കാനഡ പ്രധാനമന്ത്രി മാർക്ക് കാർണി ഈ മാസം തുർക്കിയ സന്ദർശിക്കുമെന്ന് റിപ്പോർട്ട്. റോയിട്ടേഴ്സ് റിപ്പോർട്ട് ചെയ്ത വിവരങ്ങൾ പ്രകാരം, തുർക്കിയ പ്രസിഡന്റ് റെജെപ് തയ്യിപ് എർദോഗനുമായി കാർണി കൂടിക്കാഴ്ച നടത്തും. ഇരുരാജ്യങ്ങളും തമ്മിലുള്ള നയതന്ത്ര, സാമ്പത്തിക ബന്ധങ്ങൾ കൂടുതൽ ശക്തിപ്പെടുത്തുന്നതിനുള്ള ചർച്ചകൾക്ക് സന്ദർശനം വഴിയൊരുക്കുമെന്നാണ് പ്രതീക്ഷ.
നാറ്റോ ഉച്ചകോടിക്കിടെ ആരംഭിച്ച സ്വതന്ത്ര വ്യാപാര ചർച്ചകൾ, ഊർജ സഹകരണം, പ്രതിരോധ മേഖല എന്നിവ പ്രധാന ചർച്ചാവിഷയങ്ങളാകുമെന്നാണ് ബന്ധപ്പെട്ട വൃത്തങ്ങൾ നൽകുന്ന സൂചന. കാനഡയുടെ വ്യാപാര പങ്കാളിത്തം കൂടുതൽ വൈവിധ്യവൽക്കരിക്കുന്നതിന്റെ ഭാഗമായി തുർക്കിയയുമായുള്ള സാമ്പത്തിക ബന്ധം വിപുലീകരിക്കാനും ഒട്ടാവ ലക്ഷ്യമിടുന്നു.
പ്രതിരോധ രംഗത്തെ സഹകരണവും കൂടിക്കാഴ്ചയിൽ പ്രധാന വിഷയമാകാനിടയുണ്ട്. യൂറോപ്പിനും ഏഷ്യയ്ക്കും ഇടയിലെ തന്ത്രപ്രധാന സ്ഥാനമുള്ള തുർക്കിയയുമായുള്ള ബന്ധം കൂടുതൽ ശക്തമാക്കുന്നത് കാനഡയുടെ വിദേശനയത്തിലും വ്യാപാരനയത്തിലും പ്രാധാന്യമുള്ള നീക്കമായാണ് വിലയിരുത്തപ്പെടുന്നത്.
