ഓട്ടവ: കാനഡയില് എട്ട് കുട്ടികളുടെ ദാരുണമായ കൊലപാതകങ്ങള്ക്ക് കാരണം ഔദ്യോഗിക സ്ഥാപനങ്ങളുടെ അനാസ്ഥയും അമ്മമാര് നല്കിയ മുന്നറിയിപ്പുകള് ഉദ്യോഗസ്ഥര് തള്ളിക്കളഞ്ഞതുമാണെന്ന് തുറന്നുകാട്ടുന്ന പുതിയ റിപ്പോര്ട്ട് പുറത്ത്. നാഷണല് അസോസിയേഷന് ഓഫ് വിമന് ആന്ഡ് ദി ലോ, ഷെര്ബ്രൂക്ക് സര്വകലാശാലയിലെ നിയമ അധ്യാപകര് എന്നിവര് ചേര്ന്നാണ് പഠന റിപ്പോര്ട്ട് തയ്യാറാക്കിയത്.
‘ഓരോ കുഞ്ഞിന്റെ മരണത്തിന് മുന്പും വ്യക്തമായ മുന്നറിയിപ്പ് സൂചനകള് ഉണ്ടായിരുന്നുവെങ്കിലും മതിയായ സംരക്ഷണ നടപടികള് ഉണ്ടായില്ല,’ എന്ന് വ്യാഴാഴ്ച പുറത്തുവിട്ട റിപ്പോര്ട്ടില് വ്യക്തമാക്കുന്നു. അപായ സൂചനകള് ചൂണ്ടിക്കാണിച്ച അമ്മമാരെയും മുത്തശ്ശിമാരെയും അധികൃതര് വിശ്വസിച്ചില്ലെന്ന് മാത്രമല്ല, മുന്പ് അക്രമസ്വഭാവം കാണിച്ചിട്ടുള്ള പിതാക്കന്മാര്ക്കൊപ്പം കുട്ടികളെ വിടുകയും ചെയ്തു.
അഞ്ച് വ്യത്യസ്ത കേസുകളിലായി എട്ട് കുട്ടികള് കൊല്ലപ്പെട്ട സംഭവങ്ങളാണ് റിപ്പോര്ട്ടില് വിശകലനം ചെയ്തിരിക്കുന്നത്. ഈ കേസുകളിലെല്ലാം കുടുംബാംഗങ്ങള് പൊലീസിനെയും ഫാമിലി കോടതികളെയും സമീപിച്ച് കുട്ടികളുടെ സുരക്ഷയില് ആശങ്ക അറിയിച്ചിരുന്നു.
2019-ല് ക്യുബെക്കിലെ ഗ്രാന്മബിയില് (Granby) ഏഴു വയസ്സുകാരി കൊല്ലപ്പെട്ട സംഭവം റിപ്പോര്ട്ടില് എടുത്തെഴുതുന്നുണ്ട്. പിതാവില് നിന്ന് ലൈംഗിക അതിക്രമത്തിന് സാധ്യതയുണ്ടെന്ന് മുന്നറിയിപ്പ് നല്കിയ മുത്തശ്ശിക്ക്, കുട്ടിയോടുള്ള പിതാവിന്റെ പെരുമാറ്റത്തെപ്പറ്റി പരാതിപ്പെട്ടതിന്റെ പേരില് സംരക്ഷണാവകാശം നഷ്ടപ്പെടുകയാണ് ഉണ്ടായത്. തുടര്ന്ന് കുട്ടിയെ പിതാവിന്റെയും രണ്ടാം അമ്മയുടെയും കസ്റ്റഡിയില് വിടുകയും ക്രൂരമായ പീഡനത്തെ തുടര്ന്ന് കുട്ടി മരണപ്പെടുകയുമായിരുന്നു.
പെരന്റല് ഏലിയനേഷന് വാദങ്ങള്ക്കെതിരെ ബില്
ഇത്തരം കേസുകളില് കുട്ടികളെ അക്രമികളായ പിതാക്കന്മാര്ക്കൊപ്പം വിടാന് കാരണം ‘പെരന്റല് ഏലിയനേഷന്’ (ഒരു രക്ഷിതാവ് കുട്ടിയെ മറ്റേ രക്ഷിതാവിനെതിരെ തിരിക്കുന്നുവെന്ന ആരോപണം) എന്ന വാദമാണെന്ന് റിപ്പോര്ട്ട് ചൂണ്ടിക്കാണിക്കുന്നു. ഗാര്ഹിക പീഡന ആരോപണങ്ങളെ പ്രതിരോധിക്കാന് കോടതികളില് ഈ വാദം ദുരുപയോഗം ചെയ്യപ്പെടുകയാണ്.
ഇതിനെതിരെ ലിബറല് എം.പി ലിസ ഹെപ്ഫനര് പാര്ലമെന്റില് സ്വകാര്യ ബില് അവതരിപ്പിച്ചിട്ടുണ്ട്. വിവാഹമോചന കേസുകളില് കോടതികള് ഇത്തരം തിരിച്ചുവിടല് ആരോപണങ്ങള് കണക്കിലെടുക്കുന്നത് തടയുന്നതാണ് നിര്ദ്ദിഷ്ട ബില്. കൂടാതെ, വിവാഹമോചന വേളയില് കുടുംബാംഗങ്ങള് നേരിടുന്ന മാനസിക അധിക്ഷേപങ്ങളും അക്രമങ്ങളും കൃത്യമായി പരിശോധിക്കാന് വക്കീലന്മാര്ക്കും ന്യായാധിപന്മാര്ക്കും പുതിയ മാര്ഗ്ഗനിര്ദ്ദേശങ്ങളും ബില് മുന്നോട്ടുവെക്കുന്നു.
