തിരുവനന്തപുരം: വിദേശയാത്ര നടത്തിയതിൽ തെറ്റില്ലെന്ന് ആവർത്തിച്ച് കായിക മന്ത്രി ഒ.ജെ. ജനീഷ്. അവസരം ലഭിച്ചാൽ ഇനിയും വിദേശയാത്ര നടത്തുമെന്നും ഔദ്യോഗിക ചുമതലകളിൽ വീഴ്ച വരുത്താതെയും സർക്കാരിന് അധിക സാമ്പത്തിക ബാധ്യത ഉണ്ടാകാതെയും സ്വകാര്യ യാത്രകൾ നടത്തുന്നതിൽ തെറ്റില്ലെന്നും മന്ത്രി പറഞ്ഞു.
‘തന്ത വൈബ്’ എന്ന പ്രയോഗം ഒരാളുടെ പ്രായത്തെ ഉദ്ദേശിച്ചല്ല നടത്തിയതെന്നും മന്ത്രി വ്യക്തമാക്കി. മാധ്യമപ്രവർത്തകർ ചോദ്യം ചോദിച്ച സമയത്ത് ഉപയോഗിച്ചിരുന്ന ചിത്രത്തെയും അതുമായി ബന്ധപ്പെട്ട സാഹചര്യത്തെയും കുറിച്ചാണ് അത്തരത്തിൽ പ്രതികരിച്ചതെന്നും അദ്ദേഹം പറഞ്ഞു.
കഴിഞ്ഞ ദിവസങ്ങളിൽ ഒരു മാധ്യമം താനും ഭാര്യയും ബോട്ടിങ്ങിൽ യാത്ര ചെയ്യുന്ന ചിത്രം തുടർച്ചയായി ഉപയോഗിച്ചിരുന്നുവെന്നും മന്ത്രി പറഞ്ഞു. ചിത്രം രഹസ്യമായി പകർത്തിയതല്ലെന്നും തന്റെ സോഷ്യൽ മീഡിയ അക്കൗണ്ടിലൂടെ താൻ തന്നെ പങ്കുവെച്ച ചിത്രമാണെന്നും അദ്ദേഹം വ്യക്തമാക്കി. ആ ചിത്രം തുടർച്ചയായി ഉപയോഗിക്കുന്നതിനെതിരെയാണ് അത്തരമൊരു പ്രയോഗം നടത്തിയതെന്നും മന്ത്രി വിശദീകരിച്ചു.
മന്ത്രിമാർക്ക് സ്വകാര്യ നിമിഷങ്ങൾ പാടില്ലേയെന്നും തുടർച്ചയായ ഔദ്യോഗിക ജോലികൾക്കിടയിൽ ആർക്കും ചെറിയ ഇടവേളകൾ ആവശ്യമാണെന്നും ജനീഷ് പറഞ്ഞു. തന്റെ പ്രായം 37 വയസ്സാണെന്നും ചെറിയ യാത്രകൾ നടത്തുന്നതിൽ തെറ്റില്ലെന്നും അദ്ദേഹം വ്യക്തമാക്കി.
സർക്കാരിന്റെ പ്രവർത്തനങ്ങളെ ബാധിക്കാതെയും ഔദ്യോഗിക ചുമതലകളിൽ വീഴ്ച വരുത്താതെയും പൊതുജനങ്ങളുടെ നികുതിപ്പണം നഷ്ടപ്പെടാത്ത വിധത്തിലും യാത്രകൾ നടത്തുമെന്നും മന്ത്രി കൂട്ടിച്ചേർത്തു.
വിദേശയാത്രയുമായി ബന്ധപ്പെട്ട വിവാദങ്ങൾക്കിടെയാണ് മന്ത്രിയുടെ പുതിയ വിശദീകരണം. യാത്രയുടെ ആവശ്യകതയും മന്ത്രിയുടെ പരാമർശങ്ങളും സംബന്ധിച്ച ചർച്ചകൾക്കിടെയാണ് അദ്ദേഹം നിലപാട് വ്യക്തമാക്കിയത്.
