ഓട്ടവ: ആഗോള ഇന്ധന വിപണിയില് ഡീസല് വില കുതിച്ചുയരുന്നത് വരും ആഴ്ചകളില് ഭക്ഷ്യ വിപണിയെ കടുത്ത പ്രതിസന്ധിയിലാക്കുമെന്ന് വിപണി വിദഗ്ദ്ധരുടെ മുന്നറിയിപ്പ്. പശ്ചിമേഷ്യയിലെ സംഘര്ഷങ്ങളും അന്താരാഷ്ട്ര സമുദ്ര പാതകളിലെ തടസ്സങ്ങളുമാണ് ക്രൂഡ് ഓയില്, ഡീസല് വിലകള് റെക്കോര്ഡ് നിരക്കിലേക്ക് ഉയര്ത്തിയത്. ചരക്ക് നീക്കത്തിനും കൃഷി ആവശ്യങ്ങള്ക്കും ഡീസല് അത്യാവശ്യമായതിനാല് ഈ വിലവര്ദ്ധനവിന്റെ ആഘാതം ഉപയോക്താക്കളുടെ പോക്കറ്റുകളെ നേരിട്ട് ബാധിക്കും.
രാജ്യത്തുടനീളം ചരക്ക് ലോറികളും ട്രെയിനുകളും ട്രാക്ടറുകളും ഡീസല് ഇന്ധനത്തെയാണ് പ്രധാനമായും ആശ്രയിക്കുന്നത്. ഇന്ധനച്ചെലവ് കുത്തനെ കൂടിയതോടെ ഉല്പ്പന്നങ്ങള് വിതരണം ചെയ്യുന്ന കമ്പനികളും സപ്ലയര്മാരും സര്ചാര്ജ്ജുകള് ചുമത്താന് നിര്ബന്ധിതരായിരിക്കുകയാണ്. ഉല്പ്പാദന കേന്ദ്രങ്ങളില് നിന്ന് വിപണികളിലേക്ക് സാധനങ്ങള് എത്തിക്കുന്നതിനുള്ള ഗതാഗതച്ചെലവ് ഉയര്ന്നതോടെ പഴങ്ങള്, പച്ചക്കറികള്, പാല് ഉല്പ്പന്നങ്ങള് തുടങ്ങിയ നിത്യോപയോഗ സാധനങ്ങളുടെ വിലയില് ഉടന് തന്നെ വലിയ വര്ദ്ധനവുണ്ടാകുമെന്നാണ് സാമ്പത്തിക വിദഗ്ദ്ധര് പ്രവചിക്കുന്നത്.
ഫാമുകളില് ട്രാക്ടറുകളും കൊയ്ത്തുയന്ത്രങ്ങളും പ്രവര്ത്തിപ്പിക്കുന്നതിനുള്ള ചെലവും വളം, വിത്ത് എന്നിവയുടെ ഗതാഗതച്ചെലവും കൂടിയത് കര്ഷകരെയും വലിയ സാമ്പത്തിക ബുദ്ധിമുട്ടിലാക്കിയിട്ടുണ്ട്. വിതരണ ശൃംഖലയിലുണ്ടാകുന്ന ഈ അധിക ഭാരം കമ്പനികള്ക്ക് താങ്ങാന് സാധിക്കാത്തതിനാല് ഒടുവില് ഉപയോക്താക്കളുടെ ചുമലിലേക്ക് എത്തും. വിദേശത്ത് നിന്ന് ഇറക്കുമതി ചെയ്യുന്ന ഭക്ഷ്യവസ്തുക്കള്ക്കായിരിക്കും വിലവര്ദ്ധനവ് ഏറ്റവും കൂടുതല് അനുഭവപ്പെടുക. റഷ്യ-ഉക്രൈന് യുദ്ധകാലത്തുണ്ടായ ഇന്ധന പ്രതിസന്ധിക്ക് സമാനമായ സാഹചര്യമാണ് ഇപ്പോള് രൂപപ്പെടുന്നത്. വരും ദിവസങ്ങളില് പണപ്പെരുപ്പം വന്തോതില് ഉയരാന് ഈ ഇന്ധന വിലക്കയറ്റം കാരണമാകും.
