ഒന്റാരിയോ: 2023 ഓഗസ്റ്റില് കാനഡയിലെ ഒന്റാരിയോയിലുണ്ടായ ദാരുണമായ വാഹനാപകടത്തില് ഒളിമ്പിക് ഫിഗര് സ്കേറ്റിംഗ് താരം അലക്സാന്ഡ്ര പോള് കൊല്ലപ്പെട്ട സംഭവത്തില് പ്രതിയായ ട്രക്ക് ഡ്രൈവര് കുറ്റസമ്മതം നടത്തി. അംഗസ് സ്വദേശിയായ സുഖ്വീന്ദര് സിദ്ധു (31) ആണ് അപകടകരമായ രീതിയില് വാഹനമോടിച്ച് മരണത്തിനും ശാരീരിക പരുക്കുകള്ക്കും കാരണമായെന്ന കുറ്റം കോടതിയില് സമ്മതിച്ചത്. ചൊവ്വാഴ്ച രാവിലെ വെര്ച്വല് കോടതിയിലാണ് സിദ്ധു തന്റെ കുറ്റം ഏറ്റുപറഞ്ഞത്.
2023 ഓഗസ്റ്റ് 22-ന് മെലാന്ക്തണ് ടൗണ്ഷിപ്പിലെ കൗണ്ടി റോഡ് 124-ലായിരുന്നു നാടിനെ നടുക്കിയ ഈ അപകടം നടന്നത്. റോഡ് നിര്മ്മാണ പ്രവര്ത്തനങ്ങള് നടക്കുന്നതിനാല് വേഗത കുറയ്ക്കണമെന്ന കൃത്യമായ മുന്നറിയിപ്പുകള് അവഗണിച്ച സിദ്ധു, നിര്ത്തിയിട്ടിരുന്ന നിരനിരയായ വാഹനങ്ങളിലേക്ക് തന്റെ ട്രക്ക് ഓടിച്ചു കയറ്റുകയായിരുന്നു. മണിക്കൂറില് 60 കിലോമീറ്റര് വേഗത നിശ്ചയിച്ചിരുന്ന മേഖലയില് 102 മുതല് 108 കിലോമീറ്റര് വരെ വേഗതയിലാണ് ട്രക്ക് സഞ്ചരിച്ചിരുന്നതെന്ന് അന്വേഷണത്തില് വ്യക്തമായി. കൂടാതെ, അപകടസമയത്ത് സിദ്ധു തുടര്ച്ചയായി 26 മണിക്കൂര് ജോലിയിലായിരുന്നുവെന്ന ഞെട്ടിക്കുന്ന വിവരവും പ്രോസിക്യൂഷന് കോടതിയില് വെളിപ്പെടുത്തി.
ട്രക്ക് ആദ്യം ഇടിച്ചത് അലക്സാന്ഡ്ര പോള് ഓടിച്ചിരുന്ന കാഡിലാക് കാറിലായിരുന്നു. ആഘാതത്തില് കാര് റോഡരികിലെ തോട്ടിലേക്ക് തെറിച്ചു വീഴുകയും അലക്സാന്ഡ്ര സംഭവസ്ഥലത്തുതന്നെ മരിക്കുകയും ചെയ്തു. കാറിന്റെ പിന്സീറ്റിലുണ്ടായിരുന്ന അവരുടെ 10 മാസം പ്രായമുള്ള മകന് അത്ഭുതകരമായി രക്ഷപ്പെട്ടെങ്കിലും കുഞ്ഞിന്റെ കാലിന് ഒടിവുണ്ടായി. അപകടത്തില്പ്പെട്ട മറ്റ് വാഹനങ്ങളിലുണ്ടായിരുന്ന മൂന്ന് പേര്ക്ക് ഗുരുതരവും ജീവിതകാലം മുഴുവന് നീണ്ടുനില്ക്കുന്നതുമായ പരുക്കുകള് സംഭവിച്ചിട്ടുണ്ട്.
2014-ലെ സോച്ചി വിന്റര് ഒളിമ്പിക്സില് കാനഡയെ പ്രതിനിധീകരിച്ച ഐസ് ഡാന്സര് ആയിരുന്നു അലക്സാന്ഡ്ര പോള്. കായികരംഗത്തുനിന്ന് വിരമിച്ച ശേഷം അവര് ബാരിയില് അഭിഭാഷകയായി സേവനമനുഷ്ഠിച്ചു വരികയായിരുന്നു. കായിക ലോകത്തിന് വലിയ നഷ്ടമുണ്ടാക്കിയ ഈ സംഭവത്തില് പ്രതി കുറ്റസമ്മതം നടത്തിയതോടെ മൂന്നാഴ്ച നീണ്ടുനില്ക്കേണ്ടിയിരുന്ന വിചാരണ നടപടികള് ഒഴിവാക്കി. സിദ്ധുവിനുള്ള ശിക്ഷാ വിധി മേയ് പകുതിയോടെ കോടതി പ്രഖ്യാപിക്കും.
