എഡ്മിന്റൻ: കാനഡയോടുള്ള ആൽബർട്ടയിലെ ജനങ്ങളുടെ സ്നേഹവും ഐക്യവും പ്രഖ്യാപിക്കുന്നതിനായി എഡ്മിന്റൻ നഗരത്തിലെ ഒരു പ്രധാന റോഡിന് ‘ഫോറെവർ കനേഡിയൻ അവന്യൂ’ (Forever Canadian Avenue) എന്ന് പേരിടാൻ നീക്കം. എഡ്മിന്റൻ സിറ്റി കൗൺസിലറായ മൈക്കൽ ജാൻസ് ആണ് ഇതിനുള്ള അപേക്ഷ സമർപ്പിക്കുമെന്ന് പ്രഖ്യാപിച്ചത്. എഡ്മിന്റൻ ഡൗൺടൗണിലെ ആൽബർട്ട നിയമസഭാ മന്ദിരത്തിന് തൊട്ടടുത്തുള്ള 99-ാം അവന്യൂവിന്റെ ഒരു ഭാഗത്തിനാണ് ഈ പേര് നൽകാൻ ഉദ്ദേശിക്കുന്നത്. കാനഡയിൽ തന്നെ തുടരണമെന്ന് ആവശ്യപ്പെട്ട് കഴിഞ്ഞ ഡിസംബറിൽ 4 ലക്ഷത്തിലധികം ആളുകൾ ഒപ്പിട്ട ‘ഫോറെവർ കനേഡിയൻ’ എന്ന കൂട്ടായ്മയുടെ സ്മരണാർത്ഥമാണ് ഈ നീക്കം.
ആൽബർട്ടയെ കാനഡയിൽ നിന്ന് വേർപെടുത്താൻ ശ്രമിക്കുന്ന വിഘടനവാദ ഗ്രൂപ്പുകളുടെ നീക്കങ്ങൾക്ക് കടുത്ത തിരിച്ചടി നൽകിക്കൊണ്ടാണ് ഈ പ്രഖ്യാപനം വന്നിരിക്കുന്നത്. ആൽബർട്ട കാനഡയുടെ ഭാഗമായിത്തന്നെ തുടരണമോ എന്ന കാര്യത്തിൽ വോട്ടെടുപ്പ് നടത്താൻ ആവശ്യപ്പെട്ടുള്ള വിഘടനവാദികളുടെ ഹർജി കഴിഞ്ഞ ദിവസങ്ങളിൽ കോടതി തള്ളിയിരുന്നു. പ്രവിശ്യാ സർക്കാർ ഇത്തരം വിഘടനവാദ ശ്രമങ്ങളെ പ്രോത്സാഹിപ്പിക്കുന്നത് വലിയ നിക്ഷേപങ്ങൾ നഷ്ടപ്പെടാനും സാമ്പത്തിക അനിശ്ചിതത്വത്തിനും കാരണമാകുമെന്ന് കൗൺസിലർ മൈക്കൽ ജാൻസ് ചൂണ്ടിക്കാണിച്ചു. വിഘടനവാദ ഭീഷണി കാനഡയുടെ സമ്പദ്വ്യവസ്ഥയെ ബാധിക്കുമെന്ന ആശങ്കയും അദ്ദേഹം പങ്കുവെച്ചു.
ഒരു വലിയ ടൂറിസ്റ്റ് കേന്ദ്രവും നിരവധി സ്കൂൾ കുട്ടികൾ സന്ദർശിക്കുന്നതുമായ ഈ ചരിത്രപ്രധാനമായ റോഡിന് പേരുമാറ്റാനുള്ള അപേക്ഷ ഉടൻ തന്നെ എഡ്മിന്റനിലെ നെയിമിങ് കമ്മിറ്റിക്ക് സമർപ്പിക്കും. വരാനിരിക്കുന്ന ജൂലൈ മാസത്തിലെ കാനഡ ദിനാഘോഷങ്ങൾ ‘ഫോറെവർ കനേഡിയൻ അവന്യൂ’വിൽ വെച്ച് തന്നെ ആഘോഷിക്കാൻ കഴിയുമെന്നാണ് പ്രതീക്ഷിക്കുന്നതെന്ന് മൈക്കൽ ജാൻസ് പറഞ്ഞു. ഇത് ഏതെങ്കിലും ഒരു സർക്കാരിനോ പ്രീമിയറിനോ എതിരെയുള്ളതല്ലെന്നും, മറിച്ച് കാനഡയ്ക്കൊപ്പം നിൽക്കാൻ ആഗ്രഹിക്കുന്ന ലക്ഷക്കണക്കിന് വരുന്ന ജനങ്ങളുടെ ഒരുമയുടെ അടയാളമാണെന്നും അദ്ദേഹം കൂട്ടിച്ചേർത്തു.
