കൊല്ക്കത്ത: ആരാധകര് കാത്തിരുന്ന ഐ.എസ്.എല് (ISL) പന്ത്രണ്ടാം സീസണ് നാളെ കൊല്ക്കത്തയില് തുടക്കം. മാസങ്ങള് നീണ്ട അനിശ്ചിതത്വങ്ങള്ക്കൊടുവില് ഫെബ്രുവരി 14 ശനിയാഴ്ച വൈകിട്ട് 5 മണിക്ക് സാള്ട്ട് ലേക്ക് സ്റ്റേഡിയത്തില് നടക്കുന്ന ഉദ്ഘാടന മത്സരത്തില് നിലവിലെ ചാമ്പ്യന്മാരായ മോഹന് ബഗാന് സൂപ്പര് ജയന്റ്സ് കേരള ബ്ലാസ്റ്റേഴ്സിനെ നേരിടും. ഇത്തവണ 14 ടീമുകളാണ് കിരീടപ്പോരാട്ടത്തിനായി അണിനിരക്കുന്നത്.
മുന് സീസണുകളില് നിന്ന് വ്യത്യസ്തമായി വലിയ മാറ്റങ്ങളുമായാണ് ഇത്തവണ ലീഗ് എത്തുന്നത്. ഐ ലീഗ് ചാമ്പ്യന്മാരായ ഇന്റര് കാശി (Inter Kashi) കൂടി ഉള്പ്പെട്ടതോടെ ടീമുകളുടെ എണ്ണം 14 ആയി ഉയര്ന്നു. സ്പോണ്സര്മാരുടെ അഭാവം മൂലമുണ്ടായ തടസ്സങ്ങള് കാരണം വൈകിയാരംഭിച്ച ടൂര്ണമെന്റ് ഇത്തവണ ഹോം-എവേ (Home and Away) രീതിയിലല്ല നടക്കുന്നത്. ടീമുകള് പരസ്പരം ഒരു തവണ മാത്രം ഏറ്റുമുട്ടുന്ന സിംഗിള് റൗണ്ട് റോബിന് (Single Round Robin) രീതിയാണിത്. ഓരോ ടീമിനും ആകെ 13 മത്സരങ്ങള് വീതമാകും ലഭിക്കുക. ഇത്തവണ പ്ലേ-ഓഫ്, എലിമിനേറ്റര്, ഫൈനല് എന്നീ ഘട്ടങ്ങള് ഉണ്ടാകില്ല. 91 മത്സരങ്ങള് പൂര്ത്തിയാകുമ്പോള് പോയിന്റ് പട്ടികയില് ഒന്നാമത് എത്തുന്നവര് നേരിട്ട് ചാമ്പ്യന്മാരായി പ്രഖ്യാപിക്കപ്പെടും.
കേരള ബ്ലാസ്റ്റേഴ്സിനെ സംബന്ധിച്ചിടത്തോളം വലിയൊരു മാറ്റത്തിന്റെ സീസണാണിത്. ആരാധകരുടെ പ്രിയതാരങ്ങളായ അഡ്രിയാന് ലൂണയും നോവ സദോയിയും ഇത്തവണ ടീമിനൊപ്പമില്ല. പകരം വിക്ടര് ബെര്ട്ടോമിയു (Victor Bertomeu), ഉമര് ബാഹ് (Oumar Bah) തുടങ്ങിയ പുതിയ വിദേശ താരങ്ങളുമായാണ് ബ്ലാസ്റ്റേഴ്സ് ഇറങ്ങുന്നത്. ഉദ്ഘാടന മത്സരത്തിന് ശേഷം കൊച്ചിയിലെ കലൂര് സ്റ്റേഡിയത്തില് നടക്കുന്ന ആദ്യ ഹോം മാച്ച് ഫെബ്രുവരി 22-ന് മുംബൈ സിറ്റിക്കെതിരെയാണ്. മുംബൈക്ക് പുറമെ നോര്ത്ത് ഈസ്റ്റ് യുണൈറ്റഡ്, പഞ്ചാബ് എഫ്.സി, എഫ്.സി ഗോവ തുടങ്ങിയ ടീമുകളുമായുള്ള മത്സരങ്ങളും കൊച്ചിയില് വെച്ചാണ് നടക്കുക.
