മൺട്രിയോൾ: കെബെക്കിലെ ഷിക്കോട്ടിമി ഉപതിരഞ്ഞെടുപ്പിൽ പാർട്ടി കെബെക്ക്വ (പിക്യു) ഉജ്ജ്വല വിജയം കരസ്ഥമാക്കി. പ്രവിശ്യാ പൊതുതിരഞ്ഞെടുപ്പിന് എട്ട് മാസങ്ങൾ മാത്രം ബാക്കിനിൽക്കെ പാർട്ടി തുടർച്ചയായി നേടുന്ന നാലാമത്തെ ഉപതിരഞ്ഞെടുപ്പ് വിജയമാണിത്. 142 പോളിങ് സ്റ്റേഷനുകളിലെയും ഫലം പുറത്തുവന്നപ്പോൾ പിക്യു സ്ഥാനാർത്ഥി മേരി-കാർലിൻ ലാഫ്ലാം 45 ശതമാനത്തിലധികം വോട്ടുകൾ നേടിയാണ് വിജയിച്ചത്. കൺസർവേറ്റീവ് പാർട്ടി സ്ഥാനാർത്ഥി കാതറിൻ മോറിസെറ്റിന് 26 ശതമാനം വോട്ടുകൾ മാത്രമാണ് ലഭിച്ചത്.
യൂണിവേഴ്സിറ്റി ഡു കെബെക് ഡെ ഷിക്കോട്ടിമിയിലെ മുൻ വൈസ് റെക്ടറായ ലാഫ്ലാം തന്റെ വിജയത്തിന് ശേഷം പ്രവർത്തകരെ അഭിസംബോധന ചെയ്തു. ഭരണരീതിയിൽ മാറ്റം വരുത്തേണ്ട സമയം അതിക്രമിച്ചിരിക്കുന്നു എന്ന സന്ദേശമാണ് ഈ വിജയത്തിലൂടെ ഷിക്കോട്ടിമി കെബെക്കിന് നൽകുന്നതെന്ന് അവർ പറഞ്ഞു. വർഷങ്ങളോളം പാർട്ടി കെബെക്വായുടെ കോട്ടയായിരുന്ന ഈ മണ്ഡലം 2018-ലും 2022-ലും കോളിഷൻ അവെനിർ കെബെക്ക് (CAQ) പിടിച്ചെടുത്തിരുന്നു. മുൻ മന്ത്രി ആൻഡ്രി ലാഫോറസ്റ്റ് കഴിഞ്ഞ സെപ്റ്റംബറിൽ സജീവ രാഷ്ട്രീയം വിട്ടതിനെത്തുടർന്നാണ് റൈഡിങ്ങിൽ തിരഞ്ഞെടുപ്പിന് കളമൊരുങ്ങിയത്.
