തിരുവനന്തപുരം: ബിജെപി കൗണ്‍സിലര്‍ ആര്‍. ശ്രീലേഖ രാജിക്കത്ത് നല്‍കിയിട്ടില്ലെന്ന് തിരുവനന്തപുരം മേയര്‍ വി.വി. രാജേഷ്. കോര്‍പറേഷനിലെ ഭരണപ്രവര്‍ത്തനങ്ങള്‍ കുറ്റമറ്റ രീതിയില്‍ മുന്നോട്ടുകൊണ്ടുപോകുന്നതിനുള്ള ചില നിര്‍ദേശങ്ങളടങ്ങിയ കത്താണ് തനിക്ക് ലഭിച്ചതെന്ന് മേയര്‍ മാധ്യമങ്ങളോട് വിശദീകരിച്ചു. ശ്രീലേഖ കൗണ്‍സിലറായി തന്നെ തുടരുമെന്നും കൗണ്‍സിലര്‍ എന്ന നിലയില്‍ അവര്‍ക്ക് ചില ആരോഗ്യപ്രശ്‌നങ്ങളുണ്ടെന്നും അദ്ദേഹം വ്യക്തമാക്കി.
ശ്രീലേഖ നല്‍കിയ നിര്‍ദേശങ്ങളില്‍ ചിലതില്‍ പാര്‍ട്ടിയും ചിലതില്‍ മേയര്‍ എന്ന നിലയില്‍ താനും ഇടപെടേണ്ടതുണ്ട്. നിലവില്‍ കോര്‍പറേഷന്‍ ഭരണത്തില്‍ യാതൊരുവിധ പ്രതിസന്ധിയുമില്ലെന്നും വി.വി. രാജേഷ് കൂട്ടിച്ചേര്‍ത്തു. അതേസമയം, ആര്‍. ശ്രീലേഖയുടെ രാജിനാടകം സ്ഥാനം നേടിയെടുക്കാന്‍ വേണ്ടിയുള്ളതാണെന്ന് സിപിഐഎം സംസ്ഥാന സെക്രട്ടറിയേറ്റ് അംഗം വി. ശിവന്‍കുട്ടി വിമര്‍ശിച്ചു. രാജി പ്രഖ്യാപനം ജനങ്ങളെ വഞ്ചിക്കുന്നതാണെന്നും ശ്രീലേഖ തയാറാണെങ്കില്‍ സ്വീകരിക്കുമെന്നും മന്ത്രി കെ. മുരളീധരനും പ്രതികരിച്ചു.
നിലവില്‍ ഒരു സ്വതന്ത്ര കൗണ്‍സിലറുടെ പിന്തുണയോടെ 51 അംഗങ്ങളുടെ ബലത്തിലാണ് ബിജെപി തിരുവനന്തപുരം കോര്‍പറേഷന്‍ ഭരിക്കുന്നത്. കാപ്പ കേസില്‍ വാഴോട്ടുകോണം കൗണ്‍സിലര്‍ ആര്‍. സുഗതന്‍ ജയിലിലായ സാഹചര്യത്തില്‍, ആര്‍. ശ്രീലേഖ കൂടി രാജിവെച്ചാല്‍ ബിജെപിയുടെ അംഗബലം 49 ആയി ചുരുങ്ങുമായിരുന്നു. അതിനാല്‍ ശ്രീലേഖയുടെ അപ്രതീക്ഷിത നീക്കം ഭരണ നേതൃത്വത്തിന് വലിയ തലവേദന സൃഷ്ടിച്ചിരുന്നു.
