വൻകൂവർ : പ്രൊവിൻഷ്യൽ നോമിനി പ്രോഗ്രാമിൽ സുപ്രധാന മാറ്റങ്ങൾ പ്രഖ്യാപിച്ച് ബ്രിട്ടിഷ് കൊളംബിയ സർക്കാർ. 2025-ൽ പ്രൊവിൻഷ്യൽ ഇമിഗ്രേഷൻ അലോക്കേഷൻ ഫെഡറൽ സർക്കാർ വെട്ടിക്കുറച്ചതോടെ ബ്രിട്ടിഷ് കൊളംബിയ പ്രൊവിൻഷ്യൽ നോമിനി പ്രോഗ്രാം (BC PNP) വഴിയുള്ള ചില നറുക്കെടുപ്പുകൾ താൽക്കാലികമായി നിർത്തുകയും നിരവധി സ്ട്രീമുകൾ അടയ്ക്കുകയും ചെയ്തതായി പ്രവിശ്യ സർക്കാർ അറിയിച്ചു. പ്രൊവിൻഷ്യൽ ഇമിഗ്രേഷൻ അലോക്കേഷൻ വെട്ടിക്കുറച്ചതോടെ പുതിയ അപേക്ഷകൾ ഫ്രണ്ട്-ലൈൻ ഹെൽത്ത് കെയർ വർക്കർമാർക്കും ഉയർന്ന സാമ്പത്തിക സ്വാധീനമുള്ള സംരംഭകർക്കും വിദഗ്ധ തൊഴിലാളികൾക്കും മാത്രമായി പരിമിതപ്പെടുത്താൻ പ്രവിശ്യ പദ്ധതിയിടുന്നു.
ഇതിന്‍റെ ഭാഗമായി 2024 സെപ്റ്റംബർ 1 നും 2025 ജനുവരി 7 നും ഇടയിൽ ലഭിച്ച ഇൻ്റർനാഷണൽ ബിരുദാനന്തര (IPG) അപേക്ഷകൾ പ്രോസസ്സ് ചെയ്യില്ലെന്നും എന്നാൽ അവ വെയിറ്റ്‌ലിസ്റ്റിൽ ഉൾപ്പെടുത്തുമെന്നും BC PNP അറിയിച്ചു. 2024-ലും 2025-ൻ്റെ തുടക്കത്തിലും ലഭിച്ച മറ്റെല്ലാ IPG അപേക്ഷകളും 2025-ൽ പ്രോസസ്സ് ചെയ്യും. ബ്രിട്ടിഷ് കൊളംബിയയുടെ അലോക്കേഷൻ ലെവലുകൾ പുനഃസ്ഥാപിക്കുന്നതുവരെ മൂന്ന് പുതിയ വിദ്യാർത്ഥി സ്ട്രീമുകൾ വഴിയുള്ള നറുക്കെടുപ്പുകൾ നടത്തില്ലെന്നും പ്രവിശ്യ പറയുന്നു. അതേസമയം PNP അതിൻ്റെ സംരംഭക സ്ട്രീമിന് കീഴിൽ സ്ഥിരതാമസത്തിനുള്ള ഇൻവിറ്റേഷൻ (ITAs) നൽകുന്നത് തുടരും.
ഹെൽത്ത് അതോറിറ്റി സ്ട്രീം ഇപ്പോൾ ഫ്രണ്ട്-ലൈൻ ഹെൽത്ത് കെയർ വർക്കർമാർക്ക് മാത്രമാക്കിയിട്ടുണ്ട്. കൂടാതെ ടാർഗെറ്റുചെയ്‌ത വിദ്യാഭ്യാസ നറുക്കെടുപ്പുകളിൽ ഇനി മുതൽ എർലി ചൈൽഡ്ഹുഡ് എഡ്യൂക്കേറ്റർ അസിസ്റ്റൻ്റുമാരെ ഉൾപ്പെടുത്തില്ല. പകരം ഈ നറുക്കെടുപ്പുകൾ എർലി ചൈൽഡ്ഹുഡ് എഡ്യൂക്കേറ്റർമാർക്ക് വേണ്ടി മാത്രമായിരിക്കും.
