സെന്റ് ജോൺസ് : കനത്ത മഞ്ഞുവീഴ്ചയെത്തുടർന്ന് മൂന്ന് ദിവസമായി അടച്ചിട്ടിരുന്ന സെന്റ് ജോൺസ് മേഖലയിലെ സ്കൂളുകൾ ഇന്ന് മുതൽ വീണ്ടും പ്രവർത്തനമാരംഭിക്കും. ഏകദേശം 100 സെന്റിമീറ്ററിലധികം മഞ്ഞ് വീണതിനെത്തുടർന്ന് തടസ്സപ്പെട്ട ഗതാഗത സംവിധാനങ്ങൾ പുനഃസ്ഥാപിച്ചതായും സ്കൂൾ ബസ്സുകൾ സാധാരണ സമയക്രമത്തിൽ സർവീസ് നടത്തുമെന്നും എൻഎൽ സ്കൂൾസ് അറിയിച്ചു. റോഡുകളിലെ മഞ്ഞ് നീക്കം ചെയ്യുന്ന പ്രവൃത്തികൾ പൂർത്തിയായതോടെയാണ് സ്കൂളുകൾ തുറക്കാൻ തീരുമാനമായത്. കുട്ടികൾ ബസ് സ്റ്റോപ്പുകൾക്കോ റോഡുകൾക്കോ സമീപമുള്ള മഞ്ഞുകൂനകളിൽ കളിക്കരുതെന്നും യാത്രയിൽ ജാഗ്രത പാലിക്കണമെന്നും അധികൃതർ മാതാപിതാക്കൾക്ക് നിർദ്ദേശം നൽകി.
സ്കൂളുകൾ ദീർഘനാൾ അടച്ചിട്ടത് മാതാപിതാക്കൾക്കിടയിൽ വലിയ ചർച്ചകൾക്ക് വഴിവെച്ചിട്ടുണ്ട്. കാലാവസ്ഥ മെച്ചപ്പെട്ടിട്ടും ബുധനാഴ്ച സ്കൂളുകൾ തുറക്കാത്തത് ഉദ്യോഗസ്ഥരായ മാതാപിതാക്കൾക്ക് പ്രതിസന്ധി സൃഷ്ടിച്ചിരുന്നു. എന്നാൽ, സുരക്ഷാ മുൻകരുതലിന്റെ ഭാഗമായാണ് ഈ തീരുമാനമെന്നും 2020-ലെ ‘സ്നോമഗെഡൻ’ പോലുള്ള അതീവ ഗുരുതരമായ സാഹചര്യമില്ലെന്നും വിദ്യാഭ്യാസ മന്ത്രി പോൾ ഡിൻ വ്യക്തമാക്കി.
