മുബൈ: പശ്ചിമേഷ്യയിലെ സംഘര്ഷങ്ങളും ആഗോള വിപണിയില് അസംസ്കൃത എണ്ണവില കുതിച്ചുയരുന്നതും ഇന്ത്യന് ഓഹരി വിപണിയെ കനത്ത തകര്ച്ചയിലേക്ക് നയിച്ചു. വ്യാഴാഴ്ച വ്യാപാരം ആരംഭിച്ചയുടനെ സെന്സെക്സ് 900 പോയിന്റോളം ഇടിഞ്ഞ് 75,921 നിലവാരത്തിലെത്തിയപ്പോള്, നിഫ്റ്റി 50 സൂചിക നിര്ണ്ണായകമായ 23,600 പോയിന്റിന് താഴേക്ക് പതിച്ചു. വിപണിയിലെ ഭയത്തെ സൂചിപ്പിക്കുന്ന വോളട്ടിലിറ്റി ഇന്ഡക്സ് (VIX) ആറ് ശതമാനം വര്ധിച്ച് 22.3 എന്ന നിലയിലെത്തിയത് വരും ദിവസങ്ങളിലും വിപണിയില് വലിയ ചാഞ്ചാട്ടമുണ്ടാകുമെന്നതിന്റെ സൂചനയാണ്. മിഡ്ക്യാപ്, സ്മോള്ക്യാപ് സൂചികകള് 1.5 ശതമാനം വരെ ഇടിഞ്ഞത് വിപണിയില് വ്യാപകമായ വില്പന സമ്മര്ദ്ദമുണ്ടെന്ന് വ്യക്തമാക്കുന്നു.
ഇറാന്-ഇസ്രയേല്-അമേരിക്ക സംഘര്ഷം മൂലം എണ്ണ വിതരണ ശൃംഖല തടസ്സപ്പെടുമെന്ന ആശങ്കയാണ് നിക്ഷേപകരെ പിന്വാങ്ങാന് പ്രേരിപ്പിക്കുന്നത്. എണ്ണവില വര്ധിക്കുന്നത് പണപ്പെരുപ്പം ഉയര്ത്തുമെന്നതും ഇന്ത്യന് വിപണിക്ക് തിരിച്ചടിയായി. സാങ്കേതികമായി പരിശോധിക്കുമ്പോള് നിഫ്റ്റി നിലവില് ഒരു ഡിസെന്ഡിങ് ചാനലിനുള്ളിലാണ് വ്യാപാരം നടത്തുന്നത്. 23,700-23,740 എന്ന സപ്പോര്ട്ട് സോണ് നിലനിര്ത്താന് വിപണി പരാജയപ്പെട്ടാല് സൂചിക 23,300 നിലവാരത്തിലേക്ക് കൂടുതല് കൂപ്പുകുത്താന് സാധ്യതയുണ്ട്. എന്നാല് 23,700-ന് മുകളില് തുടരാനായാല് 24,140 എന്ന പ്രതിരോധ മേഖലയിലേക്ക് ഒരു തിരിച്ചു വരവ് പ്രതീക്ഷിക്കാം.
ബാങ്കിങ്, ഓട്ടോമൊബൈല് മേഖലകളിലാണ് ഇന്ന് ഏറ്റവും വലിയ തകര്ച്ച ദൃശ്യമായത്. ടാറ്റ മോട്ടോഴ്സ്, മഹീന്ദ്ര & മഹീന്ദ്ര തുടങ്ങിയ പ്രമുഖ ഓഹരികള് 4.5 ശതമാനം വരെ ഇടിഞ്ഞു. ബാങ്കിങ്, എന്ബിഎഫ്സി വിഭാഗങ്ങളിലും ഒരു ശതമാനത്തിലധികം ഇടിവുണ്ടായി. അതേസമയം, ആഗോളതലത്തില് എണ്ണവില വര്ദ്ധിക്കുന്നത് ഓയില് ആന്റ് ഗ്യാസ്, പവര് മേഖലകളിലെ ഓഹരികള്ക്ക് നേട്ടമായി. റിലയന്സ് ഇന്ഡസ്ട്രീസ്, കോള് ഇന്ത്യ തുടങ്ങിയ ഓഹരികള് വിപണിയിലെ പൊതുവായ തകര്ച്ചയ്ക്കിടയിലും നേരിയ ലാഭത്തില് വ്യാപാരം തുടരുന്നത് നിക്ഷേപകര്ക്ക് ആശ്വാസമായി.
പശ്ചിമേഷ്യന് സംഘര്ഷത്തെത്തുടര്ന്ന് രാജ്യത്ത് വാണിജ്യ ആവശ്യത്തിനുള്ള എല്പിജി ക്ഷാമം നേരിടാന് സാധ്യതയുണ്ടെന്ന വാര്ത്തകള് ഭക്ഷ്യവിതരണ മേഖലയെയും ബാധിച്ചു. സൊമാറ്റോ (എറ്റേണല്) ഓഹരികള് നാല് ശതമാനവും സ്വിഗ്ഗി 2.2 ശതമാനവും ഇടിവ് രേഖപ്പെടുത്തി. പാചകവാതക ക്ഷാമം മൂലം റെസ്റ്റോറന്റുകളുടെ പ്രവര്ത്തനം തടസ്സപ്പെട്ടാല് അത് ഫുഡ് ഡെലിവറി പ്ലാറ്റ്ഫോമുകളുടെ വരുമാനത്തെ നേരിട്ട് ബാധിക്കുമെന്ന ആശങ്കയിലാണ് നിക്ഷേപകര്. ഹ്രസ്വകാലത്തേക്ക് വിപണിയുടെ ട്രെന്ഡ് നെഗറ്റീവ് ആയി തുടരാനാണ് സാധ്യതയെന്ന് വിപണി വിദഗ്ധര് വിലയിരുത്തുന്നു.
