മൺട്രിയോൾ: പ്രീമിയർ ഫ്രാൻസ്വ ലെഗോൾട്ട് പദവി ഒഴിയുന്നതിനെത്തുടർന്ന് കെബെക്കിന്റെ അടുത്ത ഭരണാധികാരിയെ കണ്ടെത്താനുള്ള രാഷ്ട്രീയ നീക്കങ്ങൾ അവസാന ഘട്ടത്തിലേക്ക്. ഭരണകക്ഷിയായ Coalition Avenir Quebec (CAQ) ഈ ഞായറാഴ്ച തങ്ങളുടെ പുതിയ നേതാവിനെ പ്രഖ്യാപിക്കും. പുതിയ പാർട്ടി നേതാവ് തന്നെയാകും പ്രവിശ്യയുടെ അടുത്ത പ്രീമിയർ. ക്രിസ്റ്റിൻ ഫ്രെഷെറ്റ്, ബെർണാഡ് ഡ്രെയിൻവിൽ എന്നിവരാണ് നേതൃസ്ഥാനത്തിനായി മത്സരിക്കുന്നത്.
ചൊവ്വാഴ്ച ആരംഭിച്ച ഓൺലൈൻ വോട്ടെടുപ്പിൽ പാർട്ടിയുടെ ഇരുപതിനായിരത്തോളം വരുന്ന അംഗങ്ങളിൽ 66 ശതമാനത്തിലധികം പേർ ഇതിനകം വോട്ട് രേഖപ്പെടുത്തിക്കഴിഞ്ഞു. വിദ്യാഭ്യാസ വകുപ്പിലടക്കം നിർണ്ണായക തീരുമാനങ്ങളെടുത്ത ബെർണാഡ് ഡ്രെയിൻവില്ലും ഇമിഗ്രേഷൻ-സാമ്പത്തിക വികസന വകുപ്പുകളിൽ മികവ് തെളിയിച്ച ക്രിസ്റ്റിൻ ഫ്രെഷെറ്റും തമ്മിൽ കടുത്ത പോരാട്ടമാണ് നടക്കുന്നത്. ഡ്രമ്മണ്ട്വില്ലിൽ നടക്കുന്ന പാർട്ടി കൺവെൻഷനിൽ ഞായറാഴ്ച വൈകുന്നേരം 4 മണിക്ക് വിജയിയെ ഔദ്യോഗികമായി പ്രഖ്യാപിക്കും.
ലെഗോൾട്ട് ഭരണകാലത്തെ നയങ്ങളിൽ മാറ്റം ആഗ്രഹിക്കുന്ന ജനങ്ങൾ പുതിയ പ്രീമിയറുടെ വരവിനെ പ്രതീക്ഷയോടെയാണ് കാണുന്നത്. കെബെക്കിന്റെ അടിസ്ഥാന വികസനത്തിലും ജനക്ഷേമത്തിലും പുതിയ കാഴ്ചപ്പാടുള്ള ഒരു നേതൃത്വത്തെയാണ് ജനങ്ങൾ ആഗ്രഹിക്കുന്നതെന്ന് രാഷ്ട്രീയ നിരീക്ഷകർ വിലയിരുത്തുന്നു. ഞായറാഴ്ച പുറത്തുവരുന്ന ഫലം സിഎക്യൂ പാർട്ടിയുടെയും കെബെക്ക് പ്രവിശ്യയുടെയും രാഷ്ട്രീയ ഭാവിയിൽ നിർണ്ണായകമാകും.
