ഓട്ടവ : താഴ്ന്ന വരുമാനക്കാരായ വ്യക്തികൾക്കും കുടുംബങ്ങൾക്കും സാമ്പത്തിക ആശ്വാസം നൽകുന്ന കാനഡ വർക്കേഴ്സ് ബെനിഫിറ്റ് (CWB) ഇന്ന് (ജൂലൈ 11) മുതൽ വിതരണം ചെയ്യുമെന്ന് കാനഡ റവന്യൂ ഏജൻസി (CRA) അറിയിച്ചു. കുറഞ്ഞ വരുമാനമുള്ള വ്യക്തികളെയും കുടുംബങ്ങളെയും സഹായിക്കാൻ ഉദ്ദേശിച്ചുള്ള റീഫണ്ട് ചെയ്യാവുന്ന നികുതി ആനുകൂല്യമാണ് CWB. അവിവാഹിതരായ തൊഴിലാളികൾക്ക് അവരുടെ വാർഷിക വരുമാനം 26,855 ഡോളറിൽ താഴെ ആണെങ്കിൽ 1,633 ഡോളർ വരെ ലഭിക്കും. കുടുംബങ്ങൾക്ക് അവരുടെ വാർഷിക വരുമാനത്തെ അടിസ്ഥാനമാക്കി മൊത്തം 2,813 ഡോളർ വരെ ലഭിക്കും. ഡിസെബിലിറ്റി സപ്ലിമെൻ്റ് വരുമാന പരിധി അടിസ്ഥാനമാക്കി യോഗ്യരായ വ്യക്തികൾക്കോ കുടുംബങ്ങൾക്കോ 843 ഡോളർ വരെയാണ് ലഭിക്കുക. 2025 ഒക്ടോബർ 10, 2026 ജനുവരി 9 എന്നീ തീയതികളിലാണ് അടുത്ത കാനഡ വർക്കേഴ്സ് ബെനിഫിറ്റ് വിതരണം ചെയ്യുക.
ഡിസംബർ 31-ന് 19 വയസോ അതിൽ കൂടുതലോ പ്രായമുള്ള ഒരു പങ്കാളിയോടോ പൊതു നിയമ പങ്കാളിയോടോ കുട്ടിയോടോ ഒപ്പം ജീവിക്കുന്നവർ കാനഡ വർക്കേഴ്സ് ബെനിഫിറ്റിന് അർഹരായിരിക്കും. ഇതിൽ രണ്ട് പ്രധാന ഘടകങ്ങൾ ഉൾപ്പെടുന്നു: അടിസ്ഥാന തുകയും ഡിസെബിലിറ്റി സപ്ലിമെൻ്റും. മറ്റൊരു കാര്യം 2024-ൽ അഡ്വാൻസ്ഡ് കാനഡ വർക്കേഴ്സ് ബെനിഫിറ്റ് (ACWB) പേയ്മെൻ്റുകൾ ലഭിച്ചിട്ടുണ്ടെങ്കിൽ, 2025-ലെ പേയ്മെൻ്റുകൾക്ക് സ്വയമേവ യോഗ്യത നേടും-വീണ്ടും അപേക്ഷിക്കേണ്ടതില്ല.
