വാഷിങ്ടണ്: കാനഡയുമായുള്ള വ്യാപാര തര്ക്കങ്ങള് ഉടന് പരിഹരിക്കപ്പെടുമെന്നും ഒരു പുതിയ ധാരണയിലെത്താന് സാധിക്കുമെന്നും പ്രതീക്ഷ പ്രകടിപ്പിച്ച് യു.എസ് പ്രസിഡന്റ് ഡോണള്ഡ് ട്രംപ്. കാനഡ അമേരിക്കയെ ദീര്ഘകാലമായി ചൂഷണം ചെയ്യുകയാണെന്ന തന്റെ മുന് നിലപാട് അദ്ദേഹം ആവര്ത്തിക്കുകയും ചെയ്തു. CUSMA വ്യാപാര കരാറില് നിന്ന് അമേരിക്ക പിന്മാറുമോ എന്ന മാധ്യമപ്രവര്ത്തകരുടെ ചോദ്യത്തോട് പ്രതികരിക്കുകയായിരുന്നു അദ്ദേഹം.
മെക്സിക്കോയുമായി മികച്ച ബന്ധമാണുള്ളതെന്നും എന്നാല് കാനഡയ്ക്ക് അമേരിക്കന് ഉല്പ്പന്നങ്ങളാണ് കൂടുതല് ആവശ്യമെന്നും അമേരിക്കയ്ക്ക് കാനഡയുടെ ഉല്പ്പന്നങ്ങള് ആവശ്യമില്ലെന്നും ട്രംപ് അവകാശപ്പെട്ടു. കാനഡ തങ്ങളുടെ കാര്ഷിക മേഖലയ്ക്ക് മേല് 400 ശതമാനം വരെ ഉയര്ന്ന തീരുവ ചുമത്തുന്നുണ്ടെന്നും അദ്ദേഹം കുറ്റപ്പെടുത്തി. തീരുവ തര്ക്കങ്ങളെ തുടര്ന്ന് ആഗസ്റ്റ് 21-ന് ഇരുരാജ്യങ്ങളും തമ്മിലുള്ള ഔദ്യോഗിക ചര്ച്ചകള് നിര്ത്തിവെച്ചിരുന്നു.
കാനഡയില് നിന്നുള്ള ഉല്പ്പന്നങ്ങള്ക്ക് ട്രംപ് 50 ശതമാനം തീരുവ ഏര്പ്പെടുത്തിയതിന് പിന്നാലെ കാനഡയും തിരിച്ചടിച്ചു. തുടര്ന്ന് മദ്യം ഉള്പ്പെടെയുള്ള ചില കനേഡിയന് ഉല്പ്പന്നങ്ങളുടെ ഇറക്കുമതി ട്രംപ് നിരോധിക്കുകയും ചെയ്തു. വാര്ത്താസമ്മേളനത്തിനിടെ ട്രംപ് കാനഡയുടെ വ്യാപാര താല്പര്യങ്ങളെ ഇറാനുമായി താരതമ്യം ചെയ്തത് രാഷ്ട്രീയ കേന്ദ്രങ്ങളില് വലിയ ചര്ച്ചയായിട്ടുണ്ട്. ട്രംപിന്റെ പരാമര്ശം കാനഡയെ ഒരു ശത്രുരാജ്യത്തെപ്പോലെ കാണുന്നതിന് തുല്യമാണെന്ന് രാഷ്ട്രീയ നിരീക്ഷകര് അഭിപ്രായപ്പെട്ടു. എന്നാല് ഇരുരാജ്യങ്ങളും തമ്മില് ധാരണയിലെത്തണമെങ്കില് അമേരിക്ക ഏകപക്ഷീയമായ നിലപാടുകളില് നിന്ന് മാറ്റം വരുത്തേണ്ടതുണ്ടെന്നാണ് കനേഡിയന് നയതന്ത്ര വിദഗ്ദ്ധരുടെ നിലപാട്.
