വടക്കൻ ബ്രിട്ടീഷ് കൊളംബിയയുടെ തീരപ്രദേശത്തെ എണ്ണ ടാങ്കർ നിരോധനം നീക്കണമെന്ന പ്രതിപക്ഷ കൺസർവേറ്റീവ് പാർട്ടിയുടെ നിർദേശം കാനഡയുടെ ഹൗസ് ഓഫ് കോമൺസിൽ പരാജയപ്പെട്ടു. ലിബറൽ സർക്കാർ ബില്ലിനെ എതിർത്ത് വോട്ട് ചെയ്തതോടെയാണ് നിർദേശം തള്ളപ്പെട്ടത്. നിലവിലുള്ള നിരോധനം തുടരുന്നതിലൂടെ വടക്കൻ തീരപ്രദേശത്തെ പരിസ്ഥിതിയും സമുദ്ര ആവാസവ്യവസ്ഥയും സംരക്ഷിക്കാനാണ് സർക്കാർ ലക്ഷ്യമിടുന്നത്.
പ്രതിദിനം 2.5 ലക്ഷം ബാരൽ കനേഡിയൻ എണ്ണ റെയിൽവേ വഴി പ്രിൻസ് റൂപർട്ടിലെത്തിച്ച് കയറ്റുമതി ചെയ്യാനുള്ള സ്ട്രാത്ത്കോണ റിസോഴ്‌സസിന്റെ പദ്ധതിയാണ് കൺസർവേറ്റീവുകൾ പ്രധാനമായും ചൂണ്ടിക്കാട്ടിയത്. ടാങ്കർ നിരോധനം നീക്കിയാൽ എണ്ണ കയറ്റുമതിക്ക് കൂടുതൽ അവസരങ്ങൾ ലഭിക്കുമെന്നും തൊഴിലവസരങ്ങളും രാജ്യത്തിന്റെ വരുമാനവും വർധിക്കുമെന്നും അവർ വാദിച്ചു. കനേഡിയൻ എണ്ണയ്ക്ക് അന്താരാഷ്ട്ര വിപണിയിൽ കൂടുതൽ മത്സരക്ഷമത നേടാൻ ഇത്തരം പദ്ധതികൾ സഹായിക്കുമെന്നും പാർട്ടി അഭിപ്രായപ്പെട്ടു.
എന്നാൽ ബ്രിട്ടീഷ് കൊളംബിയ സർക്കാരുമായുള്ള മുൻ ധാരണയുടെ അടിസ്ഥാനത്തിൽ പ്രധാനമന്ത്രി മാർക്ക് കാർണി നിരോധനത്തെ പിന്തുണച്ചു. നിലവിലുള്ള ഓയിൽ ടാങ്കർ മൊറട്ടോറിയം നിയമപ്രകാരം 12,500 മെട്രിക് ടണ്ണിൽ കൂടുതൽ എണ്ണയുമായി എത്തുന്ന കപ്പലുകൾക്ക് വടക്കൻ തീരത്തെ നിർദിഷ്ട മേഖലയിൽ നിയന്ത്രണമുണ്ട്. എണ്ണച്ചോർച്ചയുണ്ടായാൽ പരിസ്ഥിതിക്ക് സംഭവിക്കാവുന്ന നാശം കണക്കിലെടുത്താണ് ഈ നിയന്ത്രണം ഏർപ്പെടുത്തിയിരിക്കുന്നത്.
അതേസമയം, നിരോധനം നീക്കണമെന്ന നിലപാടാണ് ആൽബർട്ട പ്രീമിയർ ഡാനിയേൽ സ്മിത്ത് ഉൾപ്പെടെയുള്ള ചില ഊർജമേഖലാ അനുകൂലികൾ മുന്നോട്ടുവയ്ക്കുന്നത്. എണ്ണ കയറ്റുമതിക്ക് കൂടുതൽ വഴികൾ തുറക്കുന്നത് രാജ്യത്തിന്റെ സാമ്പത്തിക വളർച്ചയ്ക്ക് സഹായിക്കുമെന്നാണ് അവരുടെ വാദം. എന്നാൽ നിലവിലെ നിരോധനം തുടരുന്നതിനാൽ വടക്കൻ തീരത്തിന് പകരം തെക്കൻ മേഖലയിലൂടെ പുതിയ എണ്ണ പൈപ്പ് ലൈൻ നിർമിക്കുന്നതിനുള്ള സാധ്യതകൾക്കാണ് ഫെഡറൽ സർക്കാർ മുൻഗണന നൽകുന്നത്.
