വാഷിങ്ടൺ: അമേരിക്കൻ ഇടക്കാല തിരഞ്ഞെടുപ്പിന്റെ ആദ്യ ഫലങ്ങൾ പുറത്തുവരുമ്പോൾ ഡെമോക്രാറ്റിക് പാർട്ടിക്ക് നിർണായക മുന്നേറ്റം. സെനറ്റിലെ നോർത്ത് കരോലീന സീറ്റ് റിപ്പബ്ലിക്കൻ പാർട്ടിയിൽ നിന്ന് പിടിച്ചെടുത്ത ഡെമോക്രാറ്റുകൾ, ജോർജിയയിലും വിജയം ആവർത്തിച്ചു. പ്രസിഡന്റ് ഡോണൾഡ് ട്രംപിന്റെ രണ്ടാം ഭരണകാലത്തിന്റെ ശേഷിക്കുന്ന രണ്ടുവർഷത്തെ രാഷ്ട്രീയ ദിശ നിർണയിക്കുന്ന തിരഞ്ഞെടുപ്പിൽ ആദ്യ ഫലങ്ങൾ ഡെമോക്രാറ്റുകൾക്ക് പ്രതീക്ഷ നൽകുന്നതാണ്.
നോർത്ത് കരോലീനയിൽ മുൻ ഗവർണറും ഡെമോക്രാറ്റിക് സ്ഥാനാർഥിയുമായ റോയ് കൂപ്പർ റിപ്പബ്ലിക്കൻ സ്ഥാനാർഥി മൈക്കൽ വാട്ട്ലിയെ പരാജയപ്പെടുത്തി. റിപ്പബ്ലിക്കൻ പാർട്ടിയുടെ കൈവശമുണ്ടായിരുന്ന സെനറ്റ് സീറ്റ് പിടിച്ചെടുത്തത് ഡെമോക്രാറ്റുകൾക്ക് വലിയ നേട്ടമായി. ജോർജിയയിൽ നിലവിലെ സെനറ്റർ ജോൺ ഒസോഫ് വീണ്ടും തിരഞ്ഞെടുക്കപ്പെട്ടു. റിപ്പബ്ലിക്കൻ സ്ഥാനാർഥി മൈക്ക് കോളിൻസിനെയാണ് അദ്ദേഹം പരാജയപ്പെടുത്തിയത്.
ന്യൂഹാംഷെയറിൽ ക്രിസ് പപ്പാസും സെനറ്റിലേക്ക് വിജയിച്ചു. വിർജീനിയയിൽ മാർക്ക് വാർണർ, ഡെലവെയറിൽ ക്രിസ് കൂൺസ്, ന്യൂജേഴ്‌സിയിൽ കോറി ബുക്കർ, റോഡ് ഐലൻഡിൽ ജാക്ക് റീഡ്, മസാച്യുസെറ്റ്‌സിൽ എഡ് മാർക്കി എന്നിവർ വീണ്ടും തിരഞ്ഞെടുക്കപ്പെട്ടു. ഇല്ലിനോയിസിൽ ഡെമോക്രാറ്റിക് സ്ഥാനാർഥി ജൂലിയാന സ്ട്രാറ്റൺ വിജയിച്ചു.
കോൺഗ്രസിന്റെ നിയന്ത്രണം നിർണായകം
അമേരിക്കൻ പ്രസിഡന്റിന്റെ ഭരണകാലത്തിന്റെ പകുതിയിൽ നടക്കുന്ന തിരഞ്ഞെടുപ്പായതിനാലാണ് ഇത് ഇടക്കാല തിരഞ്ഞെടുപ്പ് എന്നറിയപ്പെടുന്നത്. ജനപ്രതിനിധിസഭയിലെ 435 സീറ്റുകളിലേക്കും സെനറ്റിലെ 100 സീറ്റുകളിൽ 35 എണ്ണത്തിലേക്കുമാണ് തിരഞ്ഞെടുപ്പ് നടക്കുന്നത്. 36 സംസ്ഥാനങ്ങളിൽ ഗവർണർ സ്ഥാനങ്ങളിലേക്കും വോട്ടെടുപ്പ് നടക്കുന്നുണ്ട്.
സെനറ്റിൽ ഭൂരിപക്ഷം നേടാൻ ഡെമോക്രാറ്റുകൾക്ക് നാല് സീറ്റുകളുടെ അധിക നേട്ടം ആവശ്യമാണ്. ജനപ്രതിനിധിസഭയിൽ ഭൂരിപക്ഷം നേടാൻ മൂന്ന് സീറ്റുകൾ അധികമായി നേടണം. അതിനാൽ ഇരു സഭകളിലെയും ശേഷിക്കുന്ന മത്സരഫലങ്ങൾ നിർണായകമാകും.
ജീവിതച്ചെലവും ഇറാൻ യുദ്ധവും തിരഞ്ഞെടുപ്പിൽ ചർച്ചയായി
രാജ്യത്തെ ഉയരുന്ന ജീവിതച്ചെലവും ഇറാൻ യുദ്ധവും ഭരണകൂടത്തിനെതിരായ അതൃപ്തിയും തിരഞ്ഞെടുപ്പിൽ പ്രധാന ചർച്ചാവിഷയങ്ങളായി. വിലക്കയറ്റം സാധാരണക്കാരുടെ ജീവിതത്തെ ബാധിക്കുന്നുവെന്ന ആരോപണം ഉയർത്തിയാണ് ഡെമോക്രാറ്റുകൾ പ്രചാരണം നടത്തിയത്.
അതേസമയം, റിപ്പബ്ലിക്കൻ പാർട്ടി വിജയിക്കുമെന്ന ആത്മവിശ്വാസം ട്രംപ് പ്രകടിപ്പിച്ചിരുന്നു. ആദ്യ ഫലങ്ങൾ ഡെമോക്രാറ്റുകൾക്ക് അനുകൂലമായതോടെ കോൺഗ്രസിന്റെ നിയന്ത്രണം സംബന്ധിച്ച പോരാട്ടം കൂടുതൽ ശ്രദ്ധേയമായി. ശേഷിക്കുന്ന ഫലങ്ങളാണ് ട്രംപ് ഭരണകൂടത്തിന്റെ അവസാന രണ്ടുവർഷത്തെ രാഷ്ട്രീയ നീക്കങ്ങളിൽ നിർണായകമാകുക.
