വൻകൂവർ: ബ്രിട്ടീഷ് കൊളംബിയയിൽ ഡ്രൈവിങ് ലൈസൻസ് നിയമങ്ങളിൽ നിർണായക പരിഷ്കാരങ്ങൾ. ഈ മാസം 19 മുതൽ പ്രാബല്യത്തിൽ വരുന്ന പുതിയ നിയമപ്രകാരം, യോഗ്യരായ നോവീസ് ഡ്രൈവർമാർക്ക് ഫുൾ ക്ലാസ് 5 ഡ്രൈവിങ് ലൈസൻസ് നേടാൻ ഇനി രണ്ടാമത്തെ റോഡ് ടെസ്റ്റ് പാസാകേണ്ടതില്ല. പകരം, ഡ്രൈവർമാരുടെ മുൻകാല ഡ്രൈവിങ് റെക്കോർഡും സുരക്ഷിതമായ ഡ്രൈവിങ് ചരിത്രവും വിലയിരുത്തി ലൈസൻസ് അപ്‌ഗ്രേഡ് ചെയ്യുന്നതിനുള്ള സംവിധാനമാണ് നടപ്പാക്കുന്നത്.
ബ്രിട്ടീഷ് കൊളംബിയയിലെ ഡ്രൈവിങ് ലൈസൻസിങ് സംവിധാനത്തിൽ ഏകദേശം 25 വർഷത്തിനിടയിലെ ഏറ്റവും പ്രധാനപ്പെട്ട പരിഷ്കാരങ്ങളിലൊന്നാണിത്. ഇൻഷുറൻസ് കോർപ്പറേഷൻ ഓഫ് ബ്രിട്ടീഷ് കൊളംബിയയുടെ (ഐ.സി.ബി.സി.) നേതൃത്വത്തിൽ നടപ്പാക്കുന്ന പുതിയ ഡ്രൈവിങ് റെക്കോർഡ് അസസ്‌മെന്റ് (DRA) സംവിധാനത്തിലൂടെ, സുരക്ഷിതമായി വാഹനം ഓടിച്ചിട്ടുള്ള അർഹരായ ഡ്രൈവർമാർക്ക് രണ്ടാം റോഡ് ടെസ്റ്റ് ഒഴിവാക്കി അടുത്ത ഘട്ടത്തിലേക്ക് കടക്കാം.
സുരക്ഷിതമായ ഡ്രൈവിങ് ചരിത്രം നിർണായകം
പുതിയ സംവിധാനപ്രകാരം, നോവീസ് ലൈസൻസ് കാലയളവിൽ ഗുരുതരമായ ഗതാഗതനിയമ ലംഘനങ്ങൾ നടത്താത്തവർക്കാണ് ലൈസൻസ് അപ്‌ഗ്രേഡ് ചെയ്യാനുള്ള അവസരം ലഭിക്കുക. അമിതവേഗത, വാഹനം ഓടിക്കുമ്പോൾ മൊബൈൽ ഫോണോ മറ്റ് ഡിജിറ്റൽ ഉപകരണങ്ങളോ ഉപയോഗിക്കൽ, ലൈസൻസ് സസ്‌പെൻഷൻ, ഡ്രൈവിങ് വിലക്ക് തുടങ്ങിയവ ഡ്രൈവിങ് റെക്കോർഡിന്റെ വിലയിരുത്തലിനെ ബാധിക്കും.
ഇത്തരം ലംഘനങ്ങൾ രേഖപ്പെടുത്തിയിട്ടുള്ളവർക്ക് ആവശ്യമായ സുരക്ഷിത ഡ്രൈവിങ് കാലയളവ് വീണ്ടും പൂർത്തിയാക്കേണ്ടിവന്നേക്കാം. അതേസമയം, ലേണേഴ്സ് ലൈസൻസായ ക്ലാസ് 7L-ൽ നിന്ന് നോവീസ് ലൈസൻസായ ക്ലാസ് 7 അല്ലെങ്കിൽ 8-ലേക്ക് കടക്കുന്നതിന് ആദ്യ റോഡ് ടെസ്റ്റ് നിർബന്ധമായി തുടരും.
25 വയസ്സും അതിന് മുകളിലുള്ളവർക്കും ഇളവ്
പുതിയ പരിഷ്കാരം 25 വയസ്സും അതിൽ കൂടുതലുമുള്ള ഡ്രൈവർമാർക്ക് കൂടുതൽ പ്രയോജനകരമാകും. ഇവരുടെ ലേണേഴ്സ് ഘട്ടം 12 മാസത്തിൽ നിന്ന് ഒൻപത് മാസമായും നോവീസ് ഘട്ടം 24 മാസത്തിൽ നിന്ന് 12 മാസമായും കുറയ്ക്കും. ഇതോടെ നിയന്ത്രണങ്ങളോടെയുള്ള ക്ലാസ് 5 ലൈസൻസ് നേടാനുള്ള ആകെ കാലയളവ് 21 മാസമായി ചുരുങ്ങും. നിലവിലെ രീതിയെ അപേക്ഷിച്ച് 15 മാസം വരെ ലാഭിക്കാനാകും.
കൂടാതെ, 25 വയസ്സും അതിൽ കൂടുതലുമുള്ള ഡ്രൈവർമാർക്ക് വാഹനത്തിൽ ‘N’ അടയാളം പ്രദർശിപ്പിക്കേണ്ടതില്ലെന്ന ഇളവും ലഭിക്കും.
യുവ ഡ്രൈവർമാർക്കുള്ള വ്യവസ്ഥകൾ
25 വയസ്സിന് താഴെയുള്ളവർക്ക് ലേണേഴ്സ് ഘട്ടത്തിൽ 12 മാസവും നോവീസ് ഘട്ടത്തിൽ 24 മാസവും പൂർത്തിയാക്കണമെന്ന വ്യവസ്ഥ തുടരും. അംഗീകൃത ഗ്രാജുവേറ്റഡ് ലൈസൻസിങ് പ്രോഗ്രാം (GLP) കോഴ്‌സ് പൂർത്തിയാക്കുന്നവർക്ക് നോവീസ് കാലയളവിൽ ഇളവ് ലഭിക്കുന്ന വ്യവസ്ഥകളും ബാധകമായിരിക്കും.
രണ്ടാം റോഡ് ടെസ്റ്റ് കൂടാതെ ക്ലാസ് 5 ലൈസൻസിലേക്ക് അപ്‌ഗ്രേഡ് ചെയ്യുന്ന ഡ്രൈവർമാർക്ക് ആദ്യ ഒരു വർഷത്തേക്ക് ‘റെസ്ട്രിക്ഷൻ 55’ ബാധകമായിരിക്കും. ഈ നിയന്ത്രണപ്രകാരം വാഹനം ഓടിക്കുമ്പോൾ രക്തത്തിൽ മദ്യത്തിന്റെയോ ലഹരിമരുന്നുകളുടെയോ സാന്നിധ്യം അനുവദിക്കില്ല. ഒരു വർഷത്തെ സുരക്ഷിത ഡ്രൈവിങ് കാലയളവ് പൂർത്തിയാക്കിയാൽ ഈ നിയന്ത്രണം നീങ്ങും.
രണ്ടാം റോഡ് ടെസ്റ്റ് ബുക്കിങ് റദ്ദാക്കും
പുതിയ നിയമപ്രകാരം യോഗ്യത നേടുന്ന നിലവിലെ നോവീസ് ഡ്രൈവർമാരുടെ ലൈസൻസ് ഒക്ടോബർ 19 മുതൽ സ്വമേധയാ അപ്‌ഗ്രേഡ് ചെയ്യപ്പെടും. അതേ തീയതിയിലോ അതിന് ശേഷമോ ബുക്ക് ചെയ്തിട്ടുള്ള രണ്ടാം റോഡ് ടെസ്റ്റുകൾ ഐ.സി.ബി.സി. റദ്ദാക്കുമെന്നും അറിയിച്ചിട്ടുണ്ട്.
ഇതിനുപുറമെ, ലേണേഴ്സ് ഡ്രൈവർമാർക്ക് മേൽനോട്ടം നൽകുന്ന സൂപ്പർവൈസർമാരുടെ കുറഞ്ഞ പ്രായപരിധി 25-ൽ നിന്ന് 22 ആക്കുന്നതും പരിഷ്കാരത്തിന്റെ ഭാഗമാണ്. രക്ഷിതാക്കളുടെ അനുമതിയില്ലാതെ ലൈസൻസിന് അപേക്ഷിക്കാനുള്ള പ്രായപരിധി 18 വയസ്സായി നിശ്ചയിച്ചിട്ടുമുണ്ട്.
പുതിയ മാറ്റങ്ങൾ ഡ്രൈവിങ് ലൈസൻസ് നേടുന്നതിനുള്ള നടപടികൾ ലളിതമാക്കുന്നതിനൊപ്പം സുരക്ഷിതമായ ഡ്രൈവിങ് ശീലങ്ങൾ പ്രോത്സാഹിപ്പിക്കാനും ലക്ഷ്യമിടുന്നു. പ്രത്യേകിച്ച് ഗ്രാമീണ മേഖലകളിലുള്ളവർക്കും റോഡ് ടെസ്റ്റിനായി ദീർഘദൂരം യാത്ര ചെയ്യേണ്ടിവരുന്നവർക്കും ഈ പരിഷ്കാരം ആശ്വാസമാകുമെന്നാണ് വിലയിരുത്തൽ.
