ന്യൂഡല്ഹി: ഇന്ത്യയും അമേരിക്കയും തമ്മിലുള്ള പുതിയ വ്യാപാര കരാര് ഇന്ത്യ-റഷ്യ ബന്ധത്തെ ബാധിക്കില്ലെന്ന് റഷ്യന് ഡെപ്യൂട്ടി വിദേശകാര്യ മന്ത്രി സെര്ജി റിയാബ്കോവ് വ്യക്തമാക്കി. ഏറെ സാധ്യതകളുള്ള വലിയൊരു വ്യാപാരബന്ധമാണ് ഇന്ത്യയും റഷ്യയും തമ്മിലുള്ളതെന്നും ഇന്ത്യയ്ക്ക് എല്ലാ രാജ്യങ്ങളുമായും സന്തുലിതമായ ബന്ധം നിലനിര്ത്താനുള്ള കഴിവുണ്ടെന്ന് തങ്ങള്ക്ക് ഉറപ്പുണ്ടെന്നും അദ്ദേഹം പറഞ്ഞു. ന്യൂഡല്ഹിയില് നടക്കുന്ന ബ്രിക്സ് (BRICS) ഷെര്പ്പ യോഗത്തിനിടെയാണ് അദ്ദേഹം ഇക്കാര്യം വ്യക്തമാക്കിയത്.
അമേരിക്കയുമായുള്ള കരാര് ഇന്ത്യ-റഷ്യ ഉഭയകക്ഷി ഇടപെടലുകളില് യാതൊരുവിധ ബുദ്ധിമുട്ടുകളും പ്രശ്നങ്ങളും ഉണ്ടാക്കില്ലെന്നാണ് പ്രതീക്ഷിക്കുന്നതെന്ന് റിയാബ്കോവ് പറഞ്ഞു. അതേസമയം, താരിഫുകള് ഉയര്ത്തുന്നതും നിര്ബന്ധിത നടപടികള് സ്വീകരിക്കുന്നതും ഒരു രാജ്യം മാത്രം ആധിപത്യം സ്ഥാപിക്കാന് നടത്തുന്ന അസ്വീകാര്യമായ മാര്ഗങ്ങളാണെന്ന് അദ്ദേഹം അമേരിക്കയെ വിമര്ശിച്ചു. ബഹുരാഷ്ട്രവാദത്തില് വിശ്വസിക്കുന്ന രാജ്യങ്ങള് പരസ്പര സഹകരണത്തിലൂടെയും നേട്ടത്തിലൂടെയുമാണ് അഭിവൃദ്ധി പ്രാപിക്കേണ്ടതെന്നും അത്തരം രാജ്യങ്ങള് സ്വതന്ത്രമായ തീരുമാനങ്ങള് എടുക്കാന് പ്രാപ്തരായിരിക്കണമെന്നും അദ്ദേഹം കൂട്ടിച്ചേര്ത്തു.
ഇന്ത്യ-റഷ്യ ബന്ധത്തിന്റെ ഭാവി ഇരു രാജ്യങ്ങളെയും ആശ്രയിച്ചിരിക്കുന്നുവെന്ന് വ്യക്തമാക്കിയ അദ്ദേഹം, ഇന്ത്യ ആഗ്രഹിക്കുന്നിടത്തോളം സഹകരിക്കാന് റഷ്യ തയ്യാറാണെന്നും പറഞ്ഞു. യുക്രെയ്നില് നടക്കുന്ന യുദ്ധത്തെ വ്യാപാരവുമായി ബന്ധിപ്പിക്കുന്ന ഏതൊരു ശ്രമത്തെയും റഷ്യ പൂര്ണ്ണമായും നിരസിക്കുന്നു. ആധുനിക ലോകക്രമത്തില് രാഷ്ട്രീയ പ്രശ്നങ്ങള് രാഷ്ട്രീയമായി തന്നെ കൈകാര്യം ചെയ്യണമെന്നും അല്ലാതെ സാമ്പത്തിക ഭീഷണികളിലൂടെയോ സമ്മര്ദ്ദങ്ങളിലൂടെയോ ആകരുതെന്നും അദ്ദേഹം ഓര്മ്മിപ്പിച്ചു.
