എഡ്മിന്‍റൻ : ഹൗസ് ഓഫ് കോമൺസിലേക്ക് തിരിച്ചെത്താൻ ശ്രമിക്കുന്ന കൺസർവേറ്റീവ് പാർട്ടി ലീഡർ പിയേർ പൊളിയേവിന് തിരിച്ചടിയായി ആൽബർട്ട ബാറ്റിൽ റിവർ-ക്രോഫൂട്ട് ഉപതിരഞ്ഞെടുപ്പിൽ സ്ഥാനാർത്ഥികളുടെ എണ്ണം 200 കവിഞ്ഞു. ഓഗസ്റ്റിൽ നടക്കുന്ന ഉപതിരഞ്ഞെടുപ്പിൽ തിങ്കളാഴ്ച രാവിലെ സ്ഥിരീകരിച്ച സ്ഥാനാർത്ഥികളുടെ എണ്ണം 209 ആയതായി ഇലക്ഷൻസ് കാനഡ അറിയിച്ചു. അതേസമയം മത്സരരംഗത്തുള്ളവരിൽ ഭൂരിഭാഗവും സ്വതന്ത്രരാണ്. ഏപ്രിലിൽ നടന്ന ഫെഡറൽ തിരഞ്ഞെടുപ്പിൽ പിയേർ പൊളിയേവ് മത്സരിച്ച ഓട്ടവ കാൾട്ടൺ റൈഡിങ്ങിൽ അദ്ദേഹത്തിനെതിരെ 91 സ്ഥാനാർത്ഥികൾ മത്സരരംഗത്തുണ്ടായിരുന്നു.
എന്നാൽ, നിലവിൽ സ്ഥാനാർത്ഥി പട്ടികയിൽ ഉള്ളവരിൽ ഏഴു പേർക്ക് മാത്രമേ രാഷ്ട്രീയ പാർട്ടി അഫിലിയേഷൻ ഉള്ളൂ. ഓഗസ്റ്റ് 18-ലെ ഉപതിരഞ്ഞെടുപ്പിനുള്ള നാമനിർദ്ദേശങ്ങൾ തിങ്കളാഴ്ച അവസാനിക്കുകയാണ്. ബുധനാഴ്ച പൂർണ്ണമായ പട്ടിക ലഭ്യമാകുമെന്ന് തിരഞ്ഞെടുപ്പ് ഏജൻസി അറിയിച്ചു. മധ്യ-കിഴക്കൻ ആൽബർട്ടയിൽ സ്ഥിതി ചെയ്യുന്ന ഈ റൈഡിങ്ങിൽ കാംറോസ്, ഡ്രംഹെല്ലർ, വെയ്ൻറൈറ്റ് എന്നീ മുനിസിപ്പാലിറ്റികൾ ഉൾപ്പെടുന്നു. ഏകദേശം 52,600 ചതുരശ്ര കിലോമീറ്റർ വിസ്തൃതിയുള്ള റൈഡിങ്ങിൽ ഏകദേശം 84,515 വോട്ടർമാരാണുള്ളത്.
20 വർഷത്തിലേറെയായി ഓട്ടവ കാൾട്ടൺ റൈഡിങ്ങിനെ പ്രതിനിധീകരിച്ചിരുന്ന പിയേർ ലിബറൽ സ്ഥാനാർത്ഥിയായ ബ്രൂസ് ഫാൻജോയോട് നാലായിരത്തി മുന്നൂറിലധികം വോട്ടുകൾക്ക് പരാജയപ്പെട്ടിരുന്നു. തുടർന്ന് പൊളിയേവിന് ഹൗസ് ഓഫ് കോമൺസിലേക്ക് തിരിച്ചെത്താൻ അവസരം ഒരുക്കുന്നതിനായി, കൺസർവേറ്റീവ് എംപി ഡാമിയൻ കുറേക്ക് ആൽബർട്ടയിലെ ബാറ്റിൽ റിവർ–ക്രോഫൂട്ട് സീറ്റ് രാജിവെച്ചിരുന്നു.
