍ വൈറ്റ് ഹൗസ് നയങ്ങള്‍ക്കേറ്റ തിരിച്ചടിക്ക് പിന്നാലെ അമേരിക്കന്‍ യാത്രകളോട് വിമുഖത കാണിച്ചിരുന്ന സഞ്ചാരികള്‍ക്കിടയില്‍ ശുഭാപ്തിവിശ്വാസം ഉടലെടുത്തിട്ടുണ്ടെന്ന് ഫ്‌ലൈറ്റ് സെന്റര്‍ വക്താവ് അമ്ര ദുരാകോവിച്ച് പറഞ്ഞു. ഡെമോക്രാറ്റുകളുടെ വിജയം അമേരിക്കയിലേക്ക് യാത്ര ചെയ്യാന്‍ കൂടുതല്‍ ആത്മവിശ്വാസം നല്‍കുന്നതായി സഞ്ചാരികള്‍ പ്രതികരിക്കുന്നതായി ട്രാവല്‍ സെക്യൂര്‍ ഇന്‍ക് മേധാവി മാര്‍ട്ടി ഫയര്‍‌സ്റ്റോണും വ്യക്തമാക്കി.
അതേസമയം, 2024-ലെ കണക്കുകളുമായി താരതമ്യം ചെയ്യുമ്പോള്‍ കനേഡിയന്‍ സന്ദര്‍ശകരുടെ എണ്ണം ഇപ്പോഴും 27 ശതമാനം കുറവാണ്. ട്രംപ് രണ്ട് വര്‍ഷം കൂടി അധികാരത്തില്‍ തുടരുന്നതിനാല്‍ യാത്രാ മേഖലയില്‍ വലിയൊരു മാറ്റം ഇപ്പോള്‍ പ്രതീക്ഷിക്കാനാവില്ലെന്ന് ട്രിപ്പ്‌സെന്‍ട്രല്‍ മേധാവി റിച്ചാര്‍ഡ് വാന്‍ഡര്‍ലബ് അഭിപ്രായപ്പെട്ടു. ഉപഭോക്താക്കളുടെ എതിര്‍പ്പ് ഭയന്ന് പല ട്രാവല്‍ ഏജന്‍സികളും അമേരിക്കന്‍ ടൂര്‍ പാക്കേജുകള്‍ പ്രമോട്ട് ചെയ്യുന്നത് ഒഴിവാക്കുകയാണ്.
ഏവിയേഷന്‍ ഡാറ്റാ സ്ഥാപനമായ സിറിയത്തിന്റെ കണക്കുകള്‍ പ്രകാരം ഫ്‌ലോറിഡ, അരിസോണ, നെവാഡ, കാലിഫോര്‍ണിയ എന്നിവിടങ്ങളിലേക്കുള്ള കാനഡയില്‍ നിന്നുള്ള വിമാന സര്‍വീസുകള്‍ 2024 അവസാന പാദത്തേക്കാള്‍ 17 ശതമാനം കുറഞ്ഞു. എയര്‍ ട്രാന്‍സാറ്റ് കാനഡയ്ക്കും ഫ്‌ലോറിഡയ്ക്കും ഇടയില്‍ നടത്തിയിരുന്ന ആഴ്ചതോറുമുള്ള 36 വിമാന സര്‍വീസുകള്‍ പൂര്‍ണ്ണമായും നിര്‍ത്തലാക്കി.
അമേരിക്കന്‍ യാത്രകള്‍ ഒഴിവാക്കുന്ന കനേഡിയന്‍ സഞ്ചാരികള്‍ മെക്‌സിക്കോ, ഡൊമിനിക്കന്‍ റിപ്പബ്ലിക്, ജമൈക്ക, പോര്‍ച്ചുഗല്‍, സ്‌പെയിന്‍ എന്നീ രാജ്യങ്ങളിലേക്കാണ് ഇപ്പോള്‍ കൂടുതലായി തിരിയുന്നത്. എങ്കിലും കോര്‍പ്പറേറ്റ് യാത്രകളില്‍ കുറവുണ്ടായിട്ടില്ലെന്നും, അമേരിക്കയില്‍ സ്വന്തമായി വീടുകളുള്ളവരും ശൈത്യകാലം അവിടെ ചെലവഴിക്കുന്നവരുമായ സഞ്ചാരികള്‍ക്ക് അമേരിക്കയെ ആശ്രയിക്കാതെ മറ്റ് മാര്‍ഗ്ഗങ്ങളില്ലെന്നും വിദഗ്ധര്‍ ചൂണ്ടിക്കാട്ടുന്നു.
