മൺട്രിയോൾ: കെബെക്കിലെ ഹോബി സ്റ്റോർ ശൃംഖലയായ ‘ഇമാജിനയർ’ ഫ്രഞ്ച് ഭാഷാ നിയമങ്ങൾക്കെതിരെ ശക്തമായ പ്രതിഷേധവുമായി രംഗത്ത്. അപൂർവ്വമായ കളിക്കോപ്പുകളും ബോർഡ് ഗെയിമുകളും വിപണിയിൽ നിലനിർത്തുന്നതിനായി നിയമങ്ങളിൽ ഇളവ് വേണമെന്നാണ് ഇവരുടെ ആവശ്യം. വിദേശ രാജ്യങ്ങളിൽ നിന്നുള്ള പല ഗെയിമുകളും ഫ്രഞ്ച് ഭാഷയിൽ ലഭ്യമല്ലാത്തതിനാൽ, കർശനമായ ഭാഷാ നിയമങ്ങൾ തങ്ങളുടെ ബിസിനസിനെ തകർക്കുന്നുവെന്ന് ഉടമ ബെനോയിറ്റ് ബോയൺ ചൂണ്ടിക്കാട്ടുന്നു.
നിലവിലെ നിയമമനുസരിച്ച് കെബെക്കിൽ വിൽക്കുന്ന ഓരോ ഉൽപ്പന്നത്തിനും ഫ്രഞ്ച് ഭാഷയിലുള്ള ലേബലിംഗോ അല്ലെങ്കിൽ ഫ്രഞ്ച് പതിപ്പോ നിർബന്ധമാണ്. എന്നാൽ പല നിർമ്മാതാക്കളും ഇത്തരം ഉൽപ്പന്നങ്ങൾ ഫ്രഞ്ച് ഭാഷയിലേക്ക് പരിഭാഷപ്പെടുത്താറില്ല. ഉദാഹരണത്തിന്, സ്ക്രാബിൾ പോലുള്ള ഗെയിമുകളുടെ ഫ്രഞ്ച് പതിപ്പ് സ്റ്റോക്കില്ലാത്ത സമയത്ത് ഇംഗ്ലീഷ് പതിപ്പ് മാത്രം വിൽക്കുന്നത് നിയമവിരുദ്ധമാണ്. ഇത്തരം നിയന്ത്രണങ്ങൾ കാരണം ഉപഭോക്താക്കൾ ഓൺലൈൻ സൈറ്റുകളെ ആശ്രയിക്കുന്നത് തങ്ങൾക്ക് വലിയ സാമ്പത്തിക നഷ്ടമുണ്ടാക്കുന്നുവെന്ന് മാനേജർ പോൾ ലാബെല്ലെ പറഞ്ഞു.
ഫ്രഞ്ച് ഭാഷയെ സംരക്ഷിക്കാൻ ആഗ്രഹിക്കുന്നുണ്ടെങ്കിലും അത് വിനോദോപാധികളെ തടസ്സപ്പെടുത്തിക്കൊണ്ടാകരുത് എന്നാണ് ബോയൺ പറയുന്നത്. പുസ്തകങ്ങൾ, സംഗീതം, വിഡിയോ ഗെയിമുകൾ എന്നിവയ്ക്ക് നിലവിൽ ഇത്തരത്തിലുള്ള ഭാഷാ നിയമങ്ങളിൽ ഇളവുണ്ട്. ഇതേ പട്ടികയിൽ ബോർഡ് ഗെയിമുകളെയും ഉൾപ്പെടുത്തണമെന്ന് ആവശ്യപ്പെട്ട് 14,000-ത്തിലധികം പേർ ഒപ്പിട്ട നിവേദനം ഇവർ അധികൃതർക്ക് സമർപ്പിച്ചു. എന്നാൽ 1977-ലെ നിയമം അനുസരിച്ച് നിർദ്ദേശങ്ങളും ലേബലുകളും ഫ്രഞ്ചിൽ ലഭ്യമാക്കണമെന്ന മുൻനിലപാടിൽ തന്നെയാണ് ഭാഷാ നിരീക്ഷണ സമിതിയായ ഒ.ക്യു.എൽ.എഫ്. ഇപ്പോഴും തുടരുന്നത്.
